سەفەرو دوەمجارو مەولانا خالیدی پەی شارو سلێمانی
جاری یەکەم وەختێ مەولانا سلێمانیش جېیائاست و لوا پەی شارو بەغڎای، ئا وەختە سەردەمو دەسەڵاو ویلایەو (سەعید پاشاو کوڕو سولەیمان پاشای گۆرەی) بۍ، مەولانا خالید ئەچاگە دلۍ (تەکیەو خالیدییە) ینە نیشتەجابی و زانێ و پیاماقووڵۍ و خەڵکۍ تەرۍ گرد لایێوە ئېنۍ خزمەتش پەی وەرگېرتەی تەریقەتی و دەسکەرېنۍ بە سلووک. ئا مەدرەسەو خالیدیەیە وەختو وېش عەباسیەکا بنیاڎ نېیابۍ، دماتەر پەی فەترێ (حەزرەتو غەوثی) دلېشەنە گۊشەگیربېیەن و ڕیاضەتش کېشتەن.
بارو زروفو سلێمانی فاڕیان، (مەحموڎ پاشا کوڕو عەبدولڕەحمان پاشا) ی بی بە فەرماندارو وەڵاتو بابانی، مېیانو بەغڎای و سلێمانی ئاسایی بییۆ. مەحمووڎ پاشا بەسەفەرێ لوا پەی بەغڎای، چاگە لوان پەی خزمەتو مەولانای جە تەکیەو خالیدییەی، وەختێ پایەو حورمەتی و ئیرشادو مەولانایش چەم پەنەکۆت کە چەنی ئا گرد پېیا ماقوولۍ و زانێ قابیلۍ ئینێ خزمەتشەنە، ئیتر یاوانە کە مەولانا ئینا چ پایێوەنە، فرە بە دڵگەرمی تکاش وەنەکەرد بگېڵۊوە پەی سلێمانی، چەمۍ جە عاجزیەکا قووجنۊ، نوورو بەرەکەت بارۊوە پەی سلێمانی.
مەولانایچ بە خاترەو وەشەویسی نیشتیمانی و تکاکۍ مەحمووڎ پاشای تەشریفش گېڵاوە پەی شارو سلێمانی، مەحمووڎ پاشایچ حورمەتێ فرەش گېرت، خزمەتێ شایانەش کەرد، خانەقێوە گۆرەش پەی وەشکەرد پەی یاگۍ خوڎا پەرەسی و ئیرشادی کە ئیسە پەنەش ماچان (خانەقاو مەولانای).
ئیتر خەڵکێ فرۍ جە عێراق و سعودیە و ئەردەن و ئێرانو وەڵاتە هامسایەکاوە، تەنانەت جەئەفغانستان و هێندستان و میسرۆ ئامێ پەی خانەقاو مەولانای، چاگە چېرو دەسو مەولاناینە تەریقەتشان وەرگېرت، بە نوورو دەروونو موبارەکو مەولانای نوورانیۍبیۍ.
ئەسعەد ڕەشید.[1]