زوانی ئایینی و قیبلۍ و ئاوەو کەوسەرو یارسانەکا:
یارسانەکۍ تەماموو سروودە ئایینیەکېشا بە زوانی هۆرامینۍ، فرەو شېعرەکاشا کە هینۍ شاعېر و عاریفەکاشانۍ بە هۆرامی واچیێنۍ، دلۍ جەمە دینیەکاشانە سروودەکاشا و شېعرەکاشا سەرو ئاوازو گورانیۍ هۆرامیۍ بە ڕیتمی (سېیاوچەمانە و خاو) ماچاشان چەنی ژەڼەی تەمبووری.
قیبلۍ و ئاوەو کەوسەریشا ئینێ هۆرامانەنە، چن سروودێ دینیېنە نیشانەشا دان.
سەبارەت بە (قیبلۍ) چی دېڕە شېعرېنە ئامان:
موحاسیب پیر موسا ساحیب دەفتەرەن
قیبلەی هەقانیش نە پەردیوەرەن.
سەبارەت بە ئاوەو کەوسەری چی دېڕە شېعرېنە ئامان:
ڤە واتەی مەردان خەرقەی نوور نەوەر
ئاوم (تەشارەن) قیبلەم (پەردیوەر) .
بەپاو ئی دېڕە شېعرۍ یارسانەکۍ بە هەر (ئاو) ێ وەسڵ بەرکەرا هەمان ئاوەو (هانەو کەسڵان) ینە کە ئینا دەگاو (تەشار) ی جە هۆرامانو لهونی. ئا ئاوېچە ئاوەو کەوسەرو یارسانەکانە.دیسان ئامان:
یاران بەیانۍ بدانۍ پېخام
یادگاری من ڕۊشنی بنیام
بادە غەسلانی کەوسەری نۊشام
غەسلان یادگار کەندش پەری جام.[1]