چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و حەفتا و نۊهەمە
منیچ واتم: بازەش، ماڕۊچش هەر پېڎاش مەکەروە.
کەسێ جە کوېسانۆ بیاوۊ بەغڎا و نەخوازەڵڵا هامن بۊ، واوەیلان. مەعسوومە جە گەرمایې پېسە بەچە مریچڵەی هەر دەم دېوە یۊی؛ فرەم بەزەیی ئېوە پۊرە. ساڵەی دمایینە چەنی یانەو عەبدوڵڵا عەلی کانیمارانی، هامنې لوایمې شەقڵاوې. باخێما بە نامې (کانی گڕوو) بە میوەکەیشۆ بە چواردە دینارې گېرت و وېما جە گەرماو هامنی ڕزگارکەرد. دماییچ چەنی گەرمای عادەتش گېرت و واچې یانەو وېم جیانمازو. هامنو ساڵەو (1955)ینە، زاروڵێ تەرما جە شەقڵاوې ئاماپېڎا، نامېمان نییا (ئاگری) کە ئیسە نامېش مسەفان.
سەرنام: سیلەکەم سەرش هورداوە
چڼێ یانەو شۆکەتې مەنیمێ. یەحیا چڕوستانییەکە کە واتم چەنی حەمەڕەشیڎ خانی، جە بەغڎا (ئیمام تابوور)، بە زەمابەڼی (ئا زەمانە کە بە شەرتەو ئانەی کناچېشا دان پەنە، یانەو هەسورەیش مەنۊوە و نیشتەجابۊن)، چاگە مەژیوې. ڕوێشا چەمش بە کتېبو (دایک)ی، هینو (ماکسیم گورکی) کۆتەبې، وەنەم کۆتەبې بۊڵەبۊڵ.
یانەم فاڕاوە، چەنی وریا عەلی، کە ئا دەمە ژەنیش ئاردېبې، یانێوەمان جە (فەزەوت عەرەب) گېرت. نەوەشی سیلەکەیم سەرش هورداوە وەنەم؛ دلې نەوەشخانەو (توێسەی) وەرکۆتو بەغڎای کۆتا. نەوەشخانە دوې تەبەقې بې، زیاتەر جە دە ساڵۆنې درېژېش پەی نەوەشا چەنەبېنې؛ کە بە عەرەبی پەنەش ماچان (قاوش). هەر قاوشێ ویس تەختېش چەنەبېنې، دەوا و دەرمانو واردەش عال بې. تەنیا فەرقێش چەنی لبنانی ئانەبې نامې نەوانېنێ، ژمارەو تەختەکەی چڕېنې: (ژمارە نۊ چەنی ژمارە ششی بەیدې). کتېبێم واناوە: (یادداشتی کەروێشک_ یاڎنامەو پەلەپای). پەلەپایچ (هۆرېشەیچ) دلې کەشتینە فەرماوابېش ئاژەڵ نەمەنیمې، بییەیمې ژمارە و سەرو مازیماوە نویسیابې، نەوەشەکې هامقاوشیم یاونێنە، پەسیناشان کە یۊترینی بە ژمارە بچڕمېن، ئیتر تاکو چاگە بېنا (عەزیز) بییەبې بە ژمارە نۊ، بېجگە کتېب وانایۆ، بېسەوادە عەرەبەکایچ دەرس مەڎېنا، دوېشام فېرې وانایۆ کەردې. واتشان مەڵڵێوە کورد ئینا تەبەقو دوېنە نەوەشەن.
پەنەم وات: مامۊسا منیچ کوردەنان، گەر هەرمانێت پەنەم بییە..
ماچۊ: برا، دامە مەزانی؟
واتم: کەمێ.
وردە تەوەنی و دامەش دلې تاقو پەشتەو سەرەیشەنە بەرئارد.
ماچۊ: تۊ کەیفت بە شېعرە کورڎیا مێ؟
واتم: بەڵې، نالیم فرە وەشمسیۊ.
ماچۊ: ئۊخەی، من شۊنەو کەسێ پېسە تۊرە مەگېڵېنا!
دیوانێ نالیش چېرو سەرینگاکېشەنە بەرئارد کە بە خەت نویسیابێ. ئا پییا چل ساڵې بې خەریکو ساقکەردەیۆ شېعرەکانو نالی بې؛ حاشیەی فرەش چەنە نویستېبېنې. بەڕاسی دلې نالیزانانە وېنەم نەڎیەن. گرڎ ڕوێ لوېنمې قوژبنێ و بە شېعرەکانو نالییۆ خەریکې بېنمې. نامېش (مەلا محەممەڎی چڕوستانی) و تاتەو یەحیاکەی بې. نالیێ ئاڎیم بە خەتو وېم نویستۆ؛ چەنی داخې، دمایی چەنەم دزیا.
برادەرې فرې ئېنې پەی سەردایم، ڕوێشا مەلا شوکور ، کە ئا دەمە بییەبې دەبیر و کەیفش ساز بې، واتش: حېزبو پارتی واتەن یەرې دینارې بڎە! کۊمەکو هەژاری مەکەرمېن؛ واتەنم با جە وېش بپەرسو. زانام گەرەکشەن منەتبارم بکەرۊن.
منیچ واتم: نا مەلا گیان! نەکەری بڎەیشان پەنە! دڵم وەش کەرد.
نەوەشیەکەمەنە زاروڵەکېم ناچارې بیېبېنې یانە بفاڕاوە پەی یانە قۆمێ ئاشنایم، کە محەممەڎی ئیمامی بې. هۊڎێوەشا بەکرې گېرتەبې جە ئەحمەڎ نامێ. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]