ئیتر وەسېن
نویستەی: #ئەسعەد ڕەشید#
واڵەو براڵە وەشەویسەکان، مزاندۍ ئېمە پېسە ئینسانی و هەم پېسە هۆرامی کارو هەرمانەی بنەچەیی وېمان گومکەردەن .
مزاندۍ پروسەو ژیوای و زیڼڎەگی کەردەیمان ویرشیەنۆ .
مزاندۍ ڕاو یاوای بە بەهرەکان و بەها بەرزەکاما وڵاونێنە .
کارە فەرهەنگییەکۍ، کارە هونەرییەکۍ، کارە ئینسانییەکۍ و تەمامو هەرمانەکا کە ئینێ خزمەتو وېمانەو بەهرەو لەزەتشان چەنە هۊرگېرمۍ ئیساتۍ نامۊنۍ پەنەمان.
دوورکەوتەیۆ جە سروشتی و وۍ خنیکنای دلۍ دنیاو مادەیی و تەماعکاری و دیمە ناجۊرەکەو تەکنەلوجیاینە، جەمعێ ئینسانۍ ئالی تەبیعەتشان خولقنان کە تەمامو وینگاو پەیدیایشان مادەو مادەن.
مزاندۍ ئېمە بەبۍ هاگایی ئازادی وېمان جە دەسدان، مزاندۍ ژیوایمان پەی وېمان نېیەنو وابەسی ویرە خرابەکا و کەلتورە بۍ ئەهمیەتەکانمۍ.
جە پانیشتەنە (باشور) کارمان پەیجوریەن پەی ژیوای کەسەکا تەری.
کارمان گېڵای شۊنیرەن پەی پەنهانیەکانو دەسەڵاتدارا و فەرماندارا.
فڵانە دەسەڵاتدار واتش .....
فڵانە دەسەڵاتدار ئڼەش دزی
فڵانە دەسڵاتدار هەرمانۍ ناجۊرش کەرد
فڵانە پارت و حزبی سیاسی تاریخش وەشکەرد
مەرۍ (پەرلەمان) کۊنیشتش کەرد.
وۍ مەشغوڵکەردەی ئەپی کاراوە نەک هەر بەرهەمش نېیەن، بەڵکوم کۊشتەی دەمەکا ژیوایاو خەساردای تەمەنېیەن .
وەڵینەکۍ ئېمە ئەدەب و فەرهەنگێ دۊڵەمەنشان پەی ئاستېنمۍ جیا، کەچی کارما بېیەن بە گېڵای شۊنەو کەناڵە تەلەفزیونیەکارەو گۊش قۊڵاغۍ پەی هەواڵێ بېلەزەتی.
ئېمە وەڵینەکاما زوانێ دۊڵەمەڼڎو سەنگینشان پەنە خەڵات کەردېنمۍ، کەچی جیاتی وەفاڎاری و پەنەزانایمان پەیشان کۆتېنمۍ شۊنەو ئانېشان کە گەرەکشانەن زوانەکەیمان دلېنەبەران.
ئېمە ئەچېگە جیاتی ئانەی بەهرە بەرمۍ جە سرووشتی، جیاتی ئانەی لەزەت وەرگېرمۍ جە ئەدەب و شېعرېما، جیاتی ئانەی کۊششمان بە ئاراسەو پارېزنای زوان و فەرهەنگیمان بۊن، بەبۍ هاگا وېمان خەریک کەردەن بە کارە ڕامیاریەکاوە کە بېجگە بۍ بەرهەمی و دڵمرنایی و نەوەش وستەی ئەندېشەیمان، هیچی تەرش چەنە سۊز نمەبۊن.
مزاندۍ (کەڕۍ سیاسەتی) گردچېوېش خرابنانو ناشیرین کەردەن.
دینداریش جە دنیاو عیرفانی و ماریفەتی و بەها بەرزەکاوە گېرتەنەرە پەی بەشکەردەی ئینسانەکان سەرو بنەماو وابەسی مەزهەبی و حزبی و کەسی.
فەرهەنگو ئەدەبش جە دنیاو سروشتی و عیرفانی و عەشقیۆ یاونان بە ئەدەب و شېعرێ دژمان ئامېزو پارت ئامېزو مەردۍ.
پېوەنڎییە کۊمەڵیەکېش جە هامکاری و یارمەتی دەسەجەمعیۆ ئاردۍ پەی هامویری و هام مەسڵەحەتی، ئیتر وەسېن.[1]