Murat Karayilan: Divê mafên nasnameyî yên Kurdan bêne naskirin
Murat Karayilan destnîşan kir ku divê mafên nasnameyî yên Kurdan bêne naskirin û got Çekdanîn li ser vê bingehê dikare pêk were. Karayilan her wiha got, pêvajo ji bo Kurdan meseleyeke neteweyî ye.
Murat Karayilan: Divê mafên nasnameyî yên Kurdan bêne naskirin
Endamê Komîteya Rêveber a PKK'ê Murat Karayilan ji televîzyona Channel 8 re axivî.
Murat Karayilan di hevpeyvîna xwe de bal kişand ser êrişên dewleta Tirk û got, cihê ku lê êriş hebe wê PKK nikaribe kongreya xwe li dar bixe, ji bo vê jî divê demildest êriş rawestin.
Karayilan bal kişand ser bangawaziya guhertin û veguhertinê ya Rêber Abdullah Ocalan û da zanîn ku van hewldan û lêgerînan di salên 1990’î de dest pê kirine, lê ji ber hin destwerdanên komên veşartî yên di nav dewletê de ev guhertin li gorî dihat xwestin bi encam nebû.
Karayilan der barê mijarê û rola Celal Talebanî ya wê qonaxê de jî wiha got: “Wek tê zanîn di sala 1993’yan de di navbera Turgut Ozal û Rêber Apo de hin peywendî çêbûn. Mam Celal Talabanî jî navbeynakarî dikir. Ez bi vê mebestê Mam Celal Talabanî bi minnetdarî bi bîr tînim. Divê bê zanîn ku têkoşîna wî wê tu carî neyê ji bîrkirin. Wek tê zanîn wê demê pêvajo bi pêş neket. Ji nav dewletê destwerdan çêbûn. Turgut Ozal bi awayek ne eşkere hate kuştin. Dîsa Eşref Bîtlîs bi heman şêwazê hat kuştin. Ji ber wê jî pêvajoyê dewam nekir. Di sala 1998’an de jî pêvajoyek hebû, lê li hember vê jî komploya navneteweyî hate kirin. Di salên 2002’yan de Rêber Apo li Îmraliyê PKK fesih kir. Şer rawestiya. Lê wê demê jî hin kom ji hundir û derve derketin û xwestin tevgera me tasfiye bikin. Dema ku tiştên wisa çêbûn ji nû ve avakirina PKK'ê hat rojevê.”
Karayilan di axaftina xwe de bal kişand ser pêvajoya nû û got, piştî şerê deh salên dawî ku dewleta Tirk bi hemû derfetan xwest tevgera wan têk bibe, dema ku nekarî têk bibe, bi pêşengiya Devlet Bahçelî xwest pêvajoyek wisa bide destpêkirin.
Karayilan der barê mijarê de wiha axivî: “10 sal bi her rêbazî li hember me şer kirin û her cûre çek bi kar anîn. Ji NATO’yê piştevanî girtin, çekên herî modern bi dest xistin û şer kirin. Belê rast e me di vî şerî de windahî dan, lê em bin neketin û nekarîn me tesfiye bikin. Vê carê Devlet Bahçelî li parlementê çû silav da DEM Partiyê. Piştre di peyamê de got, ku ew ji bo aştiyê re amade ne. Got, Kurd û Tirk dikarin li hev bên. Herî dawî Rêber Apo bangawazî kir, diyar kir ku eger ku dewlet tiştek wiha dixwaze em jî amade ne ku pêvajoya guhertin û veguhertinê despê bikin.”
Karayilan ji bo ku ji vir û şûn ve jî pêvajo bi pêş bikeve got: “Divê Rêber Apo bikare yekser beşdarî vê pêvajoyê bibe. Ger ne Rêber Apo be, dibe ku hin komên gêrîla çekdanînê qebûl nekin û ez bi xwe jî bangek bi wî şeklî li gerîla nakim. Pêwîste komên gerîla bi Rêber Apo re hevdîtin bikin.
Karayilan di axaftina xwe de got ku ji bo Rêber Apo di vê qonaxê de rola xwe bilîze divê azad be û wiha dewam kir: “Em nabêjin bila were Qendîlê, Behdinanê, lê divê azad be û şande biçin hevdîtin bikin. Dikare li ser teknîk jî xebatên xwe bike, civînan çêbike. Dema pêwîst bû divê komên gêrîla biçin werin. Eger ne wisa be wê pêvajo li pêş nekeve. Eger ku Rêber Apo bi xwe vê pêvajoyê bi rêve nebe hin fermandar û şervanên me wê qebûl nekin ku çek berdin, tenê Rêber Apo dikare bi wan çek bide berdan. Ji bo wê jî divê azad be.”
Karayilan di hevpeyvaîna xwe de got ku ji bo ku kongra PKK’ê kom bibe divê dewleta Tirk êrişan rawestîne, Hakan Fîdan û Yaşar Gûler roleke xirab dilîzin. Karayilan bal kişand ser axaftin û daxuyaniyên Wezîrê Karên Derve Hakan Fîdan û Wezîrê Parastinê yê Tirk Yaşar Gûler û got ku ev herdû wezîr jî dixwazin pêvajo li pêş nekeve.
Karayilan da zanîn ku bi taybet Yaşar Gûler rastiyan berovajî dike û şerê psîkolojîk dimeşîne û wiha pêde çû: “Yaşar Guler bi axaftinên xwe pêvajoyê sabote dike. Agahiyên şaş dide raya giştî. Dibe ku heman agahiyan dide rayedarên dewletê jî. Dibêje ku me PKK’ê ji hêz de xistiye, heta tûne kiriye. Ya rast heqîqet berovajiyê van gotinane.
Karayilan got ku hêzên wan heya niha 24 balefirên keşfê yên bi çek û bê mirov xistine û got: “Me dîmenên wan jî bi raya giştî re parve kir. Gel çû li ser parçeyên wan foto kîşandin, eger hûn kêmek rast bi axivin hûnê dîmenên wan balefiran bi raya giştî re parve bikin. Hûn çima derewan dikin. Em gihiştine wê astê ku dikarin heya Enqerê çalakiyên hewayî pêkbînin.”
Karayilan di derbarê hêza gêrîla de jî got ku ger ku dewlet bi şer ser gêrîla de biçin wê gêrîla şer bike û bi ser bikeve. Karayilan heman demê de got ku gerîla hem ser erd, hem bin erd û hem jî di hewayî de êdî xwedî hêza şerkirinê ye.
Karayilan di hevpeyvîna xwe de cara yekem behsa civîna konseya leşkerî ya HPG ku di meha Çileyê de çêkirine û got: “Me di meha Çileyê de civîna xwe ya konseya leşkerî çêkir. Em gihiştin wê encamê ku em li her derî li gorî doktrîna şer a nû şer bikin. Lê ev berî banga Rêber Apo bû. Lê em bi xeta Rêber Apo ve girêdayîne. Rêber Apo xetekî li pêş dixe, ev xet ne tenê ji bo me ye, ji bo hemû gelê Kurd û herêmê ye û em bi vê ve girêdayîne. Lê ger ku dewleta tirk bi çek bi ser me de were, emê jî li gorî doktrîna şer li berxwe bidin û em bawerin emê bi vê doktrînê jî bi ser bikevin.”
Karayilan got: “Em dixwazin aştieyke rasteqîn pêk were. Divê mafên nasnameyê yên gelê Kurd bêne naskirin. Eger bi vî rengî bibe wê dostaniya bi Kurdan re pêk were. Niha ji hin derdorên Kurd re dibêjin dost in, lê belê ev dostaniyeke taktîkî ye, bila kes xwe nexapîne. Ji bo Kurdan li hemberî hev bi kar bînin taktîkan dikin. Ji bo dostaniyeke rasteqîn divê mafên nasnameyê yên Kurdên li nava xwe nas bikin. Çekdanîn li ser vê bingehê dibe. Bi vî rengî nebe nabe. Em têkoşîneke bi vî rengî dimeşînin. Rêber Apo vê pêvajoyê weke pêvajoya têkoşînê dinirxîne. Wê demê divê aliyên Kurd jî vê rastiyê bibînin û piştgiriyê bidin. Eger li Tirkiyeyê mafên nasnameyê yên Kurdan bêne naskirin, li ser vê bingehê destûra bingehîn bê amadekirin, aştî bi vî rengî bê, hingî Tiriye wê qezenç bike û li herêmê bi Kurdan re dostaniyê dîne. Bi vî rengî nebe wê dewleta Tirk her tim ji bo Kurdan xetere be.”
Karayilan herî dawî bal kişand ser giringiya xwedî derketina li pêvajoyê û got ku divê herkes li vê pêvajoyê xwedî derbikeve û erkên xwe bi cih bîne û got: “Ev pêvajo ji bo hemû parçeyên Kurdistanê pir giringe, Rêber Apo vê pêvajoyê pir baldarî digre dest, hemû hewldanên xwe bi vê baldariyê dest digire. Em wek tevger, wek gelê Kurd divê bên gel hev û destê Rêber Apo xurt bikin. Ji bo ku dewleta Tirk serî li fêlbazî û rêbazên xapandinê neke divê em baldarbin. Ev pêvajo ji bo Kurdan xwedî qerekterek netewî, mîliye. Divê hemû Kurd ji bo vê têkoşîn bikin.”[1]