پەی موحەمەڎ ئەمینی، کوڕە نازارەکەو حاجی حەمەمراڎی و مەتی خاتوونې
ئەوەڵین ڕۊو پاییزوو ساڵەو 1330 چا ساتەنە گەڵاو دارا حەوت ڕەنگې گېڵا بې و یۊیۆ گنێنێ باوەشۊ خاکی و تەقەو شەنیەرا چنی ناڵەو وەزا تێکەڵ بیەبێ دەگاو زاوەریەنە خوڎا کوڕێوی نازارش خەڵاتوو حاجی حەمەمراڎ و مەتی خاتوونېوە کەرڎ.
نامېشا نیا؛ موحەممەڎ ئەمین.
دەرسی سەرەتاییش وانگاو زاوەریەنە وانا بەڵام ڕۊحی بەرزەفڕش دایېمە هانەقەڵەوا باڵێ کەرېوە و دۆڵانا و داڵانی و قولەو تەختی سێرانگاو ڕۊحیش بېنێ. ویر و ئاوەز و هۊشش به کەم وانای قەناعەتشا نەکەرڎ و پاوە و کرماشانەنە بە هەزاران هەزار مەینەتێ و دوورەوەڵاتی و شەو نەوتەیێ به هێممەتی بەرزش بی به موهەندێس.
ساڵەو 1371ی شېرکەتوو ئەورامان غەربیش بینا نیا.
هەرپاسه که ئەڎاش و تاتەش پەروەرنا بېشا پیایێوی خوڎائەژناس و دوور جه کێبر و ڕیای بې و به پاو ئانەی دەسەڵاتش فره بېیەبێ بەڵام ئەخلاقش خاکی بې و وېش سەرتەر جه کەسی نەزانې.
مەدرەک و دەسەڵات نەتاواشا زاتی پاکیش شەرمەندەو دین و ئیمانیش کەرا.
ماچا پیا ئەر ژەنیش وەرەچەمتەنگە بۊ نمەتاوۊ خەیر و خەیرات کەرۊ، خاتوو حەسیبه هامبەشەو ژیوایش بې و ئاڎیچە خوڎائەژناسە و خەیرخوازه بې و هامشانوو یۊی تاواشا پەنج کوڕێ و کناچێوە پېسەو وېشا پەروەرنا که جه ڕای ڕاسەو ئەڎا و تاتەیشانە دوورێ نەگناوە.
وەشا ئەر هامدەمت بۊ هاندەروو تۊ
وەشی و تەنگانه وینۆ و هامسەفەر بۊ
کەسی ماڵش نەبەردەن قەبره پەی وېش
وەشا ماڵ ئەر شەوەو قەبرێ کەرۊ ڕۊ
به داخەوە ڕۊو 22 کەڵەهەرزوو 1375 دڵی گۆرەش پەی هەمیشەی مدرا و ڕۊحی بەرزش جەسەی خاکیش باوەشۊ ئەڎاو خاکیەنە جیا ئاست، بەڵام وەڵتەرش ڕایێوەش وەشە کەردێبێ هەکە پەی هەتاهەتایی کۊره نەبۊوە.
بەڵې موهەندێس وەتەندوستی نەمر و خاتوو حەسیبە به پەروەردە کەردەی شش زارۆڵا تاواشا نامېشا دلې کۊمەڵگایەنە بەرزتەره کەراوه و مایەو شانازی با پەی وەتەنی و پەی قەوم و بېگانەی.
سەفاو دنیای کەسی تا سەر نەبەردەن
هەزار وەشڵەی به ئانەی خاس ویەردەن
کەسێو ژیوان به سەربەرزی و به پاکی
جەسەش دریۆ به خاکی وېش نەمەردەن
ڕۆحش شاڎ و یاڎش سەوز و ماواش بەهەشت بۊ
تاقمەو فەرهەنگ و ئەدەبووزاوەری.
شوعەیب خودامورادی. [1]