وەرکۆتۆ تاکو وەرنیشت ئاماڎەبییەی و نامڎاری ژەنې
دلې ڕۊمانەو سیاوڕېحانەینە
ئاماڎەکەرڎەی و لوایۆپۊرەی: ئەسعەد ڕەشید
بەشو هەشتۆمی
ئەدەب کە باڵاجامو کۊمەڵگەیا وردو درشتو ئەرستەو نیشتەو ئینسانی و ویرۆ کەرڎەی و فاڕیای ژیوای نیشان مڎۊنە و وزۆشۆ سارا جە ڕاو داستان و ڕازێوە کەنویسەر دەسش پەی بەرۊ شوناسی حەقەتینش زوانا و نویسەر دما بەشەو ڕۊمانێنە بەزەریفی سەرو زوانو سامانیوە زوانی ئەڎایش بەگرنگ وەسف کەرۊ، ئارۊ وینمێ جە ڕاو کۊچ کەرڎەی ، ئاوارەبییەی، جەنگ ، بېکاری و نادادی، خۆڵک ناچاربۆ وڵاتو وېش جېیامازۊ ملۊ پەی دوورتەرین و وڵاتەکا تەری و فاڕیایی مێ ملو ئەندێشە و ئەرەستەو نیشتەیشرە . نویسەر مسڕا چانەیە بە گرڎیما مواچۆ مەکریۊ شوناسو وېما بەکەم و هیچ تەماشە بکەرمې کە یۊ چانیشا زوانا.
- یاگېوەنە سامان ماچۊ زوان و ئېمەی هۆرامی وەشیەکەش ئاڼ بېجگەم وېما کەس مەیاوۊمانە!
- ژەنەکەیش ماچۊ دڵوەشیتا ئاڼ کەس مەیا وۆ تانە؟!
دەی پەوکەی زوانەکەتا جە دەگاکې وېتا نەلان بەر!
- سامان ماچۊ زوانەکەو ئېمە جە زوانە ئنگلیسیەکەو شمە ، قەڎیمی تەرا!
خەم واردەی نویسەری دماو چل ساڵا پەی زوانەکەیش کە هۆرامیا سەرو زوان و پاڵەواناکەیشۆ کە چەنی ژەنەکیش کەوتێنێ واتو واچ پێوەرە ماچۊ پا کەسا کە ئیسە ئینێ چا وڵاتانە هۊشتا جە زوانەکەیتا بۊ .
پەرس وجۊ دلې ئی ڕۊمانێنە ئە شقا و سۊتەیا پەیش کە هەردوې ڕەگەزەکە حەولیش پەی مڎان وەلې قۆمیایەکا پېچەوانە گناوەو با بایسو ئانەی هەرپېسە خېیاڵێوە مەنۊ و نەیاوۊ مەنزڵە ...
وینگەو ڕازواچی یام کەسایەتی و کارائەکتەرەکا کە گەرەکشانە چېش بواچا؟ نویسەر زوومش وستەن سەر تاکو ئېمەی وانەری فڕەبۊنە دلې سەرسامی ویرۆ کەردیۊ ئا تەجروبە تاڵەی جەژیوایێەنە چەشتنشا و گەرەکشانە بەئېمە بواچا ئېمە کەرڎەبۆ شمە نەخەڵتیەدێ بلدێ ڕاو چەوت و چەوێڵو ئېمەرە
پەشیمانی ( برهان )ی جە ئاخرو ئۆخرو ڕۊمانێنە ئیشارەتش پەنە کریان . گېڵایۊ بەشەری پەی ( بییە ی ) تەکنای تەپوتۆزو قین جەدڵی و وێ ڕنێیرە جە خراپەی یەکەمین کار ئانەنە ئەشۆ هەریۆ جە ئېمە ئیسەو لای بەئازایەتی و چەم نەترسیوە خودو وېما بنیشینمېرە و دادگایش بکەرمې ، تاکو تەجاوز نەکەرڎەی جە حەق و خۆڵکی تەری جە وېما قەڎغە کەرمې تاکو وەشی و ئاشتی گېڵۆوە پەی ژیوگاو بەشەریەتی .
ئینەیچ کەمرۊڤ بتاو وینگێوە چامنەشە بۊ مشۊ دۆڵەتێوە ئەرەمەرزیا بۊ سەرو ئەساس و جاڕنامەو مافەکاو مرۊڤی کار بکەرۊنە و حەق و یەکسانی و فەراهەم کەرڎەی شانس و زانشت و پەروەرنای پەی خۆڵکو ئا وڵاتەیە بە یاساو ئەرەمەرزاییش بکەرۊنە تاکو گرڎ تاکێوە هەر کە جە ئەڎابۆ بە مافە مەدەنی و تاککەسی و گرڎینەکا مۆ چیۆنە و بزانۆ هەقوو ماف وېش کامەنە و هەقوو کەسی وەرانوەریش چېشا ، تاکو زات و ئانیش نەبۊ هیچ هەقێوە پاشێل بکەرۊ . هەر پیسە واتم چاوەڵ، کارئەکتەرێکې ئۆروپانە وەرنیشتەنە پېسەو وانەری هەست کەرمې بڕێوە جە فەرهەنگ و کۆلتورو وېشا فڕەدان و وېشا ڕەنیەنەرە جە نۆرمە پیاسالاریەکەو وەرکۆتی. بەشێ جە پەیلواکانو نویسەر عەبدولڕەحیم سەعید گوڵکاری جە بارەو دۆرو ژەنې هۆرامیې دلې ڕۊمانەو سیاوڕېحانەینە. [1]