دوای بەدواداچوونی دامودەزگا ئەمنییەکان لە سەر چۆنێتی ڕۆیشتنی دالیا مەحمود موسلیم بۆ تورکیا، توانرا لە ڕێگەی کەفیلی ناوبراو لە هەرێمی کوردستان بە ناوی بەیار ئەحمەد سەعید کە بازرگانێکی دانیشتووی #دهۆک#ە، زانیاریی زیاتر بەدەستبخەین و ڕاستییەکانی پەڕینەوەی دالیا مەحمود موسلیم بۆ ناو خاکی تورکیا بخەینەڕوو.
بەیار ئەحمەد سەعید، کە دانیشتووی شاری دهۆکە و کاری بازرگانی لە نێوان هەرێمی کوردستان و تورکیا دەکات، چۆنیەتی گەڕانەوەی سەلامی یەڵماز و دواتر بە قاچاخ ڕۆیشتنی دالیا مەحمود موسلیم بۆ تورکیا باس دەکات.
بەیار، نزیکایەتی و پەیوەندی لەگەڵ ماڵباتی سەلامی یەڵماز هەبووە، لەکاتی هاتنی دالیا موسلیم بۆ هەرێمی کوردستان، بەیار لەسەر داوای ماڵباتی سەلامی یەڵماز دەبێتە کەفیلی و لەگەڵ سەلامی یەڵماز، لە ماڵەکەی خۆی دەیانحەوێنێتەوە.
دوای گەڕانەوەی سەلامی یەڵماز بۆ تورکیا، دالیا لە ماڵی بەیار دەمێنێتەوە و دواتر لە سەر داوای ماڵباتی سەلامی یەڵماز بە ڕێگەی قاچاخ دەینێرێتە تورکیا. بەیار، دالیا دەداتە دەست ئەو قاچاخچییەی کە ماڵباتی سەلامی یەڵماز بۆیان دەستنیشان کردووە و لەگەڵی ڕێککەوتوون.
دوای گەیشتنی دالیا بە ماڵباتی سەلامی یەڵماز، وەک لە وێنەکان دەردەکەوێت، پەیوەندی بەیار لەگەڵ ئەوان بەردەوام دەبێ و ماڵباتی سەلامی بە (بەیار)یان ڕاگەیاندووە کە سەلام و دالیا بە سەلامەتی بەیەکەوە گەیشتن و خۆیان ڕادەستی پۆلیسی شاری مێرسینی تورکیا کردووەتەوە و دەشیانەوێت دوای خۆناساندن بە پۆلیس ژیانی هاوسەرگیری پێکبهێنن و بەیەکەوە بژین.
وەک لە پەیوەندییە ڤیدیۆکەشدا دیارە، سەلامی یەڵماز بە ئاشکرا بە بەیار ئەحمەد ڕادەگەیەنێت کە دالیا لە ڕێگەی قاچاخ دەرباز بووە و و هاتووەتە لای پیاوەکەی و پەیوەندیی بە هیچ کەسەوە نییە و خۆی ڕادەستی پۆلیسی تورکیا کردووە لە مێرسین و تەنیا خۆی و دالیا ئەو کارەیان ئەنجام داوە.
بەداخەوە کە لە ڕۆژانی ڕابردوودا خەڵکانێک ویستیان ڕاستییەکان بشێوێنن و بازرگانی بەم بابەتەوە بکەن. ئێمە لە کاتێکدا ئەو زانیارییانە دەیخەینەڕوو، دووبارە ئامادەیی خۆمان بۆ هەر لێکۆڵینەوەیەکی زیاتر لەمبارەیەوە دەردەبڕین. هیوادارین چیتر ئەم بابەتە بۆ مەرامی سیاسی بەکارنەهێنرێت و واز لە ژیانی کۆمەڵایەتی و تایبەتی دالیا مەحمود و سەلامی یەڵماز بهێنرێت.
#وەزارەتی ناوخۆ#ی هەرێمی کوردستان
#22-07-2020#