کورد دلې چەرخەکا تاریخینە
هۊرگېڵنای و ئاماڎەکەرڎەی: ئەسعەد ڕەشید
بەشەی پەڼج سەڎ و دیاڼزەهەمە
* تاریخو (23-02-1995ز.) قۊمیای جەنگێ میانو یەکیەتی نیشتیمانی کورڎەسانی و پارتو دیموکراتو کورڎەسانی دلې شارو هۆلېری و کوشییای نزیکەو (100) سەڎ کەسا.
* تاریخو (23-02-1995ز.) دکتور ئەحمەڎ ئەبدولقاڎر، سەردارو کۊمەڵەو وەرگیری مافو مروڤی جە کوردەسان، مەڵبەندو نەمسای، نامێوەش ئاراسەو سەرکۊمارو فینلاندی (مارتی ئاهاتیساری) کەردە، تاکو فینلاند ڕا بە کۊنگرەو نیشتیمانی کورڎەسانی بڎۊن چاگە ببەسیۊن.
* تاریخو (23-02-1995ز.) تورکیا داواش جە پارتی و یەکیەتی کەردە کە جەنگەکەی مدرنان، تاکو ئیتر خەڵک نەکوشیۊ و شارو هۆلېریچ وېران نەبۊن.
* تاریخو (25-02-1995ز.) ڕۊنامەو ئیداگی سویدی باسو عومەرو سەی عەلی و سالار عەزیزیش پېسە تۊمەرباری جەنگی کەرد، ئا دوە کەسە هەردوېشان ئەندامې سەرداری یەکیەتی بېنې و ڕەگەزنامەی سویدیشان هەن.
* تاریخو (26-02-1995ز.) ئارۊ شش بنکې گەشت و گوزاری ترکی دلې هەر دوە شارەکانو بەرلین و بۆنی ئەڵمانی، جە لاو لاگیرەکانو پەکەکەی پەلامارە دریێ، بەڵام کەس زامڎار نەبی.
* تاریخو (27-02-1995ز.) تەقایۆ ماشینێ (مین چنیای) بە (200) دوەسەڎ کیلوې تی. ئێن. دلې شارو زاخۊی، کە نزیکەو (75) حەفتاو پەنج کەسې کوشیێ و خەڵکێ فرېچ زامڎارې بیې. ماشینەکە ژمارەکەش هۆلېر بې، پەوکەی پارتی ماچۊ یەکیەتی بییەن و یەکیەتیچ ماچۊ ڕژېمو ئېراقی بییەن، پەکەکەیچ نیاش ملو تورکیای.
* تاریخو (00-03-1995ز.) پۊرەماڵای چەکداری هېزەکانو یەکیەتی نیشتیمانی کورڎەسانی و ڕژېمو ئېراقی جە ناوچەو هۆلېری.
* تاریخو (00-03-1995ز.) سلېمان دێمرێل یاوناش: کە ویلایەتو موسڵی مەگېڵۊوە پەی ترکیای.
* تاریخو (03-03-1995ز.) هۊتەرەو ڕژېمو ئېراقی پەی سەرو ناوچەو چەمچەماڵی.
* تاریخو (05-03-1995ز.) کۊمسیۆنو ئۆروپای یۊگېریتە، بڕیارەش دا کە کاندیداتۆرو داگیرکاری ترکی دلې یەکیەتی ئۆروپاینە پەسینۊ.
* تاریخو (05-03-1995ز.) کۊمەڵەو هامکاری جە ئەڵمانیا، بانگەوازێش سەرو تیرورکەردەی ئەندامانو حېزبو دیموکراتو کوردەسانو ئېرانی دلې پانیشتو کورڎەسانینە وەڵاکەردۆ.
* تاریخو (07-03-1995ز.) کوشییای (ئادور خۆشابا ئیشۆ)ی بە دەسو چن چەکدارێ، نامبریا ئاشوریێ ناوچەو بادینانی بې، کوشتەیش بی بە مایې ناڕەزایی ئاشوورییەکا جە کوردی، شایانو باسین تۊمەتبارې ئی هەرمانې، وەرېدریێ.
* تاریخو (08-03-1995ز.) عومەر. ف. قەرەنی، وەرپەرسیارو ئۆروپاو پارتی ئیسلامی کورڎەسانی، نامێوەش ئاراسەو سەرکۊمارو فینلاندی کەردە، پەی ئانەی ڕابڎان کە کۊنگرەو نیشتیمانی کورڎەسانی چاگە ببەسیۊن.
* تاریخو (09-03-1995ز.) هونەرکاری وېنەکېش عەزیز سەلیم ئەحمەڎ، بی بە پەنابەر جە فینلاند.
* تاریخو (13-03-1995ز.) تیرور کەردەی مامۊساو زانکۊی سەلاح هۆرامی دلې شارو هۆلېرینە.
* تاریخو (13-03-1995ز.) سیروان سۆرانی، وەرپەرسو کۊمیتەو ئاشتی و پەشتگیری نیشتیمانی کورڎەسانی جە فەڕەنسا، نامێوەش ئاراسەو (جاک سانتیخ)ی سەردارو کومسیۊنو ئۆروپای یۊگېرتەی کەردە، کە دلېشەنە ڕەخنېش جە بڕیارەو وەرگېرتەی ترکیای پەی دلې یەکیەتی ئۆروپای گېرتە.
* تاریخو (15-03-1995ز.) کۊمیتەو ئاماڎەکەردەی کۊنگرەو نیشتیمانی کورڎەسانی، لقو فەڕەنسای و کۊمیتەو ئاشیی و پەشتگیری نیشتیمانی کورڎەسانی لقو فەڕەنسای، نامیوەش ئاراسەو سکرتېرو نەتەوە یۊگېرتەکا (پەتروس پەتروس غالی) کەردە، تاکو کیانیاو نەتەوەیۊگېرتەکا بکیانۊ پەی دلې کۊنگرەو نیشتیمانی کورڎەسانی.
* تاریخو (15-03-1995ز.) کۊمیتەو ئاماڎەکەردەی کۊنگرەو نیشتیمانی کورڎەسانی، جە فەڕەنسا، نامێوەش ئاراسەو ئەندامانو کۊڕەو ئاساییشی جەهانی کەردە، تاکو پەشتگیری وېسان جە کۊنگرەی بکەران و حۆلې ئانەی بڎان سکرتېرو نەتەوەیۊگېرتەکا ڕازی بکەران بلۊ دەمو داواکې کۊنگرەیۆ، پەی کیاستەی کیانیێوە وېش و ئاڵای کەوې نەتەوەیۊگېرتەکا پەی دلې کۊنگرەی.
بەشێ جە کتېبو هاوڕێنامەی، نویستەی #هاوڕێ باخەوان#، هۊرگېڵنای پەی سەرو زوانی هۆرامی: #ئەسعەد ڕەشید#. [1]