کورد دلۍ چەرخەکا تاریخینە
بەشۍ: سەڎ و حەفتا و چوارەمە
نویستەی: #هاوڕێ باخەوان#
ساڵەو (1854ز):چن تۊمارێ پېوەس پی ساڵېوە ئینێ وەردەسەنە:
* ئەچی ساڵېنە جەنگو (کریمە)ی ڕوەشدێنە، کە ڕووسەکۍ دۋۍ تیپېشان جە کوردەکانو قارس و یەریڤانی وەشکەردۍ.
* ڕۊنامەنویسێ ئەوروپی، ملۊ پەی وەرکۆتو کوردەسانی و قارەمانی ژەنەو کوردی پەی وەرگیری جە ئێرانی مەوینۊن و وېنێوەش سەر مەکېشۊن.
* ئەچی ساڵېنە مەلا عەبدوڵڵای عیرفانی شاعېر ئامان دنیا.
* مانگەو (3) ئی ساڵېنە، سەردارو هېزەکانو ڕووسی جە کەفکاس، فەرمانشدا بە (کۆلۆنێل لۆریس مێلیکۆڤ)ی پەی گفت و گۊی چەنی هۊزە کوردەکا پەی ئانەی بە قازانجو ڕووسیای دژو تورکەکا بارۊشانە دلۍ جەنگی.
* تاریخو (24-07-1854ز) ڕووسەکۍ دلۍ جەنگو (قارس)ینە سەرو تورکەکارە سەرکۆتۍ بە یاردی کوردەکا، ئەچی ساڵېنە و دلۍ جەنگو قارسینە هیچ کوردێ دلۍ سوپاو تورکینە نەمەن.
* تاریخو (02-11-1854ز)ینە، سەردارو بەرەو کەفکاسی چەنی قاسم خانی و چن سەرخېڵێ کوردی کۊبییۆ دلۍ دەگاو (کیزیل)ی، بە خاترەو ئانەی کوردەکۍ جەنگەنە یاردی ڕووسەکا بڎان.
* مانگەو (12) ئی ساڵېنە، یەزدان شێر دژ بە تورکەکا شۆڕشش هۊرخېزنان.[1]