براییما برایی، کیسەما جېیایی
خەڵکو هۆرامانی ژیوای ڕوانەشا سەرو شانا وېشاوە بېیەن، ئاڎۍ بە ڕۊشنایی ئاوەزیشاو هېزو مەچەکاشا تەمامو پەنەۋازیەکا وېشا جە پۊشاک و حاجەت و کەرەسەکۍ ژیوای وەشکەران، گرڎ تاکێ هۆرامی بە ژەن و پیاوە خاوەن دارایێ تاکو ڕادێ سەربە وېن، خاوەن کیسەو وېشەن، ئاتاجیش بە هیچ کەسێ نېیەن، بەڵام چەنی ئانەیچە پېوەڼیە کۊمەڵیەکېشا فرە پتەوېنۍ، هامکارۍ یۊینۍ، بە گەل هەرمانە کەران، شۆنشینۍ پەی لاو یۊترینی کەران، وەختو وەشی و ناوەشینە، وەختو قۊمیاکانە کەلکەو یۊترینی گېران، بەڵام کیسەشا جېیان، دەس پان نمەکەراوە پەی یۊترینی، سەرە مەنامنارە پەی زەڕی، چوونکوم دەسی مانیا منیا سەرو کېسەی پەڕیشاوە.[1]