گەرەکشانە خڕېماکەراوە
ئەلەو حەمید، ئەلەو، ئەلەو
ئەلەو حەمە گېیان
ئەرۍ ئانە چی جواب مەڎەیۆ، ڕیشەت بەر نێ، شەو ڕۊ چەنی مامۊسا بەختیاری خەریکو قسە کەردەیەنی، هیزی تاکو ئیسە دە جارێ زەنگم دان، یانی چېش! ئەی من و تۆیچ ڕەفێقێ نەبیېنمۍ؟
کورە خەجاڵەتو وېم حەمە گېیان، بخوڎا نەڎیەنم زەنگت دابۊ.
بڎیە، ئینە تەلەفۆنا و کامپیۆتەرا، دروێ هۊر مەگېرۆ، ئیسە لەوە گڕە من پەرسێوەم بۍ کە زەنگم دا،
چېش چېش؟
واتم لەوە گەڕە
لەوە گەڕە چېشا؟
ئەی دۊشاو، لەوە گەڕە سۆرانی، مەهابادیا، یانی جارێو واز بارە و بلمێ سەرو ئەسڵو پەرسەکێ،
دەی بە مەهابادی چی قسێ کەری حەمە گېیان؟ ڕەنگا دوور تۊ خەرەفیا بی،
ئەی دیسان دۊشاو، ئەرۍ باور کەری تۊ ئەجۊ چیرو گۊشو گاویەنە وتەنی.
پەی چېشی؟
ئەی قەرار نېیا بە زوویی خڕېما کەراوە، واتم با هەر ئیسۆ تەمرین کەرمۍ، خاس فێرێ بیمێ، چوونکە باسە باس کەرا، سەوای ڕۊ هەر کەس زوانو ئاڎییشا نەزانۆ، نانش نمەڎا بوەرۊ!
بڎیە ئینە قسێ مامۊسا بەختیاریەنە، تۊ وېت تێکەڵو ئی چېوا مەکەرە، تۊ قۆمێت فرێنێ چۆلاوە، وېت ئۆجاخ کۊر مەکەرە، پەرسەکێت چېشەنە؟
دەی وەڵا ویرم چانەیە نەکەردەبېوە، واتم ئەرۍ ئیدەکەتا بی بە چېش؟
کام ئیدە؟
ئەی قەرار نەبۍ ڕۊمانێ، داستانێ بەرڎۍ پەی چینی و بە هەرزان چاپێ کەردێ؟من خەریکو ڕۊمانێوی تازەیەنا، بە چن چاپش کەردێ پەیم؟
من ئا چېوا مەزانۇ جە مامۊسا بەختیاری پەرسە.
ئەی تۊ شەریکش نېیەنی؟چکارەنی؟
جارێو لەوە گەڕە ئانا مسافرم پەی ئاما خوڎا حافێز
مدرە مدرە، ، ئەی تۊ چی بە زوانو ئاڎییشا قسێ کەری؟
ئاخر من فرە بەڎبەختەنا، بۍ کەسەنا، ماچو نەکای
نەکای یانی چېش؟
ئێێێ‌ هیێێێی، هیچت حاڵی نیا، خوڎا حافێز.
ڕەزا بەهمەنی.[1]