نامۍ: مەڵڵا جەلال
نازنام: خورماڵی
ساڵۊ پېڎابېیەی: 1816ز
یاگۊ پېڎابېیەی: #خورماڵ#
یاگۊ مەرڎەی: #بېیارۍ#
$ژیۋاینامە$
مەڵڵا جەلالو خورماڵی
مەڵڵا جەلال، یۊ بېیەن جە زانا نامڎارو گۆرەکا ئا سەردەمەیە، دۊسی نزیکو شېخ عەبدوڵڵاو خەرپانی بېیەن، مامۊساو زاناو عارفی گۆرەو کوردی (مەولانا خالیدو نەقشبەڼی) بېیەن. دلۍ بنەیانەو بابانەکانە خاوەنو قەدرو حورمەتێ فرەی بېیەن، یاردی دارایی دریان، چن باخێ خورماڵی و دەرەو بېیاری ۋزیێنۍ خزمەتو وېش و حوجرەو مەدرەسەکەیش.
یۊ چا باخا دەرەو بېیارۍ کە ئیسەیچ هەر پەنەش ماچان (کۊگاو مزگی) وەقفو مزگی خورماڵی بېیەن کە مەڵڵا جەلال مامۊساو مزگیەکەی بېیەن. مەڵڵا جەلال هامنېنە چەنی فەقیەکاش دەرەو بېیارۍ مەنېنێ و چاگە خەریکو دەرس و دۆری بیېنۍ.
مەگېڵناوە، مەڵڵا جەلال نەوەش مەگنۊ، پەی فەترێ نمێ پەی مزگی، مەولانا خالید ویرش مەکەرۊن، بېتاقەتشەن، بە چن دېڕە شېعرێ داواش وەنە مەکەرۊن بگېڵۊوە پەی مزگی:
قەدەم ڕەنجە کەر واڎەی وەفاتەن
شەهەنشای شاڎیم، ماتو نامایتەن
بت پەرسا ئاسا ئەروام جە لاتەن
جە حوجرەی سەراو کەی مەبیی ڕاهی
هېند مەمدرۊ ماه جە بورجی ماهی
قەدەم ڕەنجەکەر ئامان سەڎ ئامان
تۊزی دامانت شیفان پەی زامان
وەرنەها تەمام نائیرەی دووری
وە کۊی نوورە کەرد، سەرتاپای (نووری) .
دیارەن (نووری) نازنامو مەولانا خالیدی بېیەن.
مەڵڵا جەلال ساڵەو (1816ز) دلۍ دەرەو بېیارۍ کۊچی دمایینش کەردەن، جەنازەکەش بریانۆ پەی خورماڵی و چاگە ئەسپەردە کریان.
ئەسعەد ڕەشید.[1]