ئەو قوماشەی دەستم نەکەوت..؟!
لە خەونێکما...
لە بازاڕی شار دەگەڕام
لەو قوماشەی کەجاران ناوی شادی بوو
کەدەتوت بۆ لەبەر کردن
یەک پارچە بەنجی تیایە..؟!
هەر چەند ئەو کاتیش دەگمەن بوو
بەقاچاخی ئەگەر بەدەست بکەوتایە..؟!
وتم ئەگەر دەستم کەوێ
چەند مەترێکی لێ دەکڕم و...
بۆخۆم دەیکەم بەکورتەک و شەرواڵێک و...
جارو بارێ دەیکەمە بەر
قیڕوسیا لەوەی کەنرخی
زێدەبەرزو گران بەهایە..؟!
دەیبەم بۆ لای
وەستا (بەدرەدین) ی هاوڕێم
بەرگ دروێکی لێزان و شارەزایە..؟!
دەست دووری ئەو
باس ناکرێ بێ هاوتایە..؟!
سۆراغ.. سۆراغ.. گەڕام.. گەڕام لێرەولەوێ..؟!
وتیان کاکە
ئەو قوماشەی تۆ دەتەوێ..؟!
ئێستا زەحمەت دەست بکەوێ..؟!
لەجێ ی ئەوا
ئێستا جۆرە
قوماشێکی ترمان لایە..؟!
ئەو قوماشەش
ناوی خەمی بێ کۆتایە..؟!
هەر چەند ناوەکەی ناخۆش و بەدو شومە
وەک ناوی ئەهریمەن وایە..؟!
قوماشێکی قورسیشە بۆ لەبەر کردن
بەڵام ئەویش بەکارهێنەرانی زۆرەو...
تەرزو مۆدێلی ئێستایە..؟!
هەر کت و مت قوماشەکەی
جارانی فەتاح پاشایە..؟!
وتم کاکە
ئەو قوماشەی ناوی دەبەی
ئەی ئەوە نیە
ئێستا لەبەر منیشایە..؟!
لێرە خەونەکەم تەواو بوو
ئیتر خەبەرم بووەوەو...
سەرم سوڕماو وتم خوایە..؟!
ئەوخەونەچی بوو من بینیم
ئەو قوماشەم دوای ساڵەها
بۆچی وەبیرهاتۆتەوە
هەتابیکەم بەکورتەک و شەرواڵێک و لەبەری کەم
بەتایبەتی لەم سەردەمی هەراسانی و ناحەزییەی
کە سەردەمی مەرگەسات و کۆڕۆنایە..؟!
کە سەردەمی فیتنەو ئاشوب و بەڵایە..؟!
کەسەردەمی دادە دادی بێ دادیە لەهەر لایە..؟!
کە سەردەمی پێ لەسەر نانی یەکترو...
ڕۆژە ڕەشی بێ ڕەحمیە و...
جێگرەوەی هەموو شتێ
ماددەیەو تەکنەلۆژیایە..؟!
فاتح بێ لان[1]
-وەستا بەدرەدین حمدامین تۆفیق بەرگ دروێکی ناوداری شارۆچکەی تەقتەق-ە و یەکێکە لە هاوڕێ دێرینەکانم 0
-فەتاح پاشا ناوی جۆرە قوماشێکە