باخچێوە بېگەرد
نویستەی: میرزا ئۆلقاڎرو پاوەی
بەشۍ: سی و نۊهەمە
دلۍ کەشتیەکەینە، بە فەرمانو زاتو هەقی، تەنوورێ پەی نانی و واردەی بە تەوەنی نریارە، ئا تنوورۍ هینەو حەزرەتو ئاڎەمی بۍ، بە میراس مەنۆ پەی حەزرەتو نووحی، هامسەرەو حەزرەتو نووحی خەریکەو نانکەردەی و ئاماڎەکەردەی واردەی بۍ پەی سەرنیشتەکا.
جە کارخانەی نووح، نان پېش مەکەردەن
دایېم بەو تەنوور، سەوگەند مەوەردەن
مەعلوومەن، ئەو وەقت، پادشای غەفوور
چوون وېش فەرماوان، و (فوارولتەنوور)
هەر وەقت ئەو تەڼوور، جۊشی کوورەتاو
هۊرشانۊ، جە بېخ، فەوارەیی ئاو
ئانە ئیبتیدای، خەتەر و خۊفەن
نیشانەی غەزەب، تۊفانی نووحەن
جەو دما، حەرەم، موحتەرەمەی نووح
تەڼوور، نان مەکەرد، هەر شەب، تاکو بە سوبح
دیش کززەی ئایېر، سەرەتای ئاوان
تەڼوور، گۊل بەستەن، وېنەی گۊلاوان
هانا، بەرد، وە نووح، وات: تەڼوورەی سەنگ
ها، پەڕبیی، جە ئاو، وە بۍ داڎ و دەنگ
نووح، وات: سەددەق، تاکی تەنیای فەرد
نیشانەی تۊفان، ئانە، مەعلووم کەرد
ئەوەڵ، ئەمرش کەرد، ئەهل و بەیتی وېش
بشان، وە کەشتی، بۍ خەوف و ئەندېش
یەک مەنکووحە داشت، واعلە نام، بۍ
بۍ سېدق و باوەڕ، هەر بە کەلام، بۍ
چەنی فەرزەندێ، نامش کەنعان بۍ
گومڕای، دڵ جە سەنگ، ئەهلی ئیمان بۍ
جە لوای کەشتیی، تەبڕرەء، کەردەن
خەوفی خوڎاوەند، وە دڵ، ناوەردەن
سا هەرچی کە نووح، نەسیحەت کەردش
دەریای ڕەحمی دڵ، وە جۊش ئاوەردش
وات: فەرزەند تۊفان، ها، ئامان، بە وار
سارا و سەربیسات، گرد، مەبۊ وە ئاو
یەکسەر، مەبۊ، غەرق، زی ڕۊحیلبەشەر
وە ئەمری قودرەت، دانای داڎگەر.
[1]