پېوەڼی خەڵکو هۆرامانی بە گردانەیی ڕاو ڕەچەو یارسانی و بە دیاری کریایی بە ئایینو (میترائیزمی و زەردەشت) یۆ:
پېسە مزانمۍ هۆرامان یاگۍ پېڎابېیەی، گەشە کەردەی، ڕېککەردەیۆ ڕاو ڕەچەو یارسانی بېیەن، ئاشکەران کە هۆرامان پېسە ناوچەی، هۆرامی پېسە میللەتی پېوەڼیێ پتەوشان هەن پا ڕاو ڕەچەیۆ.
وەختێ ساسانیەکۍ دەسەڵاتشا یاوا دەس، چەنی پېیا ئایینیەکا زەردەشتی یۊشان گېرتەن، ئا پېوەڼییە پتەوەیچ بېیەن بە هۊکارو دلېنە شېیەی شۊنەوارەکا (دۆڵەتو ئەشکانی) ، پانەیچە ئایینو (میترائیزم- میهر پەرەسی) کە دینی ڕەسمی (دۆڵەتو ئەشکانی) بۍ، چېرو فشارو دۆڵەتو ساسانینە پووکیاوە، بەڵام بەشێ جە پیر و پاڕەویکارا ئا دینەیە پەنەشا بەردېنە کەشە سەختەکا هۆرامانی پەی پارېزنای ژیوایشا هەم دینەکەیشا، میترائیزم کاریگەریش سەرو دینەکا (زەردەشتی و یەهوودی) بېیەن، بە پېچەوانەیچۆ ئا دینېچە کارشا جە دینو میترائی کەردەن، ئا بارە تاکو ئامای دینو ئیسلامی پەی ناوچەو هۆرامانی بەردەوام بېیەن، چېرو کاریگەری لەشکەر کېشی دینو ئیسلامی، ئایینو زەردەشتی یاوا بە هەمان چارەنوېس ئایینو میترائی، ژمارێ فرۍ جە موغەکا زەردەشتی وېشا یاونان کەشە سەختەکا هۆرامانی، خەڵکو ناوچەکەی جیاوازیشا مېیانو ئا کەسا نەکەردەن کە ئامێنۍ دلېشا، ئیتر هەر ئایینێشا بېیەبۊ.
ئانەیچ پاڵنەرێ بېیەن پەی نزیک بېیەیۆ ئا دینە جیاوازا جە یۊترینی، هەمیچ یۊ شییەیێ مېیانشانە بېیەن، پېسە ئانەی هەر دوە دینەکە ئایېرشا بە نوورو خوڎای زانان.[1]