بەڕێز/ وەزارەتی ئەوقاف وکاروباری ئاینی
بەڕێز/یەکێتی زانایانی ئاینی کوردستان
بەڕێز/ سەرجەم مامۆستایانی ئاینی کوردستان
هاوڵاتیان وجەماوەری بەشەرەفی خەڵکی کوردستان
لەژمارە 370ی هەفتەنامەی (ئاوێنە) دا، کە ڕێککەوتی 26ی ئاداری 2013 دا بڵاوبۆتەوە، بەناو "مەلا مەزهەر"ێک، کە وەک ڕۆژنامەکە دەیناسێنێت، پێشنوێژووتارخوێنە لەیەکێک لەمزگەوتەکانی شاری هەولێردا، بێڕێزی زۆر بەرامبەر بە چالاکوانانی بواری ڕێکخراوەکانی کۆمەڵگای مەدەنی و ڕێکخراوەکانی ژنان وئافرەتان دەکات لەکوردستاندا.
پێمان وایە، ئەو بەناو "مەلا مەزهەر"ە، بەر لەهەموو شتێک بێڕێزی بەرامبەر بە خودی مامۆستایانی ئاینی کوردستان دەکات، کە مامۆستایانی ئاینی بەڕێز، بەڕێزەوە لە مێژووی گەلەکەیان و چالاکوانان وکۆمەڵگای مەدەنیان ڕوانیوە، تەنانەت بەشێکی زیندووی مامۆستایانی ئاینی بەڕێز بەردەوام لەکاری مەدنیدا بوونیان هەیە، بگرە جگە لەئەرکی ئاینیان بەشێکی باشیان لەکاری مەدەنیدا چالاکوانن، تەنانەت ئەوەی ئێمە دەزانین یەکێتی زانایانی ئاینی کوردستانیش بەشێکی زیندووی کۆمەڵی مەدەنین لە هەرێمی کوردستاندا.
ئەو بێڕێزییەی بەناو "مەلا مەزهەر" لەدرێژەی بێڕێزییەکانی دیکەی دێت کە بەرلە چەند ڕۆژێک بەرامبەر بە چەژنی نەتەوەیی گەلەکەمان کردبووی. بۆیە پێمان وایە ئەم بە ناو مەلایە کە شایەنی ئەوە نیە ئەو ناوەی لێبنرێت، دەبێت هەموو لایەک هەڵوێست وەربگرن لەبەرامبەری و ئەم داواکاریانە بۆ لایەنە پەیوەندارەکان دەخەینەروو:
1-داوا لە بەڕێز وەزارەتی ئەوقاف وکاروباری ئاینی دەکەین، دەستبەجێ ڕێگە بەو بەناو مەلایە نەدات بچێتە سەر مینبەر وتارخوێنین وپێشنویژی کردن، چونکە لە ڕاستیدا شایستەی ئەو شوێنە پیرۆزە نیە.
2-داوا لە بەڕێز یەکێتی زانایانی ئاینی کوردستانی دەکەین، کە هەڵوێست لەهەمبەر ئەو بەناو مەلایە وەربگرێت و ئەگەر ئەندامی ڕێکخراوە بەڕێزەکەیانە لەریزەکانی دەریبکات، چونکە شایستەی ئەو ڕێزە نیە کە لەبواری کۆمەڵی مەدەنیدا بوونی هەبێت وبەر لەهەموو کەسێکیش بێڕێزی بەرامبەر بە ڕێکخراوەکەی ئەوان کردووە.
3-داوا لەمامۆستایانی ئاینی ومەلا بەڕێزەکانی هەموو ناوچەکانی کوردستان دەکەین، لەوتاری ڕۆژی هەینی داهاتوودا ئەو قسانەی بەناو مەلا مەزهەر ڕەتبکەنەوەبەتایبەتی ئەوانەی کە لەبارەی نەورۆزو ڕێکخراوەکانی ئافرەتان و کۆمەڵگای مەدەنییەوە کردویەتی.
ئێمە لەوکاتەی کە ئەم داواکارییانە دەخەینەروو، دەست بەهەنگاوو ڕێوشوێنی یاسایی دەکەین لەبەرامبەر ئەو بەناو مەلایە، کە بەهیچ شێوەیەک شایستەی ئەو ناوە نیە وپێویستە ئەو نازناوەی لێوەربگیرێتەوە تا ناشرینتری نەکردووە.
ئێمە ئەو ڕێوشوێنە یاساییانەی دەگرینە بەر، نەک لەوەی ئەو پێی وابێت و ڕاستییەکانی لەموسڵمانانی بەڕێز چەواشە بکات کە لەبەر حەزرەتی عومەر دەیگەیەنینە دادگا، بەڵکو لەبەر ئەوەی بێڕیزی کردووە بەرامبەر بە حەزرەتی عومەر وئاینی ئیسلام ومیللەتی کورد و چالاکوانانی کۆمەڵگای مەدەنی.
رێکخراوەکانی کۆمەڵگای مەدەنی:
1-رێکخراوی مەسەللە بۆ پەرەپێدانی توانا مرۆییەکان
2-رێکخراوی گەشەپێدانی مەدەنیەت
3-رێکخراوی هاریکار
4-رێکخراوی تواناسازی لاوانی کوردستان
5-رێکخراوی ستارت
6-رێکخراوی ئایندە بۆ پرسەکانی گەنج
7- ئەنیستتیوتی کوردستان بۆ مافەکانی مرۆڤ
8-بەرەی بەشداری خەڵک
kurdistan without genocide9-
10- سەنتەری کات بۆ هوشیاری و ڕاهێنانی لاوان
11- ڕێکخراوی باباگوڕگوڕ بۆ سامانە سروشتییەکان
12-رێکخراوی بیمە بۆ مافە ئابووری وکۆمەڵایەتییەکان
13-رێکخراوی لەگەڵ ئێوە کاردەکەین
14-رێکخراوی پەیمانگای ناتوندوتیژی کوردستان
15-گروپی گەنجانی خۆبەخش بۆ داکۆکی لە مافەکانی مرۆف
16-کۆمەڵەی هیوا
SDO-17
18-گروپی ناتوندوتیژی
19- گروپی چاودێرانی مافەکانی مرۆڤ
20-کۆڕبەندی کۆمەڵایەتی کوردستان