نامۍ: ڕەحیم
نازنام: غوڵام وەیسی
ساڵەو پېڎابییەی: 1970ز.
یاگۊ پېڎابییەی: #بېساران _ هۆرامان#
$ژیۋاینامە$
ڕەحیم غۆڵام وەیسی، جە ساڵەو (1970ز.) جە شارە دەگاو بېسارانی جە بنەیانیە ئاسایی بە دنیا ئامان. دماو شۆڕشو پەنجا و هەفتی بە بۊنەو ئاڵۆزی و شەڕو ناکۆکی، بنەیانە بېسارانشا پەی شارو مەریوانی ئاس جیا. دەرو ڕاهنمایش جە مەریوان گۆزەرنا و تاکو ساڵەو شەس و چواری کە مەریوان بې ئەمان بومباواران کریا و ئاوارەی بییەی پەی شارو سنەی. ساڵەو (1996ز.) جە دانشگاو کورڎەسانی جە ڕشتەو کارشناسی زوان و ئەدەبیاتی فارسیش تەمامنان. دماو وەقفیە تەحسیڵی بە بۊنەو هەرمانەی ڕامیار و کۊمەڵایەتی جە دانشگاو سازمان مۆدیریەت سنعەتی جە ڕشتەو EMBA فوق لیسانس و مۆعادڵو دۆکتری گیرت. ساڵەو (2007ز.) مەجەلەو زانشتی و فەرهەنگی ژیواریش بە یەری زوانی هۆرامی، سۆرانی و فارسی مۆنتەشر کەرد. چی نەشریەنە بې کە پەی ئەوەڵگلی نویستەی بە زوانو هۆرامی جە ڕەسانەنە دەسش پەنە کەرد. وېش چی بارەوە ماچۊ: پەی ئەوەڵ جاری جە وبلاگەنە وەڵی تلگرامی و ماباقی تۊڕە کومەڵایەتیەکا، داستان و چیروک هورامیم نویستې و سەدها مەتڵەب بە فارسی، یەریی پەیجوکاری (پژوهشی) سەرو دیوانو مامۊسا بېسارانی و مەڵڵا حامد بېسارانی و مەڵڵا حەسەنو دزڵیې هەرمانەم کەردېنە و فرەتەر جە سەڎ و پەنجاە مقاڵە و مەتڵەب فارسی چاپ کریام هەن جە ڕونامە سەراسەری و هەفتەنامە مەحەلیەکانە. کە بازیەشا جە وبلاگەنە هەر بە سرچو نامی ویم قابل دەس ڕەسینی.
پەی ئەوەڵ جاری ئەوەڵین ئەوستورەی هۆرامېم بە نامی ڕازەو ژوژیا نویستە. کە بەشیە تاییبەتتش جە ئەفسانەهای دیارما کاکە کورش ئەمینیش تەرخان دان بە وېش و پېسەو ئەوەڵین ئەستورەی هۆرامی دریان قەڵەم. جە ئێدامەو هەرمانە ئەدەبی و فەرهەنگیەکاشەنە ئەنجۆمەنو ئەدەبی و هۆنەری مامۊسا بېسارانېش جە ساڵۊ (2011ز.) مەرزنارە کە فەعالیەتې فەرهەنگیېش وەرچەمېنی و هەر ئیسەیچ ئێدامەشا هەن. بازیە چی هەرمانانە ئېشارەشا پەنە مەکریو: ئەرەنیشتەی هەفتەگی فرەتەر جە دوانزە ساڵی. فېرکەرڎەی زوانو هۆرامی. ڕاوە بەردەی کۊنگرەو مامۊسا بېسارانی، مەڵڵاحەسەنو دزڵیې و هەرپاسە مەڵڵاحامڎو بېسارانی جە شارو سۆڵاوای، قەڎرگېرتەی جە پېشکسوتا مامۊسا جلال هەرسینی و فەرەیدون بارامی جە شارو سوڵاوای. بەڕاوەبەردەی جەشنەو نۆروزی بە شیویەی فەرهەنگی جە شارەدەگاو بېسارانی (3گلی)، شییان، سەرهویە، ساڵیان. بە ڕاوە بەردەی ئەوەڵین جەشنەو شاڎی زاڕوڵاو هۆرامی و هەرپاسە ئەوەڵین هەمایشو داستانەی هۆرامی پەی زاڕوڵا و جوانا هۆرامی جە شارو سنەی. پەردەلادای جە کتېبو (1984)ی هۊرگېڵنای ڕەحیم غۆڵامویسی جە شارو سنەی. بەشداری بە یاگە جە تەمامو ئەرەنیشتاکا جە شارو سنەی کە بە هۆرامی زوانی پېوەڼیش بییەبۊ. بە ڕاوە بەردەی پاییزە یاڎو مامۊسا بېسارانی جە سینما بەهمەنو شارو سنەی و هەرپاسە بەڕاوە بەردەی ئەوەڵین یادوارەو مامۊسا بېسارانی جە سەرو گڵکۆ مامۊسای جە سەرو مەزارو پیر هەژاری جە شارو سەوڵاوای.
هەرمانەو ئەنجومەنی ئیسەیچ هەر بەردەوامەن و بە شېوازی نۊعین خەریکو خزمەتگوزاری بە زوان ئەدەبیاتو جە یەک کلام فەرهەنگۆ هۆرامی زوانین جە سەراسەرو دنیاینە.
هەر چی ڕاسا و پەی ئاشنای چەنی ئەدەبییات جەهانی ڕۊمانو (1984)یم بە هۆرامی هۆرگېڵناوە بە ویمانە و ئیشەڵڵا جە ئایندەنە بو بە بنەمایە پەی وەسڵ بییەی بە دەیتای هۊشی مەسنەوعی و پەی هەتا هەتای زوانەکەیما پاریزنۊ.
ڕەحیم غوڵام وەیسی، پېسە تەمامو نویسەر و شاعېرو ئەدیبە هۆرامییەکا جە وەرکۆتو کورڎەسانی پېوەرە جونبوشێ توکمەو تڼ و توڵشا ڕا وستەن بە مەرامو زیڼەکەردەیۆ و پارېزنای زوان و فەرهەنگی هۆرامی، پەی گېڵنایۆ ئا زوانە دۊڵمەڼە پەڕ واچەیە پەی سەردەمە تەڵایینەکەو وېش، کە سەردەمانێ زوانی یۊگېرتەو بەشێ فرەو خەڵکو سەرزەمینو کوردەواری بییەن. ئی نویسەرە هەر زوو ئاوەزی فەرهەنگیش جماو یاوانە کە یەکەم هەنگامەی ئېژێ ئانېنە هەکە پەی ژیونایۆ زوان و کەلتوورەکەیش بنیۊش، پەوکەی بەبې ماڼیای قۊڵېش هورماڵێ و خزانە چېرو ئا بارە قورسەیەو تاکو ئیسەیچ سەرەمڕە ئینا خزمەتشەنە.
ئەسعەد ڕەشید.[1]