گەڕانی ورد یەکێکە لەو فیچەرە گرنگانەی ماشێنی کوردیپێدیا کە بەهۆیەوە دەتوانرێت لە سەرباس، درێژەی بابەت، ناوی وێنە، فایلی پەیوەندار و تایبەتمەندییەکانی بابەت و زۆری تر گەڕان بکرێت.
ئەم فیچەرە هەندێک سەلیقەی دەوێت و گەڕانکەر دەبێت بەباشی بزانێت چیی دەوێت و چۆن پڕۆسەی گەڕانەکەی دەئافرێنێت. زۆر گرنگە بە ڕێنووسێکی پوختە و ڕەچاوکردنی بەکارهێنانی تیپی یونیکۆد کلیلە وشەکان بنووسرێت.
بۆ کردنەوەی گەڕانی ورد لە بەشی [ گەڕان] کلیک لە گەڕانی ورد بکە و لاپەڕەی گەڕانی ورد بکەرەوە.
دەتوانیت ئەم تێبینییانەی خوارەوە لەبەرچاو بگریت تاوەکو گەڕانێکی باش لە کوردیپێدیا بکەیت و ئەنجامێکی خوازراوت دەستبکەوێت:
کلیلە وشەکەت لە خانەی گەڕاندا بنووسە؛ زۆر گرنگە بە ڕێنووسێکی پوختە و ڕەچاوکردنی بەکارهێنانی تیپی یونیکۆد کلیلە وشەکان بنووسرێت.
ئەو خانەیە هەڵبژێرە کە دەتەوێت گەڕانی تێدا بکەیت.
دەتوانیت لە هەمان کاتدا لە دوو خانەدا بگەڕێیت؛ لەو کاتەدا کلیلە وشەی دووەمت لە خانەی گەڕانی دووەمدا دەنووسیت و خانەی گەڕانەکە هەڵدەبژێریت؛ دەتوانیت لە سەرباسی 1 و سەرباسی 2، درێژەی بابەت و ناوی وێنەدا گەڕان ئەنجام بدەیت.
جۆری گەڕانەکان بەم شێوەیەیە:
1- لێکچوون؛ ماشێنی گەڕانی کوردیپێدیا دەگەڕێت بەدوای ئەو خانانەی کە کلیلە وشەکە بەشێکن تێیدا. بۆ نموونە لە گەڕان بەدوای کلیلە وشەی "چوار"، ئەم ئەنجامانە لە گەڕانەکەدا دەبینیت: چوار، چوارتا، چوارباخ و هتد..
2- یەکسان؛ ماشێنی گەڕانی کوردیپێدیا دەگەڕێت بەدوای ئەو خانانەی کە یەکسانن بە کلیلە وشەکە. لە نموونەی پێشوودا لە گەڕان بەدوای وشەی "چوار"، تەنها ئەو بابەتانە دەدۆزرێتەوە کە سەرباسەکانیان یەکسانە بە "چوار". لە هەڵبژاردنی جۆری گەڕان - یەکسان، دەبێت تێبینیی ئەوە بکرێت کە خانەی گەڕانەکە درێژەی بابەت نەبێت. چونکە خانەی درێژەی بابەت ناوی بەخۆیەوەیەتی و درێژە، کلیلە وشەی گەڕانەکەش کورتە!
3- دەستپێبکات بە..؛ ماشێنی گەڕانی کوردیپپێدیا دەگەڕێت بەدوای ئەو خانانەی کە بە کلیلە وشەی پێدراو دەستپێدەکەن. لە نموونەی پێشوودا، گەر کلیکە وشەی "چوار" بنووسرێت، ئەوا چوار، چوارتا، چوارباخ و هتد.. دەدۆزرێتەوە. بەڵام ئەگەر خانەیەک وشەی "چوار"ی تێدابێت و نەکەوتبێتە سەرەتای سەرباسەکەوە ئەوا لە ئەنجامەکەدا دەرناکەوێت. بەم پێودانگە ئەگەر خانەکە سەرباس بوو، سەرباسی "لە ڕۆژی ڕڕ-م‌م-س‌س‌س‌س چوار پێشمەرگە لە دەڤەری ... شەهیدبوون" لە ئەنجامەکەدا دەرناکەوێت! چونکە سەرباسەکە بە وشەی "چوار" دەستیپێنەکردووە.
4- بەبێ؛ واتە هەموو ئەو تۆمارانە دەهێنێت کە لە خانەکەدا وشەی "چوار"ی تێدا نییە!
ئەگەر بەدوای دوو کلیلە وشەدا گەڕایت، پێویستە هەمان تێبینیی خانەی گەڕان و جۆری گەڕانەکە بکەیت کە پێشتر باسکران. بۆ نموونە دەتوانیت لە خانەی سەرباس بگەڕێی بەدوای "چوار"؛ جۆری گەڕانی یەک لێکچوون؛ خانەی گەڕانی دووەم "چوارباخ"؛ جۆری گەڕانی دووەم بەبێ؛ بەو شێوەیە لە ئەنجامەکەدا هەموو ئەو سەرباسانە دەردەکەون کە کلیلە وشەی "چوار"ی تێدایە، بەڵام ئەو تۆمارانەی وشەی "چوارباخ" لە سەرباسەکانیاندایە دەرناکەون.
دەتوانیت لە هەموو زمانەکاندا بگەڕێیت یان تەنها یەک زمان هەڵبژێریت؛ ئەگەر کلیلە وشەکەت "ژینا ئەمینی" بوو؛ لە هەموو زمانەکان گەڕایت، ئەوا لە پۆلی شەهیدان دوو تۆمار دەدۆزیتەوە کە هەردووکیان سەرباسی "ژینا ئەمینی"یان هەیە. چونکە "ژینا ئەمینی" بەهەردوو کوردیی ناوەندی و کوردیی هەورامی بە یەک جۆر دەنووسرێت. بەڵام ئەگەر هەڵبژاردەی زمانەکە تەنها کوردیی هەورامی بوو تەنها بابەتە هەورامییەکان لە ئەنجامەکەدا دەردەکەون.
دەتوانیت لە هەموو پۆلەکاندا بگەڕێیت یان تەنها یەک پۆل هەڵبژێریت؛ پۆلەکانی کوردیپێدیا جۆریان زۆرە و لە 30 پۆل زۆرترن. لە نمووی پێشوو ئەگەر هەموو پۆلەکان هەڵبژێریت، لەوانەیە سەدان بابەتت دەستبکەوێت کە باسی "ژینا ئەمینی" یان پەیوەستن بە ژینا ئەمینییەوە. بەڵام ئەگەر تەنها پۆلی شەهیدان هەڵبژێریت، بەو کلیلە وشەیە دوو تۆمارت دەستدەکەوێت. بەڵام ئەگەر زمانەکە کوردیی ناوەندی و پۆل شەهیدان بوو ئەوا تەنها یەک تۆمار دەبینیت. واتە بەو شێوەیە دروست ئەو تۆمارەت دەستدەکەوێت کە دەتەوێت. ئەویش بەهۆی ئەوەی کە لە کوردیپێدیادا لە زمانێک و پۆلێکدا سەرباسی دووبارەی تێدا نییە. واتە یەک "ژینا ئەمینی" لە زمانی کوردیی ناوەندی و پۆلی شەهیداندا هەیە، بەڵام لەوانەیە هەر لە زمانی کوردیی ناوەندی لە پۆلی بۆ نموونە پەڕتووکخانە "ژینا ئەمینی" هەبێت.
دەتوانیت ئەوە دیاری بکەیت کە بابەتەکە وێنەی لەگەڵ بێت یان نا؛ یاخود هەردووکی.
دەتوانیت ئەوە دیاری بکەیت کە بابەتەکە فایلی پی. دی. ئێفی لەگەڵ بێت یان نا؛ یاخود هەردووکی. ئەمە تەنها بۆ پۆلی پەڕتووکخانەیە.

ئەرشیڤوانانی کوردیپێدیا پێویستە لۆگین بکەن تاوەکو تەواوی یارمەتییەکانی تۆمارکردن و باشترکردنی بابەت ببینن!

چوونەژوورەوە