کاتژمێر 11ی پێش نیوەڕۆی ئەمڕۆ ڕێکەوتی #30-05-2023# سەفین دزەی بەرپرسی فەرمانگەی پەیوەندییەکانی دەرەوەی حکومەتی هەرێم و ئومێد سەباح سەرۆکی دیوانی ئەنجوومەنی وەزیران و #جوتیار عادل# وتەبێژی حکومەتی هەرێم لە شاری #هەولێر# لەگەڵ کونسوڵ و نوێنەری 36 وڵات لە هەرێم و یۆنامی کۆبوەوە. کۆبوونەوەکە لەسەر بانگهێشتی فەرمانگەی پەیوەندییەکانی دەرەوەی هەرێمە. بەڵام تەنیا نوێنەرانی پارتی لە فەرمانگەکە بەشداری دەکەن. دابان شەدەڵە جێگری سەرۆکی فەرمانگەی پەیوەندییەکانی دەرەوە و هیچ بەرپرسێکی یەکێتی بەشداری ناکات.
تیمی پارتی لە کۆبوونەوەکە هەڵوێستی پارتی لەسەر گۆڕانکارییەکانی ناو پڕۆژە یاسای بودجە و پرسی هەڵبژاردن لە هەرێم دەگەیەنێتە نوێنەری وڵاتان. [1]

نێردەی ڕێکخراوی نەتەوەیەکگرتووەکان لە عیراق (یۆنامی) بڵاویکردەوە، لەمانگی ئاداردا هەزارو 119 هاوڵاتی عیراقی کوژراون و هەزارو 561 ی تر برینداربوون. نوێنەری ئەمینداری گشتی نەتەوەیەکگرتووەکانیش نیگەرانی خۆی لەهەڵکشانی توندو تیژی لەعیراقدا دەربڕی.
یۆنامی لە بەیاننامەیەکدا کە ئەمڕۆ هەینی بڵاویکردۆتەوە و وێنەیەکی بۆ خەندان نێردراوە ئاماژەی بەوەکردووە، تەنها لەمانگی ئاداری ئەمساڵدا 575 هاوڵاتی مەدەنی کوژراون و هەزارو 196 ی تر بریندار بوون.
هەر بەپێی ئەو ئامارە، لەماوەی ئەو مانگەدا 544 کارمەندی هێزە ئەمنییەکانی عیراق (کە پێشمەرگەش خراوەتە ئەو چوارچێوەیەوە) کوژراون و 365ی تریش برینداربوون(ئامارەکە کوژراوو بریندارەکانی پرۆسە سەربازییەکانی ئەنبار)ی لەخۆنەگرتووە.
ئەوەش لەکاتێکدا دێت بەپێی ئامارێکی پێشووتری یۆنامی لەمانگی شوبات-ی ئەمساڵدا 670 کەس کوژرابوون و هەزارو 290 کەسی تریش بریندار بوون.
بەراورد بە ساڵی 2015 ژمارەی کوژراوەکان لەعیراقدا کەمیانکردووە بەڵام بریندارەکان زیادیان کردووە بەجۆرێک لەمانگی ئاداری ساڵی ڕابردوودا 997 کەس کوژرابوون و 2 هەزارو 172 کەسی تر برینداربوون وەک یۆنامی لەئامارێکدا بڵاویکردبۆوە.
یان کۆبیش نوێنەری تایبەتی ئەمینداری گشتی نەتەوە یەکگرتووەکان لەعیراق لەلێدوانێکدا نیگەرانی خۆی بەرامبەر هەڵکشانی توندتیژییەکانی عیراق بەهۆی تیرۆر و کردەی چەکداری دەبڕی و ڕایگەیاند:" جێی قبوڵکردن نییە هاوڵاتیانی مەدەنی باجی ئاکامەکانی توندو تیژی بدەن، لەهەمان کاتدا هیوای خواست چاکسازییە پێشنیارکراوەکان بچنە بواری جێبەجێکردنەوە و ببنە هۆکارێک بۆ گەڕانەوەی ژیانی ئاسایی لەم وڵاتەدا.
وەک لەئامارەکەی یۆنامی-دا دەردەکەوێت، شاری بەغدا زیانلێکەوتووی سەرەکی توندو تیژییەکانی مانگی ڕابردوو بووە، بەجۆرێک (259 کەس کوژراون و 770ی تر بریندار بوون) دوای ئەویش پارێزگای نەینەوا بەپلەی دووەم دێت بە (133 کوژراو و 89 بریندار)، پارێزگای بابل-یش لەپلەی سێیەمدا هاتووە بە (65 کوژراوو 57 بریندار) دواتر پارێزگای کەرکووک دێت بە (34 کوژراو و57 بریندار) دوای ئەویش پارێزگای دیالە بە 11 کوژراوو سەڵاحەدین بە 6 کوژراو بریندارێک دێن.
بەپێی ئەو زانیاریانەش کە یۆنامی لەبەڕێوەبەرایەتی تەندروستی پارێزگای ئەنبار دەستی کەوتووە تا ڕۆژی 30ی ئادار 64 کەس لەو پارێزگایەدا کوژراون و 137ی تریش برینداربوون.
یۆنامی ئەوەشی ڕوونکردۆتەوە ئەو ئامارانەی لەئەنبار-ەوە بەدەستی گەیشتوون تەنها پێی ڕاگەیەندراوە و لەلایەن خودی نێردەکەوە پشتڕاست نەکراوەتەوە بەهۆی ئەوەی نەیتوانیوە وەک پێویست و لەبەر ئاڵۆزی بارودۆخەکە لێکۆڵینەوەو بەدواداچوونەکانی لەو پارێزگایەدا ئەنجام بدات.
- 01-04-2016

ەیامی پیرۆزبایی نەورۆزی خات,و جینین هێنیس پلاسخارت، نوێنەری سکرتێری گشتی #نەتەوە یەکگرتووەکان# بۆ عیراق، بۆ تەواوی خەڵکی عیراق و هەرێمی کوردستان.
نەورۆز ئه و کاتەیە کە خەڵکانێکی زۆر لەسەرتاسەری جیهاندا هیواکانیان لە یەکەم ڕۆژی وەرزی بەهاردا تازە دەکەنەوە و ئاهەنگی کەلتوری و نەتەوەیی دەگێڕن.
رۆژی جیهانیی نەورۆز لەلایەن نەتەوە یەکگرتووەکانەوە لەساڵی 2010 وە دانی پێدانراوە بۆ گەشەدان بە بەهاکانی ئاشتی و هاوپشتی لە نێوان نەوە و کۆمەڵگا و هەرێمەکاندا.
بەم بۆنەوە من بە ناوی خانەوادەی نەتەوە یەکگرتووەکان لە عیراق هیوای نەورۆزیکێ خۆش و ئاسوودەتان بۆ دەخوازم و زۆریش هیوادارم کە گیانی نەورۆز بەردەوام ببێتە مایەی نەهێشتنی ناکۆکیەکان لە پێناو گەشەدان بە هەستی متمانە و شانازی لە وڵاتدا.
لەلایەکی تریشەوە، عیراق بۆ ئەوەی بتوانێت بەهێزتر سەرلەنوێ هەڵسێتەوه پێویستی بە تازەکردنەوەی گیانی نیشتمانپەروەری هەیە.
نەورۆز پیرۆز بێت..
#20-03-2019#

رۆژی 12ی کانوونی یەکەمی 2017 تیمێکی نوسینگەی مافی مرۆڤی نێردەی #نەتەوە یەکگرتووەکان# بۆ هاریکاری عیراق (#یۆنامی#) لە بەرواری 7ی کانوونی یەکەمی 2017دا سەردانی #خورماتوو#یان لە پارێزگای سەلاحەدین کرد بەمەبەستی لێکۆڵینەوە لەو ڕاپۆرتانەی کە باس لە ڕووخاندنی سزائاسای موڵکی دانیشتووانی ئەو شارە دەکات. ئەوانەی کە بەهۆی پێکدادانەکان لەو ناوچەیە لە مانگی تشرینی یەکەمەوە ئاوارەبوون و هەروەها ڕاپۆرتی تۆقاندن وەک ڕێگرییەک لەبەردەم گەڕانەوەی ئاوارەکان بۆ سەر ماڵ و حاڵی خۆیان بە سەلامەتی.
ئەو سەردانە لە دەرنجامی دووبارەبوونەوەی ئە ڕاپۆرتانە و ڕاپۆرتی دیکە دێت کە هاووڵاتییانی مەدەنی بە شێوەی جیاکاری کراونەتە ئامانج و وەدەرنانی بەزۆر و ڕووخاندنی موڵک لە پێش 16ی تشرینی یەکەمی 2017 بەشێوەیەکی بەرچاویش لە دوای ئەو بەروارە، کە یۆنامیش لە بەرواری 19ی تشرینی یەکەمدا لە ڕاگەیاندراوێکیدا ئاماژەی پێکردبوو لەنێوان چەند بابەتی تریشدا. لەو ڕاگەیاندراوە و لە کورتە ڕاپۆرتەکەی بەڕێز یان کوبیش، نوێنەری تایبەتی سکرتێری گشتی نەتەوە یەکگرتووەکان بۆ عێراق، بۆ ئەنجوومەنی ئاسایشی نەتەوە یەکگرتووەکان لە نیویۆرک لە بەرواری 22ی تشرینی دووەمدا هاتووە، کە بەگوێرەی ڕاپۆرتەکان بەلانی کەم 150 خانووی تورکمان و کوردان سوتێندراون و ڕاپۆرتی دیکەش دەربارەی کردەی تووندوتیژی خراونەتەڕوو. هەروەها نەتەوە یەکگرتووەکان نیگەرانی خۆی دەربارەی پێکدادانەکان لەو شارە دەربڕی کە بوونەتە هۆی کەوتنەوەی قوربانی و شەپۆڵێکی تری ئاوارەبوون بەتایبەتی لەنێو دانیشتووە کوردەکان.
لە میانەی سەردانەکەی خورماتوو لە هەفتەی ڕابردوودا، تیمەکەی یۆنامی سەردانی چەندان ناوچەی شارەکەیان کردووە و کۆبوونەوەیان لەگەڵ ژمارەیەک لە کاربەدەستانی ئەو شارە ئەنجامداوە. بەهەمان شێوە کارمەندانی یۆنامی لە هەولێریش چاویان کەوتووە بە ژمارەیەک لە نوێنەرانی ئاوارەکانی خورماتوو و گوێیان بۆ کارەساتەکانیان لەژێر ڕکێفی ئەو هێرشانە گرتووە. وابڕیارە نێردەیەکی دیکەی یۆنامی بۆ شاری خورماتوو لە چەند ڕۆژی داهاتوودا سەردانی چەند ناوچەیەکی دیکەی ئەو شارە بکەن بە مەبەستی لیکۆڵینەوە لەو ناوچانەی کە بەگوێرەی ڕاپۆرتی ئاوارەکانی ئەو شارە پێشێلکاری تێدا کراوە.
هەروەها یۆنامی نیگەرانی خۆی دەربارەی هێرشە هەڕەمەکییەکانی ئەم دواییە دەردەبڕێت کە بوونەتە هۆی کەوتنەوەی زیانی گەورە بە کەوتنەوەی قوربانی مەدەنیشەوە لەنێو کۆمەڵگەی تورکمانی ئەو شارە و پاشانیش بە کردەی تۆڵەسەندنەوە ئەو هێرشانە وەڵامدراونەتەوە. یۆنامی داوا دەکات دەستبەجێ ئەو کارانە ڕابگیرێن کە مەترسی دەخەنە سەر ئاسایش و سەلامەتی کۆمەڵگەی کوردی و تورکمانی و دانیشتووانی ئەو ناوچەیە.
بەهەمان شێوەش، یۆنامی داوا لە حکومەتی عێراق دەکات بۆ گرتنەبەری هەموو ڕێوشوێنێک بۆ کۆتاییهێنان بە تووندوتیژییەکان و پێشێلکاری لە دژی مافەکانی مرۆڤ و چەسپاندنی یاسا و هێنانەدی هێمنی و سەقامگیری لە خورماتوو و ئاسانکاری بکات بۆ گەڕانەوەی ئاوارەکان و گێڕانەوەی بارودۆخی ئاسایی ئەو شارە و کۆمەڵگەکەی. ​
#12-12-2017#

نێردەی نەتەوە یەکگرتووەکان لە عێراق- #یۆنامی#، بە بڵاوکردنەوەی ڕاپۆرتێک پێشێلکارییەکانی #حەشدی شەعبی#ی لە #خورماتوو# خستەڕوو و ڕایگەیاند، کە هەزار و 440 خێزان لە خورماتوو ئاوارەبوون پاش هێرشی هێزەکانی حەشدی شەعبی بۆ ئەو شارۆچکەیە.
دوێنێ نێردەی نەتەوە یەکگرتووەکان لە عێراق ڕاپۆرتێکی بڵاوکردەوە و تێیدا ئاشکرایکرد، کە لە پاش هێرشی حەشدی شەعبی بۆ سەر خورماتو لە ڕۆژەکانی 16 و 17ی ئۆکتۆبەردا، دەیان ماڵی هاوڵاتیانی کورد سووتێندران و ڕووخێندران.
لە ڕاپۆرتەکەی یۆنامی دا هاتووە: خەڵکێکی زۆری کوردی دوزخورماتوو ئاوارەبوون و لە پارێزگەکانی #کەرکووک# و #سلێمانی# و #هەولێر# جێگربوون، ‎زۆربەی وێرانکارییەکان دوای چۆڵکردنی شارەکە بووە، بە تایبەتی ئەوانەی سەر بە پارتە کوردیەکان بوون هەڕەشە و مەترسی زیاتریان لەسەر بووە.
ئەوەش ئاشکراکراوە: بە پشتبەستن بە دامەزراوەی کۆچی نێودەوڵەتی ئاشکرا کراوە، کە 1440 خێزانی کورد ئاوارە بوون‌، کە لەوان تەنیا 444 خێزان گەڕاونەتەوە و ئەوانەشی نەگەڕاونەتەوە بە نەتەوەیەکگرتووەکانیان ڕاگایەندووە، هیچ گەرەننتییەک نییە کە ژیانیان پارێزراو دە‌بێت و دەترسن بکرێنە ئامانج و تا کێشەکان چارەسەر نەکرێن ناگەڕێنەوە.
یۆنامی لە سەر زاری یەکێک لەو ئاوارانە ڕایگەیاندووە، کە هەڕەشە لە سەر گەڕەکە کوردنشینەکان هەیە و جموجوڵی سەربازییان تێدا دەکرێت.
هەروەها ڕایگەیەندراوە: لە گەڕەکی جومهوری 29 ماڵ و لە گەڕەکی جەمیلە 11 ماڵ وێران کراون، کە هەر دوو گەڕەکەکە کوردنشین بوون.[1]
#24-12-2017#

بەگوێرەی ئاماری قوربانیانی تەقینەوه و کردەوە توندوتیژییەکانی چوار مانگی ڕابردوی عێراق، ڕۆژانە (31) کەس دەکوژرێت و (70) کەسیش بریندار دەبێ.
ئاوێنە نیوز، سایتی کل العراق: نێردەی عێراقی ڕێکخراوی نەتەوە یەکگرتوەکان -یۆنامی- ئاشکرای دەکات بەهۆی تەقینەوه و کردەوە توندوتیژییەکانی عێراقەوە، لەمانگی تەموزی ڕابردودا (3383) هاوڵاتی بونەتە قوربانی، لەمانگی ئابدا (2834) کەس و لەئەیلولدا (3112) کەس و لەتشرینی یەکەمیشدا (2881) کەس بونەتە قوربانی.
یۆنامی ئاماژە بەوەدەکات لەمانگی تەموزدا (1058) کەس و لەئابدا (804) کەس و لەئەیلولدا (979) کەس و لەتشرینی یەکەمیشدا (979) کەس کوژراون. سەبارەت بەژمارەی ئەو کەسانەشی بریندار بون، یۆنامی ڕایدەگەیەنێت لەمانگی تەموزدا (2326) کەس و لەئابدا (2030) کەس و لەئەیلولدا (2133) کەس و لەتشرینی یەکەمیشدا (1902) کەس برینداربون.
بەگوێرەی ئامارەکەی یۆنامی، لەماوەی چوار مانگی ڕابردودا (12.210) کەس بونەتە قوربانی: (3819) کوژراوو (8391) بریندار. ئەگەر بێتو ژمارەی قوربانیان دابەشی ڕۆژەکانی ئەو چوار مانگە بکرێت، ئەوا تێکڕا لەهەر ڕۆژێکدا (101) هاوڵاتی بونەتە قوربانی، واتە ڕۆژانە (31) کەس کوژراون و (70) کەسیش برینداربون.
ئامارەکەی یۆنامی دەریدەخات لەمانگی تەموزدا (724) هاوڵاتی و لەئابدا (610) و لە ئەیلولدا (760) و لەتشرینی یەکەمیشدا (694) هاوڵاتی کوژراون، کە تێکڕا دەکاتە (2788) هاوڵاتی. هەر له و چوار مانگەدا (1031) پۆلیس و سەربازو ئەندامانی هێزە ئەمنیەکان کوژراون، بەجۆرێک لەمانگی تەموزدا (333) کەس و لەئابدا (194) کەس و لەئەیلولدا (219) کەس و لەتشرینی یەکەمیشدا (285) کەس کوژراون.
لەماوەی چوار مانگی ڕابردوی ئەمساڵدا، تەنها لەشاری بەغدا (1384) کەس کوژراون، کە دەکاتە (36%) کۆی کوژراوانی سەرجەم پارێزگاکانی عێراق. لەلایەن خۆیەوە وەزارەتی مافی مرۆڤی عێراق ئاشکرای کرد لەنێوان ساڵانی (2004 - 2013)دا (276) هەزارو (664) کەس کوژراون و بریندار بون. بەجۆرێک (68.389) کەس کوژراون، (191.810) کەس بریندار بون و (16.465) کەسیش بێسەرو شوێن بوون.
- 04-11-2013