پۊختێوە جە تاریخو هۆرامانی و سرووشتو ژیوای خەڵکەکەیش
بەشۍ: حۆتەمە
نویستەی: #ئیبراهیم میکە عەلی#
ئېستەیۆ قەواڵەکا هۆرامانی و تەنگیبەری
سەرەتاو سەدەو ویسینە کەسېوە هۆرامی کەشو کوٙساڵانیۆ و دلیٛ مەڕێوەنە چڼ قەواڵېوەش ویٛستیٛوە، ویٛستەیۆ ئا قەواڵا بیبە بەرېوە و کریاوە ڕوەو پەیجوٙریکەردەی بارەو ۋېیەردەو زوانی و فەرهەنگیرە جە وەرکەوتەنە بە گردی.
بارەو ئا سەنەڎ و قەباڵاوە دەمواچیٛ و نویسیاییٛ فریٛ هەنیٛ، وەروئانەی قەرارما پاسەنە پوختەو ۋېیەردەی باسکەرمیٛ و بوانی نەوزمیٛ دلیٛ گیٛجاوە و ۋېیەردەی، چیٛگەیچەنە پوختەو ڕازەو کەوتەی ساراو قەواڵەکا و بەردەیشا پەی ئەوروپای و ئەوەوانایشا وزمیٛ ڕوە هەکە پی جوٙرەنە:
کەشوانێوە هۆرامی خەڵکو دەگاو تەنگیبەری سەرو داواو پیرەکەیش مەڕێوەنە کەشو کوٙساڵانیۆ دلیٛ کوپەڵېوە پەڕ هەرزنینە بڕێ قەواڵیٛ ویٛزوٙوە و دماتەر قەواڵەکیٛ یاوا دەسو شیٛخ عەلادینی نەقشبەندی و ڕاو ئاڎیچۆ یاوا دەسو دکتور سەعیدی کوردستانی هەکە پزیشکو چەما بېیەن و پەی چارەسەرو چەما یام شیٛخ عەلادینی یام عەباس قولی سانو ڕەزاوی شارو سنەیۊ لوان هۆرامان و چاگە لاو گەورەکەیۆ چڼ ڕوێوە مەنەنۆ، قسێ چێ و یوەچۆ، دکتوٙر باسو ئا قەواڵا مژنەوٙنەو مەگنوٙ شوٙنەو باسەکەی، هەرچڼ وچیوٙ قەواڵەکیٛ فریٛ بینیٛ وەلێم د. سەعید یەریٛشا دەسش وستیٛنیٛ هەکە سەرو پوٙسو ئاژەڵیۆ نویسێنیٛ و وەختێ هەکە پەی وەنای بەرزی لوان پەی ئەوروپای و بەریتانیای ئا یەرە قەواڵەشە بەردیٛنیٛ چەنی ویٛش و یاونێنیٛش دەسو شارەزایا ئا ویاریەو دماو دویٛ ساڵا دویٛشا لاو کەسېوە بە نامیٛ پروفیسوٙر (مینس) یۊ پەیجوٙریشا سەر کریوٙنەو یەرەمیچ دمای دە ساڵا لاو کەسېوە تەریۆ بە نامیٛ پروٙفیسوٙر (کاولی) یۊ پەیجوٙریش سەر کریوٙنەو پەیجوٙریەکیٛ وەڵاویٛ کریاوەو بەرگنوٙ هەکە قەواڵەکیٛ:
- هینیٛ سەردەمو هیلینی و سەدێوە وەڵیٛ جە ئەڎابېیەی بەڕیٛز عیسای مەسیٛحینیٛ.
- دویٛشا بە خەت و زوانی یوٙنانی نویسێنیٛ و گیٛڵاوە یوەمشا پەی (88) ساڵیٛ وەڵیٛ ئەڎابېیەی عیسای مەسیٛحی و دوەمیچ پەی (22) ساڵیٛ وەڵیٛ مەسیٛحی بەڕیٛزی، یەرەمیچ بە خەتی ئارامییٛ و زوانی پالەوی ئەشکانی نویسیان و مەگیٛڵوٙوە پەی (52) ساڵیٛ وەڵیٛ ئەڎابېیەی عیسای.
- باس جە ورەتەی و ئەسای میٛوە دەیمێوە کەرا هەکە نیمەش ورەشېیان.
- قەواڵەکیٛ فرە ڕیٛکوپیٛک نویسیێنیٛ، بە جوٙرێوە هەکە گردو مەرجە یاساییەکاشا گیٛرتەن ویٛ، پیٛسەو: ورەشېیار و بسان و دویٛ شایڎیٛ و بڕو ڕوبەرو میٛوە دەیمەکیٛ و سنورو زەمینو میٛوەکیٛ و وەختو مامەڵەکەی، گرد دەسنیشانیٛ کریێنیٛ.
- مامەڵەکە بە زەڕو ئا وەختەو یوٙنانی قەبڵیان (دراخما) .
ئەندازەو قەواڵەکا پی جوٙرە بېیەن:
یوەمشا 14 X 24 سم
دوەمشا 21 X 27 سم
یەرەمشا 15 X 9.5 سم، بینیٛ.
- تەمەنو قەواڵەکا نزیکەو 2150 ساڵان.[1]
.