ل هەیڤا چریا دووێ یا سالا 1929 ێ ل باژێرێ دهۆکێ هاتیە سەر دنیایێ، خواندنا خویا سەرەتایی ل دهۆکێ ب دووماهی ئینایە و پاش خواندنا دواناڤنجی ل مووسل و بەغدا تەمامکریە و ل سالا 1949 ێ ل کولیژا بازرگانی و ئابوری ل بەغدا هاتیە وەرگرتن.
موسەددەق توڤی گوت ژی حافز قازی پشتی ل سالا 1955 کولیژا ناڤبری ب دووماهی ئینایی کارەکێ سەربخو دکر و نەهاتە دامەزراندن و ل سالا 1957ێ ب هەڤکاری دگەل کومەکا کەسایەتیێن کورد یانا سەرکەوتنی کورد ل بەغدا دامەزراند و وەک رێڤەبەرێ بەرپرس ل کوڤارا هیوا یا یانا ناڤبری کاری یە پاش ل سالا 1960 بویە خودان ئیمتیازێ کوڤارا رۆناهی و شیایە د دەمێ سالان دا 11 ژمارێن کوڤارێ دەربێخیت.
حافز قازی ل سالا 1963 ێ وەک پێشمەرگە گەهشتە رێزێن شۆرەشا گەلێ کوردستانێ و چەندین سالێن زیندانێ د ناڤبەرا سالێن 1965 – 1969 دا بوراندینە کو دەمەکی ل زیندانا قەسر ئەلنهایە بوو، ئەندامەکێ کارا وسەرەکی یێ دامەزراندنا ئێکەتیا نڤیسەرێن کورد بوو کو ل بەغدا هاتیە دامەزراندن.
دگەل ژمارەکا رەوشەنبیرێن کورد کۆڤارەک ب ناڤێ رۆژی کوردستان دەرئێخست و دەستەکێ بالا د دامەزراندنا کومەلا رەوشەنبیری یا کوردی دا ل بەغدا هەبوو و هەڤکاری و هاریکاریەکا هەرە باش دگەل کۆڕێ زانیاریێ کوردی ل بەغدا هەبوو.
نڤیسەر و رۆژنامەڤان موسەددەق توڤی ئاماژە دا کو حافز قازی رۆلەکێ مەزن د دانانا پشکا کورمانجی ل رادیویا کوردی یا بەغدا هەبوو و رێخووشکەر بوو بۆ کاراکرنا وێ پشکێ و هاندانا ژمارەکا باشا رەوشەنبیرێن کورد مینا قەدریجان و ئەمینێ ئۆسمان و مەلا ئەنوەر مایی رۆلێ خو ل ڤێ رادیویێ ببینن.
حافز قازی ل سالا 1983 کوردستان بجە هێلا و قەستا ئەورپا کر و پاشان ڤەگەریا کوردستانێ و د دوڤدا قەستا وەلاتێ نەمسا کر و شەڤا بوری 3/4 ئادارێ گەهشتبوو دهوکێ تایبەت بۆ دەنگدانێ د هەلبژارتنێن گشتی یێن عیراقێ دا لێ مخابن د هەمان شەڤ دا گیانێ خو ژ دەست دا و ل گورستانا شاخکێ ل باژێرێ دهۆکێ هاتە بن ئاخ کرن.
رۆژی 03-03-2010 لە تەمەنی 80 ساڵیدا کۆچی دوایی کرد.
[1]