دەم و زوان لووسی، پەی پېڎاکەردەی نانی.
بەشێ جە خەڵکی، نانو زوانیشان وەران، بە پۊرەهوردای و تاریفکەردەی دەسەڵادارا، نانو ژیوایشان بە دەس ماران. ئا کەسۍ تاریفۍ دنیێ پېسە وېش نمەکەران، بەڵکم پا تەرزە تاریفشکەران کە بە دڵو دەسەڵاتی و خاوەن سامانەکا بۊن، ئانەیچ چېگەنە مەبۊن بە قوربانی تەنیا ڕاسی و هەقیقەتەن.
مەگېڵناوە: سەردەمو خەلافەتو عەبباسیەکانە (خەلیفە موتەوەکیل) ، کابرێوە بە نامۍ (فەتح کوڕو خاقان) ی وەزیرو خەلیفەی بۊن، چەنی ئانەیچە شاعېرێ زوان لووسی مەقام پەرەس بېیەن، هەر وەختێ زانێش چېروو پەیاش کەوتەن بۆشی، قەسیدێوە درېژە پەی مەدحو موتەوەکیلۍ نویسۍ. تاتەو ئی شاعېرەیە هەر بە زارۊڵەیی، بە زوان لووسی و تاریفکەردەی پەروەردەش کەردەبۍ. ڕوێشا خەلیفە (موعتەصەم) سەردای یانەو تاتەیش (خاقان) ی کەرۊن، چا وەختەنە (فەتح) ی کوڕش زاروڵە بۊن، خەلیفە موعتەصەم ڕوە مەکەرۊن فەتحی و بە گاڵتەو پەنەش ماچۊن: پەنەم واچە بزانو یانەو ئېمە خاستەرەن یان یانەو شمە؟.
فەتح، دەمودەس جوابش مڎۊوەو ماچۊ: هەتا تۊ یانەو ئېمە بی، یانەو ئېمە خاستەرەن.
خەلیفە موعتەصەم، ئڼە پا وەڵامەیە دڵوەش مەبۊن، خەڵاتێ خاسش کەرۊن.[1]