Kurdîpêdiya - Formî tomarkirdinî babet

☰

👓 Geranî wirid ▾

👓 Geranî wirid

📕 Pertûkxane

🚼 Nawname bo mindallanî Kurd

📅 Krronolojiyay rûdawekan

🗄 Serçawekan

👣 Şiwênpêyekan

⭐ Kokirawekan

🏃 Çalakîyekan

🔍 Çon bigerêm?

💁 Hawkarîm biken!

📚 Billawkrawekanî Kurdîpêdiya

📼 Video

🌳 Dirextî polekan

🔀 Babet behellkewt

➕ Nardin ▾

➕ Nardinî babet

📷 Nardinî Wêne

📕 Nardinî Pertûk

💬 Bîrurakantan

📧 Peywendî

💡 Kurdîpêdiya çi zaniyarîyekî pêwîste!

📏 Standardekan

📏 Rêsakanî bekarhênan

✨ Kwalîtîyi babet

📷 Wêne nenasirawekan

🔧 Amrazekan ▾

💡 Derbare!

👫 Hawkaranî Kurdîpêdiya

📌 Çîman derbare witrawe!

💡 Paşerojî Kurdîpêdiya

🔗 Nawkêşkrdin le mallperrekantanda

📰 Dirûstkerî RSS

📩 Tomarkrdin / Kujandineweyi îmêll

📊 Amarî mîwanekan

📊 Amarî babet

🔡 Wergêrrî fontekan

📅 Gorrînî rêkewtekan

💳 Komekî Darayî

🏁 Ziman û şêwezimanî rûpelekan

⌨ Kîbord

🔗 Lînike pêwîstekan

🅺 Kurdipedia extension for Google Chrome

📷 Wenekari Application (PC)

🍪 Cookies

🏁 Zimanekan ▾

کوردیی ناوەڕاست

Kurdîy Nawerast - Latînî

کرمانجی - کوردیی باکوور

Kurmancî - Kurdîy Bakûr

هەورامی

English

Française

Deutsch

عربي

فارسی

Türkçe

Nederlands

Svenska

Español

Italiano

עברית

Pусский

Fins

Norsk

日本人

中国的

Հայերեն

Ελληνική

لەکی

🔑 Hejmarî min ▾

🔓 Çûnejûrewe

👫 Debime hawkartan!

🔐 Wişeyi nhênît lebîrkrduwe!

☰

🔓 Çûnejûrewe

➕ Nardin

📁 Zortir ...

📅 Emiro 07-12 le mêjûda ▾

📅	Krronolojiyay rûdawekan
📅	Rojekan
	📆	07-12-2019
	📆	06-12-2019
	📆	05-12-2019
	📆	04-12-2019
	📆	03-12-2019
	📆	02-12-2019
	📆	01-12-2019
	📂	Zortir ...
📅	07 December

	📝 Bellgenamekan
	📊 Amar u Rapirsî
	✌️ Şehîdan
	💚 Enfalkirawan
	☪ Qurbanîyi Da'ş
	😞 Q. şerî nawxo
	👩 Q. tundutîjî
	📅 Date of Birth
	📅 Date of Death

Formî tomarkirdinî babet | ناسری رەزازی

Nawy nêrer:

Îmêlî nêrer:

Nawy babet:

🏳️ Zimanî babet:

🏷️ Pol:

Dirêjey babet:

لە زمانی خۆیەوە:
من مانگی پووشپەری ساڵی (1334)ی هەتاوی، ساڵی (1955)ی زایینی، لە شاری (#سنە#)ی کوردستانی بندەستی ئێران، لە دایک بووم، جگە لە خۆم چوار برا و چوار خوشکی دیکەم هەبە، سەردەمی منداڵییم، پڕ بوو لە کێشەی زۆر، بە هۆی پێکهاتەی گەڕەکەکەمانەوە، (پیشە)ی باوکم بەرگدروو بوو، دوای خوێندن لە قوتابخانەش دەگەڕامەوە بۆ دووکان بۆ لای باوکم بۆ ئەوەی یارمەتی بدەم. دووکانی باوکم لە ناو مەیان میوەفرۆشیدا بوو، رۆژان لەبەر خەڵک و پەرژینی هەبێ، حەیوان و بار و چەرخ و داشقەی حەمباڵ و هیدیکە، ئەوەندە قەرەباڵخ و جەنجاڵ بوو، رێ نەبوو هەنگاو هەڵگری، لەو سەردەمەدا رادیۆ تەنیا لە گەورەماڵان و چایخانەکاندا هەبوو، من کە حەزم لە هونەری گۆرانیی بوو، رۆژان رووم دەکردە قاوەخانەکان بۆ ئەوەی بە هۆی گرامافۆن و رادیۆی پیلیی ئەو سەردەمەوە گوێ لە گۆرانیی گۆرانیبێژە کوردەکان بگرم.
لە تەمەنی شەش ساڵاندا لە خوێندنگەی (هەدایەت)، لە شاری سنە لە بەر خوێندنیان دانام، خوێندنیش دیارە فارسی بوو، لە پۆلی دوودا بووم، لە پەنای خوێندنگەکەماندا مەلایەکی پیری خوێنشیرین، دووکانێکی دانابوو کە قەڵەم و کاغەز و دەوات و شیرینیجاتی وەکوو (ئاودوونان و کەشکەتونە و کونجیگەزۆ و گۆچانقەن و رەحەت و کولیچە و هیدیکە)ی دەفرۆشت و دەرسی قورئانیشی دەگوتەوە.
بەڵێ باوکم دەستی گرتم و بردمی بۆ لای ئەو مەلایە و بەڵێنی لەگەڵ بەست، کە پاش تەواوبوونی خوێندن، قورئانم پێبڵێ، منیش هەرچەندە دڵکاو (راضی) نەبووم، دەستم پێکرد، جا وەرە دوو قوڕبەسەریی گەورە، بۆ منی ژێردەستی داماو، دەبوو دوو زمانی بێگانەی بە زۆر بەسەرماندا سەپێنراو بخوێنین و زمانەکەی خۆشمانیان لێ کردبووین بە قوڕقوشم و ژەقنەمووت، بۆیە ئێستاش کوردی وامان هەیە خۆی ناناسێ و نازانێ کێیە!. ئەگەر خوێندن تەواو دەبوو و خوێندنگە دادەخرا، منداڵان بەردەبوونە کووچە و کۆڵان بۆ کایە و، منیش دەبوو بچمە خزمەت مەلا، بۆ دەرسی قورئان، مەلا ئەوە خەریکی گوتنەوەی (ئەلف سەر ئا، لام زەنە ئەل) بوو، منیش بیر و هۆشم لە لای منداڵان بوو، کە جار و بار بە شووڵەکەی دەستی، حەسیری سەر عەرزەکەی دادەگرت و ئێمەش بە شەقە و شریخەی شووڵەکە رادەچڵەکاین، تەنیا چاکەیەک کە هەیبوو، قەت لە کەسی نەدەدا، تەنیا حەسیری سەر زەویەکە نەبێ، حەسیریش وای لێهاتبوو، ئەگەر گیان و هەستی هەبا، شکاتی دەبردە بەر خودا و پێغەمبەر، چونکە ئەوەندەی پێدا کێشابوو، شڕی کردبوو. 
چارم نەبوو، حوکمی حاکم بوو و مەرگی موفاجات، منداڵیش بووم، لە فێڵ و تەڵەکەی وا رانەهاتبووم کە خۆم بدزمەوە و نەچم، ساڵی دوایی دەستم کرد بە گغنیدان و درۆ و دەلەسە، تا پێمدەکرا نەدەچووم، هەندێ جار مەلا بۆ ئەوەی پووڵەکەی نەفەوتێ لە پەنا دیواری دووکانەکەی کە پاڵی وە دەروازەی خوێندنگەکەوە دابوو، خۆی حەشار دەدا و دەیگرتم و دەیگوت: بێرەو قورئانەکەو بخوێنە زوڕیەت، ئەنا ئەیژم بە باوکۆ داتپڵۆسێ، هاااا! منیش ئیتر چارەم نەمابوو، چونکە دیواری مەدرەسەی هەدایەتیش وا نەبوو کە بە سەریدا باز دەم و خۆم دەرباز بکەم، ناچار دەچووم بەڵام چوونی چی؟ چی پێدەگوتم لەم گوێچکەمەوە دەچوو، لەوی دیکەمەوە دەهاتەوە دەرێ، پاش ماوەیەک (مەلا)، کە لە سنەی ئێمەدا پێیان دەڵێین (مامۆسا، یان مەڵا) و بڕێ جاریش هەر دوو وشەکە پێکەوە بەکار دێنن، وەکوو مامۆسا مەڵا ئەحمەو. شکاتی خستە بەر باوکم کە گوێنادا و، خۆی دەدزێتەوە و هیدیکە، باوکیشم دوای لێدانێکی قورس و قۆڵ، ئەمجارەیان بردمی بۆ لای (مامۆسا مەڵا ئەحمەد)ی خەڵکی تاڵش، بۆ درێژەپێدان و خوێندنی قورئان، ئەو مەلایە ئەگەر بە هەڵە نەچووبێتم، ئیمامی مزگەوتی کەریم رەئووف بوو، لە پشت دووکان (حاجی ماشەڵای رەنگڕێس)ەوە، چەن برا بوون، هەر هەموویان مەلا بوون، نازانم چۆن و لە بەر چی، ئەو مەلاگەلە تەرای وڵاتی ئێمە بووبوون؟. من پێم وایە لە بەر ئەوە بوو، کە تاڵشییەکان سوننین و لە وڵاتی ئێمە واتە کوردستان، تەگەرەیان نەدەهاتە سەر رێ و دەحەسانەوە، بەڵێ لەوێش لە بەر هەیکەلی ناقۆڵا و ناحەزی مامۆستا و چێوفەڵەک و لێدان لە قوتابییەک، ئەو هەڵاتنە هەڵاتم نەگەڕامەوە، تا ئەم جارەیان لە گەڕەکی خۆمان لە (کانی کەمێزی) لە لای مەلا عەبدوڵڵای ئیمامی مزگەوتی (حەمە حسەین بەفری) دایاننام، مەلای نێوبراویش لە خانەقای شێخ سەلام، یان تەکیەی حاجی سەی وەفا، لەوێ وانەی پێدەگوتینەوە، لەوێ ئیتر چونکە گەڕەکی خۆمان بوو و هاوسەر و هاوماڵی خۆمی تێدا بوو، داکاسرام و حەوت جزمی قورئانم لە ماوەیەکی کورتدا تەواو کرد و مامۆسا لە خۆشی ئەم زیرەکییەی من و گەیشتن بە سوورەی: تەوابەن، مامرە کوڵە سەوابەن، بۆ مامۆسا کەبابەن، میوانییەکی بە باوکم سازدا و منیان هاندا کە لەبەر ئەوەی دەنگم خۆشە لە مزگەوتیشا بانگبدەم، باوکیشم کەیفی پێدەکرد. 
لە پۆلی شەشی سەرەتاییدا بووم، دیارە لە پەنای قورئانخوێندندا، باوکم بە زۆرەملیی، هەمیشە لە گەل خۆی دەیبردم بۆ نوێژ و، رەمەزانانیش نەیدەهێشت رۆژووم بفەوتێ، بۆ ماوەیەک بووم بە بانگبێژی مزگەوتی گەڕەکی خۆمان، خادەمی ئەو مزگەوتە نێوی (شامحەمەو) بوو، هەرچی بانگی دەدا، لە بەر پێکەنین کەس خۆی پێرانەدەگیرا، دەنگی ناخۆش بوو، بانگگوتنەکەی بە جۆرێ بوو، دەتگوت بێگاری پێدەکەن، خوای لێخۆش بێ، پیاوێکی بەڕێز و خواناس بوو. لە پۆلی شەش دەرنەچووم و داکەوتم و مامەوە بۆ ساڵێکی دیکە، لە بەر باوکم نەمدەزانی چیبکەم، لە ترسان کونەمشکم لێ بووبوو بە کۆشک و سەرا، چوومەوە بە دایکمم گوت: رفووزەم. دایکی داماویشم، لە تاو مێردی زاڵم، لە خەفەتا واقی دابوو، چونکە دەیزانی باوکم وام لێدەکا، کە بە لۆکە ئاو بتکێننە دەمم. 
باوکم زانی لە پوولی شەش دەرنەچوومە، هاتە جەستەم و غەشی بێکاریی و مناڵزۆریی و کۆڵەواریی خۆی پێرژاندم، لێشمنەدەگرت، چونکە لە گەڕەکێکی نالەبار و رەپۆشەخەراپدا پەروەدە بووم، گەڕەکێک، بێژگە لە کرێکار و زەحمەتکێش و کاسبکار، پیشەیێکی باڵای تێدا نەبوو، ئەو گەڕەکەی ئێمە لە دێهاتێکی دوورەدەست دەچوو، بەو مێگەل و وڵاخدار و پێکهاتەسەیرەی خۆیەوە کە هەیبوو. منیش ئیتر وام لێهاتبوو کە دەربەستی کوشتن و لێدان نەدەهاتم، وەک کوردەکە دەڵێ: بووبووم بە چەرمی ئاوەسوو! بە جێگای ئەوەی کە چاک بم، ئەوەندەی دیکە لاسار و سەرەڕۆم لێدەرهات، چونکە دەمگوت لە لێدان بەو لاوە، چیدیکە هەیە؟. ئەوەندە رقم لە خوێندن هەڵگرتبوو، کە هەر رۆژێ دەچوومەوە بۆ خوێندنگە، حەزم دەکرد بڵێن: مامۆستاکەتان نەخۆشە، یان کەوتووە و بریندارە و ملی شکاوە و هیدیکە، بۆ ئەوەی لە دانیشتن و گوێگرتنی ناو پۆل رزگار ببم! 
سەرتان نەیێشێنم، پاش وەرگرتنی دیپلۆم لە رشتەی وێژە (ئەدەب)دا، بووم بە مامۆستای خوێندنگەی سەرەتایی لە دێهاتێ لە نێوان سنە و #مەریوان# بە نێوی (بزان)، کە بەداخەوە هەر بزانیشم بەچاو نەدیت، لەبەر بەسەرداهاتنی راپەڕینی گەلانی ئێران و شۆڕشی کوردستان، چونکە ئیتر نەمتوانی مامۆستایەتییەکە درێژە پێبدەم و کەوتمە زیندان، پاش بەربوون لە زیندان لەگەڵ کۆچکردوو مەرزیە و دوو منداڵەکانمان، دڵنیا و #ماردین#، چووینە شاخ و بووین بە پێشمەرگە.
وەکوو گۆرانیبێژێکی کورد، تا ئێستا نزیک بە (40 کاسێت)ی گۆرانیی فۆلکلۆر و ئەویندارانەم لە وڵات تۆمار کردووە و بڵاو کراونەتەوە، لە شۆڕشی کوردستانیشدا چەندساڵ وەکوو پێشمەرگەیەک خەباتم کردووە و، کۆمەڵێک گۆرانیی نیشتمانی و شۆڕشگێڕانە و سروودی سیاسییم لە 4 کاسێتدا بڵاو کردۆتەوە، گۆرانیی و سروودەکانی من، وێردی سەر زمانی خەڵک و پێشمەرگە و رادیۆکوردییەکانی شۆڕشی کوردستانە و هاندەریانە بۆ خەبات دژی زوڵم و زۆر و بانگەوازە بۆ ئازادی و رزگاری کوردستان. دوای وازهێنان لە پێشمەرگایەتی، لەگەڵ مەرزیە و منداڵەکانمان، دڵنیا و ماردین، هاتینە وڵاتی سوێد و وەکوو پەنابەر ماینەوە، لێرەش بووین بە خاوەنی کوڕێکی دیکە بە نێوی کاردۆ. 
لێرە، لەم چەند ساڵەی ژیانی هونەریماندا لە هەندەران، وێڕای بەشداریی لە زۆر ئاهەنگ و جێژنی نەتەوایەتی و سیاسیی کوردیی، لە دەرەوەی وڵات، بە چەرمەسەری توانیومە (7 سیدی)ی دیکەی گۆرانیی تۆمار بکەم و بڵاوی بکەمەوە، هەرچەند کاری سەرەکیم، گۆرانیگوتنە، بەڵام وەکوو نووسەرێکی کوردیش، چوار کتێبیم بە نووسین و وەرگێڕان بڵاو کردۆتەوە، لەو ماوەیەشدا کتێبێکم لەلایەن چاپخانەی موکوریانەوە دێتە بازاڕ، کە بەرهەمی چەندینساڵ پرسوجۆ و یاداشتی سەردەمی پێشمەرگایەتیمە کە نێوی کوردیم تێدا کۆکردۆتەوە. هەروەها چەندین وتاریشم لەسەر مووزیکای کوردیی و گۆرانیبێژەبەنێوبانگەکان و گیروگرفتی هونەرمەند لە دەرەوەی وڵات و کێشەی زمانی کوردیی و پرسگرێکی کوردستان، لە گۆڤار و رۆژنامەکاندا بڵاو کردۆتەوە. 
ساڵی 2004 لەگەڵ مەرزیە بڕیارماندا کە لە سوید نەمێنین و بڕۆینەوە بۆ ئەو پارچرزگارکراوەی نیشتمانەکەمان. ئەوە بوو رۆشتینەوە بۆ کوردستانی باشوور و لەوێ لە شاری دووکان ماینەوە، بۆئەوەیکە ئەو چەندساڵەی کۆتایی تەمەنمان لەوێ بەرینە سەر، بەداخەوە ساڵی 18-09-2005 مەرزیە، بە هۆی نەشتەرگەرییەکی ناسەرکەوتوو کۆچی دوایی کرد و منیش تووشی سەرلێشیوایی بووم. دوای ئەوەی کە زانیم ناتوانم بەتەنیا بژیم، دیسان هاوسەرگیریم کرد و لەگەڵ (ئێران)ی هاوسەرم گەڕاینەوە بۆ سوید و ئێستا لە ستۆکهۆڵم دەژین.
لەم ماوەی ئەم چەندین ساڵەی کە لە سوێد ژیاوم، (چەندین گەشتی هونەریی)م بۆ وڵاتانی: ئوتریش، ئیتالیا، ئاڵمان، فەرانسە، ئینگلیس، هولەند، بلژیک، دانمارک، فینلاند، نورڤێژ، سویس، ئامریکا، کانادا، ئوسترالیا، سۆڤیەتی جاران، ئازەربایجانی بندەستی سۆڤیەتی کۆن، یۆنان، بولغارستان، قبرس، رۆمانیا، ئێراق، تورکیە، کوردستانی بندەستی تورکیە، کوردستانی ئازادکراو و هی دیکە کردووە، کە بۆ هەر وڵاتێکیان، چەندین جار سەفەرم کردووە و ئاهەنگم گێڕاوە. لەبەر ئەوەش کە پێشمەرگە بووم و ناوچەکوردنشینەکانی کوردستان گەڕاوم و دیالێکتەکوردییەکان فێربوومە و شارەزای زمانی کوردییم، بە چوار زاراوەی کوردیی گۆرانیی دەڵێم: #هەورامی#، #کەلهوڕی#، کرمانجیی، #سۆران#یی، کە مەبەستیشم لەمکارە، تەنیا ئەوە بووە کە خزمەتێک بە کورد و نزیککردنەوەی زاراوەکان بکەم. هەروەها لە چەندین (فستیڤاڵ و گاڵا)دا لە ئورووپا بەشداریم کردووە، بۆ نموونە: کۆنگرەیەک بۆ کورد لە سویس لە شاری ژنێڤ، ساڵی 1990. فستیڤاڵی وۆمەد Womad FESTIVAL لە هامبوورگ، بەنێوی Weltbeat ساڵی 1991. گاڵایەک بۆ رەوەکەی کورستان لە ستۆکهۆڵم ساڵی 1991. فستیڤاڵی World Root Festival لە هولەند ساڵی 1992. فستیڤاڵی Sacred voices دەنگە پیرۆزەکان لە ئینگلیس، لە شاری لەندەن ساڵی 2000. کۆففرانسێک لە سەر مێژووی موۆسیقای کوردی لە لەندەن ساڵی 2000. هەروەها چەندین فستیواڵی دیکەی گەورە لە سپانیا و ئینگلیس و فەڕانسە و سوێد و ئامریکا. درێژەی هەیە....

⚠️ Çakkirdinî babet: Tikaye gorranikarîyekant lem xaneyeda binûse.

Serçawe:


Kurdipedia.org (2008 - 2019) version: 11.12 \| 📩 contact@kurdipedia.org \| ✔️CSS3 \| ✔️HTML5 \| Katî afrandinî lapere: 0,078 çirke! ☎ +9647701579153 +9647503268282 \| ☎ +31654710293 +31619975574 🔝