کورد دلې چەرخەکا تاریخینە
هۊرگېڵنای و ئاماڎەکەرڎەی: #ئەسعەد ڕەشید#
بەشەی پەڼج سەڎ و چواردەهەمە
* تاریخو (12-04-1995ز.) ئارۊ دلې هۊڵو کۊنگرېسو هۊڵەندای جە شارو لاهای، ئاڵاو ئێڕنەکی بەرزە کریاوە و دەمئەژمار (10:05) ساعبی عیسمەت شەریف وانلی، پەرلەمانو سەرنیشتو کورڎەسانیش جبەرو وڵاتیۆ کەردۆ و دماتەر هەر (65) شەس و پەڼج ئەنداماو پەرلەمانی قەسەمشان وارد. ئینجا ئەندامانو پەرلەمانو ئەڵمانیا و یۊنان و قوبرس و ئیتالیا و نەرویج موبارەکباییشان جە کوردی کەرد و قسې فرە زەریفېشان کەردې. ئەندامەکې پەرلەمانی چوارشان خەڵکو پانیشتو کورڎەسانی بېنې، بەڵام هینې وەرکۆتو کوردسانیشان دلېنە نەبېنې.
* تاریخو (13-04-1995ز.) واشنتۊن پەی کەردەیۆ بیناو پەرلەمانو کوردی، ناڕەزاییش نیشانە دا دژو هۊڵەندای، کە سەرو سنورو خاکو ئاڎیۆ کریان.
* تاریخو (14-04-1995ز.) ئەنجومەنو ئاساییشی بڕیارەو ئانەیشە بەرەکەردە کە ئېراق جە ماوەو ئی شش مانگە دماینەیەنە بایی یەک ملیار دۊلار نۆتە پەی بەری بکیانۊ، کە بە زەڕەکێش دەرمان و واردەمەنی پەی خەڵکو ئېراقی بسانۊن.
* تاریخو (15-04-1995ز.) دمای مەرزنارەی پەرلەمانو کورڎەسانی سەرو خاکو هۊڵەندای، پەرلەمانو ترکی پېوەڼی وېش چەنی پەرلەمانو هۊڵەندی پڕچنا.
* تاریخو (15-04-1995ز.) کۊمەڵێ کوردې ئەرەنیشتې هۊڵەندای و چل و یەک ڕېکوزیێ هۊڵەندیې، وېنیشاندایێشان جە شارو گرۆنینگن دژو لواینە دلې سوپاو ترکی پەی پانیشتو کورڎەسانی سازدا، کە دلې چەقو شاریرە ویەردې و فرە سەرکۆتەبې و ژمارەشان (300) یەرەسەڎ کەسێ مەبېنې. ئەوەڵۆ پۊلیس ڕازی نەبې بە سازدای ڕاپیماکەی، بەڵام دمایی ڕازیې بیې، ڕازی نەبیەیچش چانەیۆ بې کە ترکەکې ئا شارەیە هەڕەشېشا کەردېېنې.
* تاریخو (16-04-1995ز.) پاپا یۆهان پۆلسی دوەم، پەی جەژنەو فەلەکا جە ڤاتیکان، وتارێش داو دلېشەنە باسو چۆسنایۆ کوردیش کەرد.
* تاریخو (21-04-1995ز.)، شالیارو دلې و شالیارو بەرو هۊڵەندای چەنی ڕېکوزیێوە تورکی نیشتېرەو پەنەشان واتې کە تورک هەر بە ئاشتی و ئاساییش دلې هۊڵەنداینە مەنۊوە. ئا ڕېکوزیێ هەر جە دماو بانگدای پەرلەمانو کورڎەسانی کۆتېبېنې تەک و جم چەنی حکومەتو هۊڵەندی دژو کوردی.
* تاریخو (22-04-1995ز.) کۊمیتەو ئاماڎ کەردەی کۊنگرەی نیشتیمانی کورڎەسانی جە سویسرا و لیژنەو کۊمیتەو ئاشتی و پەشتگیری نیشتیمانی کورڎەسانی جە سویسرا، نامێوەشان ئاراسەو سکرتېرو نەتەوە یۊگېرتەکا کەردە، تاکو کیانیێوە وېش چەنی ئاڵاو نەتەوەیۊگېرتەکا بکیانۊ پەی دلې کۊنگرەکەی.
* تاریخو (23-04-1995ز.) جە شارو لاهای پایتەختو هۊڵەندای، (20) ویس هەزار ترکې ڕەگەز پەرەسې دلې هۊڵەندای و ئەڵمانیا و بەلجیکای، ڕاپیمایێ فراوانشان دژو پەرلەمانو کورڎەسانی و پەکەکەی و حکومەتو هۊڵەندای سازدا و گرڎ دژمانی بە پەکەکەی مەڎېنې. دماتەر باڵیۊزخانەو یۊنانیشان هېڵەواران کەرد.
* تاریخو (25-04-1995ز.) یەکیەتی ئۆرووپا جە زوانو ئالان ژۆپیێ شالیارو فەڕەنسای، دژو ترکی پەشتگیری وېش پەی هۊڵەندای نیشانەدا، کە ئەنجامو مەرزنارەی پەرلەمانو کورڎەسانی دلې هۊڵەنداینە، بە دەسو کوردەکا.
* تاریخو (02-05-1995ز.) شېرکۊ جەلال و سیروان سۊرانی چەمشان بە پیر بیرسیی سەرپەرەشتو ڕېکوزیاو پارېزنای مافو مروڤی جە فەڕەنسا کۆت و باسو باری ئاڵۊزو کورڎەسانیشان پەی کەرد.
* تاریخو (06-05-1995ز.) واتە و واچو سکرتاریەتو کۊمیتەو ئاماڎەکەردەی کۊنگرەی نیشتیمانی کورڎەسانی و کیانیایاو پەرلەمانو کورڎەسانی جبەرو وڵاتیۆ دەسش پەنەکەرد. کیانیێکې پەرلەمانی پېکئامێبېنې جە: مەحمووڎ قلیچ، نیزامەدین و نەجدەت. ئەنجامەنە کۊمیتەو کۊنگرەی ئانەش داوە دما کە بلانە چېرو جڵەوەو پەرلەمانێ، کە پەی ناوچێوە کورڎەسانی هەرمانە بکەرۊن.
بەشێ جە کتېبو هاوڕێنامەی، نویستەی #هاوڕێ باخەوان#، هۊرگېڵنای پەی سەرو زوانی هۆرامی: #ئەسعەد ڕەشید#. [1]