پۊختێوە جە تاریخو هۆرامانی و سرووشتو ژیوای خەڵکەکەیش
بەشۍ: سی و یەرەمە
نویستەی: #ئیبراهیم میکە عەلی#
ئەدەب و هونەر یام هوٙنا و هونەر هۆرامانەنە
ئەدەب و هونەریچ پیٛسەو بەشەکاو تەری، ژیوای گلیٛرگەو هۆرامانینە وېیەردېوە دوورشا هەن و یاگەپاو ویٛشان هەنشان.
نەک هەر ئانە، بەڵکوم وېیەردەی دوورەنە نویستەی یام هەر نەبېیەن یام فرە کەم بېیەن، وەڵینەکیٛما پەی بەرۋستەی مەرامیشا، یام ۋستەی ساراو هەست و داوایەکاشا، ئەوەڵۆ پەناشا بەردیٛنە وەرو هورکڵاشتەی نیگارا پۆ کەشو کەمەریۆ و دماتەر زوان کەوتەن هەرمانەو بە چڕیەی ئاوازاو دماتەر بە هوٙنایۆ هوٙنیایا هەست و سوٙزو داواو ویٛشا بەرشا وستەن پەی یوٙترینی، یام پەنەش لاڵیێنیٛوە ئەو خوڎای و گەردوونی.
چی بارۆ سەرچەمەکیٛ فرە باسیٛ جوٙراوجوٙریٛشا چەنەنیٛ و بە بایەخۆ قسیٛشا سەرو ئی دیمە زینڎەو وېیەردەو ئانزانیەتی بە گردیی و ئانزانی هۆرامی بە تایبەتی کەردیٛنیٛ، پەی نمونەی: دکتوٙر محەمەد ئەمین هۆرامانی کتیٛبو (تارېخو هۆرامان) ینە هەشتا و یەرۍ لاپەڕیٛش تەیکەنیٛ کەردیٛنیٛ پەی ئی بابەتیەو بە وردی باسو جوٙرەکاو گورانیا و ڕیٛخەو زوانەوانی واچەکیٛ و باسو ژیوانامەو بڕێ جە هونیاراش کەردەن و نمونەو هونیایەکاش ئاردیٛنیٛ.
هەرپاسە ماموٙسا عەبدولڕەزاق عەبدولڕەحمان کتیٛبو (سەربوردێکی هۆرامان و سەردانێکی تەوێڵە) ینە (136) لاپەڕیٛش تەیکەنیٛ کەردیٛنیٛ پەی ژیوانامەو (25) هونیارا و باسو هونیایەکاشا.
هەر پاسە ماموٙسا ئەیوب ڕوٙسەم کتیٛبو (هونەری ژیان لە هۆراماندا) ، سی و نۊ لاپەڕیٛش تەیکەنیٛ کەردیٛنیٛ پەی باسو هونەرو گوٙرانیا هۆرامانە.[1]