#وەلی دېوانە#
هەر من ناشادم، هەر من ناشادم
گشت عاڵەم شادەن، هەر من ناشادم
هەر من نەیاوان وە لای حەق دادم
هەر من نائومید قاپی مرادم
هەر من بازی باز نەردەن نە بارم
هەر من ڕای شەش دەر بەندەن نە چارم
هەر من ناسزان فەڵەک وە بەختم
هەر من گېرۊدەی ئازار سەختم
هەر من چەرخی چەپ وەنەم نە قینەن
هەر من تاڵەم پەست خاکی زەمینەن
هەر من ستارەم سېیا بۍ نە سەر
هەر من فریشتەم کەفتەن دەر بە دەر
هەر من ئېقباڵم خاوېری خەفتەن
هەر من نە ڕۇی «ئەرز» ڕای ڕاسم چەفتەن
هەر من خەمیدەی دەوری گەردۇنم
هەر من جورعەنۊش جامی مەجنۇنم
هەر من پەروانەی پەشېوحاڵ جەستەم
هەر من پەڕ سفتەی خەمناکی خەستەم
هەر من چۇن بوڵبوڵ یەک فەسڵم وەسڵەن
هەر من سێ فەسڵی عومرم بۍ ئەسڵەن
هەر من ڕۊی ڕۊشن وە دیدەم تارەن
هەر من زیندەگیم چۇن ژاری مارەن
هەر من گرفتار جەور و عازاوم
هەر من پەرۍ دۊس دیدە لېڵاوم
هەر من سزاکېش دەرد و داخانم
هەر من چەمەڕای ڕای لېڵاخانم
هەر من جە پەی دۊس لېڵاخ-نشینم
ها وەختەن بەرشۊ گېیانی شیرینم
تا ئەو ڕۊ کە خېڵ شېیان وە دامان
من هام نە سزای جەوری بېسامان
مەر موشکېڵ گوشا بڎۊ مرادم
وەر نە تا مەردەن خاتر ناشادم
[1]