پۊختێوە جە تاریخو هۆرامانی و سرووشتو ژیوای خەڵکەکەیش
بەشۍ: ویس و یەکەمە
نویستەی: #ئیبراهیم میکە عەلی#
پەی ئانەی کوچێ نزیکیٛ گنمیٛوە و یاومیٛنە سروشتو ژیوای ئا سەردەمیە و کەسایەتی جافر سانی، ئی چڼ بڕگەما کەردەن بە هۆرامی و منیەیمیٛشەرە:
*موکەڕوم تاڵەبانی سیاسەتزان و پیای دنیا دیدە و هامسەردەمو جافر سانی بارەو کەسایەتی جافر سانیۆ نویستەنش: سان پیێوە قسەزان و ژیر و فامیڎە و قسەوەش و بیٛدەعیە بیٛ، پېوەڼیش چەنی فرەو شیٛخە تاڵەبانیەکا و خەڵکو دلیٛ تەکیەکا وەش بیٛ و شوٙخیش بیٛ چەنیشا.
*هاموەخت چەنی شوٙڕشەکاو سمکوٙی شکاکی و شیٛخ مەحمودی بەرزنجی، جافر سانیچ دژو دەوڵەتو ئا سەردەمەو ئیٛرانی هورئیٛستەن و کۊششی چەکدارییش کەردەن، وەلێم دماو ئانەی کومپانیا نەوتیەکیٛ بەریتانیای یاوا بە مەرامەکاشا، کەرا سەرو جافر سانی ماچا مشوٙم فشارەکات سەرو دەوڵەتو ئیٛرانیۆ مردنی. موکەڕەم تاڵەبانی هەمان نویستەیشەنە باسو چەمپەنەکەوتەیێوە ڕوٙنامەوانی کەروٙ هەکە چا وەختەنە ئەنجام دریان چەنی جافر سانی و ڕوٙنامەوانەکە پەرسانش وەنە: شمە ناوچێوە سەخت و دژوارەنە بیٛندیٛ و چەکداریٛ و تفەنگچییٛ ئازێ و چەنەئامێچتا بیٛنیٛ، وەلێم پا تەشکە هەکە پەنەوازبیٛ دریٛژەتا نەڎا بە شوٙڕشی و جەنگیتا چەنی ڕژیٛمی پەهلەوی، هوٙکارش چیٛش بیٛ؟!
جافرسان پەیواچو ئا پەرسیٛنە واتەنش: حکومەتی ناست!
ڕوٙنامەوانەکەی بە سەرسامیۆ وەنە پەرسانۆ: حکومەت؟!
جافر سانیچ پەیواچشەنە واتەنش: من حکومەتو بەریتانیای واچوو.
پی تەشکە یاومیٛنە هەکە داگیرکارە بەریتانییەکیٛ چڼ فشارشا وستەن سەرو جافر سانی و حکومەتەکەیش.[1]