=KTML_Bold=Newroz û zarok=KTML_End=
=KTML_Underline=Xecê Rêdûr=KTML_End=
Heta niha Newroz ku wateya wê roja nû ye bi gelemperî bi çavên mezinan hatiye vegotin. Lê li her derê Kurdistanê, ji bilî mezinan bi hezaran zarok jî Newrozê bi ruhê xwe yê zarokatiyê, bi cil û bergên xwe, bi deng û rengê xwe, bi lîstik û reqsa xwe pîroz dikin, dibin xeml û nexşa Newrozê. Mirov dema wan temaşe dike dizane ku di dilê zarokên kurdan de jî agirê Newrozê, agirê azadiyê hatiye vêxistin.
Roja Newrozê zarok li her derê belav dibin û Newrozê bi ya dilê xwe pîroz dikin. Carna, dikevin nava ciwan û mezinan jî û hewl didin ku wek wan bireqisin. Mezin, ji bo zarok bibihîsin û hîn bibin ji wan re wiha dibêjin:
21’ê Adarê
Mizgîniya biharê
Berfê da guliya darê
Nema heta êvarê
Hat sersal û roja nû
Berf heliya zû bi zû
Agirê sor gur û geş bû
Dilê me hemûyan xweş bû
Li gel van gotinan dilê zarokan jî xweş dibe, baweriya wan a ji bo xwe zêde dibe, bi dengekî bilind stranan dibêjin û helbestan dixwînin û li ber wan dilîzin:
Em zarok in, zarok in
Wek xodîk û neynûk in
Carna gul û şemamok in
Carna kulîlk û bihok in
Em çevbelek û çavreş in
Lîstikên me pir xweş in
Em radibin dimeşin
Wek tîrêjên rojê geş in
Li kûçe û kolanan
Li ber derî û ser banan
Li zevî û meydanan
Kom dibin li her deran
Dayik û bavên zarokan gava ku dibînin zarok ji bi dilxweşî û rûgeşî Newrozê pîroz dikin ji hev re wiha dibêjin:
Ev zarok zarokên me ne
Ji can û rehên me ne
Ronahiya çavên me ne
Pêşeroj û sibehên me ne
Agirê nûrojê geş dikin
Dilê xwe pê xweş dikin
Xwe li ser agir davêjin
Gotinên şîrîn dibêjin
Zarok carna jî, ji xweh, kek û cîran û nasên xwe yên ku ji wan mezintirîn gotinên li ser Newrozê dibihîsin û bi vê yekê gelek bextewar dibin:
Serê salê binê salê
Pîroz be Newroza malê
Bilind bike vê alê
Tiştekî bavê vê desmalê
Em in neviyên Medan
Nûroj e, cejna me kurdan
Pîroz dikin li qadan
Bi kêf û şahî û seyran
Dilê zarokan jî wek agirê Newrozê geş e. Ew li cihê xwe nasekinin. Carinan bi serê xwe, carinam jî li gel yên ji xwe mezintir, bi kêf û şahiyeke mezin wê roja pîroz cejna kurdan Newrozê bi dilekî herî xweş û bi coş û kelecaneke mezin pîroz dikin û qet naxwazin ew roj xelas bibe.
Di serî de li zarokan, Newroz li me hemûyan pîroz be û ji me re azadî û xweşiyê bîne…[1]