#میرزای لوڕستانی#
وات نېیەن چاوشی ئەمیر، ئەی نازدار
بەنگین غوڵامەن یاری وەفادار
واتش ئەی ئەمیر نېیەن جای گوزەر
خاتۇ زین جە پەشت وېت پەنھان بکەر
ھەر وەقت میر ئاما مەخېزە وە پا
ئازاردارەنی نەداری گوناە
وست نە ڕۇی قەفا خاتۇن زوڵفی دېز
پۊشا وە باڵا کورکی قاقم بېز
ناگاە چاوشان ئامان بە ئەیوان
دۇرباش دۇرباشیش یاوا بە کەیوان
پیادە بی جە ئەسپ ئەمیر دەر زەمان
پا نېیا وە فەرش ئۊدەی دیوەخان
سەڵام کەرد وە مەم عەلەیک دا جواب
نەخېزا وە پا خەیلێ کەرد عەتاب
پورسا جە ئازار ئەمیری ھەیجا
چاغی درۊستی؟ ئەلحەمدولېللاە
ئاما وە گوفتار شاهی نیکیبەخت
واتش بە شادی بمانی وە تەخت
خەیلێ ناساغم سەختەن ئازارم
جە سەختی ئازار نېیەن قەرارم
دۊعا کەرد ئەمیر بە سەدق و وەفا
ئومېد ھەن خودا پېت دەرۊ شەفا
مەم واتش چراغ شاھیت گڕان بۊ
تېغت جە فەرق دۊشمەن بڕان بۊ
ئیکە چۇن دەعوات ئەمیر بی تەمام
ئین بار تاج‌ئەلدین ئاما نە کەلام
بە ئیشارە و ڕەمز ئاما نە گوفتار
ئیشارەتش کەرد وە مەم نە ھانوار
میر سڵامش کەرد نەخېزای وە پا
بېنامۇسیت کەرد وە ھەر دۇ دونیا
وە خوبی زوبان عەرزکەرد وە تاجدین
خەبەردارش کەرد وە حاڵاتی زین
چۇن دانا تاجدین واقف بی نە کار
خاتۇن نیشانداش دۇ گیسۇی نازدار
ئیشارەتش کەرد وە عەفۆ و چەکۆ
بشۊ وە خانە بە دەوان و دۆ
واچە وە ئەستی توفڵی گەھوارە
باوەرۊ وە بەر وە بۍ مەدارە
ئاتش بدەرۊ سەرا و دیوەخان
خاتۇن جە قەفای مەمەن جە دیوان
بە بەنگینە وات بدېیە نە دېیار
ھەر وەقت زاھېر بی وەنەت نۇری نار
ھانا باوەرە پەی میری گوزین
واچە سۊچېیا خانەی تاجەدین
ئین بار بشنەوە جە عەفۆ و چەکۆ
یاوان وە خانە شېرانی شکۆ
وارد بین وە جا ھەر دۇ بە ڕاستی
مودەعا واتن وە خاتۇن ئەستی
بدېیە چېشش کەرد خاتۇنی دڵبەر
نەو دەم گەھوارەش بەرئاورد وە بەر
نە چەھار جانب خانە سەرانسەر
ئاهېر دا ئاهېر سەقف و بان و دەر
شەرارەی ئاهېر بەو تەور کەرد ئەسەر
گوڕەی نار یاوا وە چەرخی ئەخزەر
وەنەش مەعلۇم بی بەنگین گوڕەی نار
ھاناش کەرد ھانا ئەو وەبۍ قەرار
[1]