#وەلی دېوانە#
ئەرۍ هەی تۇڵ نەی، ئەرۍ هەی تۇڵ نەی
ئەرۍ هەی نەونەمام قامەت تۇڵ نەی
ئەر هەی دیدە مەست چەم پېیاڵەی مەی
سزای تۊ تا چەند سەبر من تاکەی
* * * * * *
ئەرۍ هەی شیرین قامەت زەڕستۇن
ڕەژیدەی قودرەت کارساز بۍ چۇن
منت کەردەن (قەیس) سەرگەشتەی مەفتۇن
ڕەنگ زەرد و زایېف بەڎتەر جە (مەجنۇن)
مەگېڵۇن هەردان وە جەستەی پڕ وەی
سزای تۊ تا چەند سەبر من تاکەی
* * * * * *
ئەر هەی نەونەمام تازە ڕەسیدە
سەر وە ناز سونع (سانېع) کەشیدە
جە دۇری باڵات ئەی بەرگوزیدە
هەردەم مەوارۊ هۇناو جە دیدە
شەوان تا وە ڕۊ مەناڵۇن چۇن نەی
سزای تۊ تا چەند سەبر من تاکەی
* * * * * *
قەسەم بە توغرای زوڵفی چین چینت
بەو وردە خاڵان سېیای موشکینت
ئەر باوەڕ داری (زڵېخا)ی شانی
بە ئایەی کەلام حەقی ڕەببانی
بەهەشت ڕۊحم بی وە تۊفانی
جە داخ باڵات حۇری ڕەزوانی
بە وېنەی مەجنۇن هەردان کەردم تەی
سزای تۊ تا چەند سەبر من تا کەی
[1]