میرزای لوڕستانی

وەلحاسل یاوان وە قەراغی شار
ژەندن تەپڵی شین بە زاری و زگار
مەردمانی شار ئامان وە دېیار
قەڵاخیپۊش دین تەمامی سوار
بەیان کەرد بەنگین وە گردین ئېحزار
شیوەن کەفت جە نام سېغار و کوبار
پادشا بېھۇش گنا سەرنگۇن
غەڵتان بی تەمام نە ڕۇی خاک و خۇن
جە یانەی پاشا زایەڵە بی بەرز
مەردمان خېزان تەمام نە ڕۇی ئەرز
وەکېڵان جورعەی ماتەم کەردن نۊش
چاوشان دۇرباش کەردن فەرامۊش
دە شەبان و ڕۇز شیوەن بی نە کار
ئارامشان نەبۍ شەﮪ و شەھریار
فەرما چاوشان جاڕ کېشۊ یەکسەر
سوپا حازر بان نە بیرۇن و دەر
فەردا جەو دەمدا کە مەڎۊ ئەکبەر
مەشۇن پەی قەساس فەرزەندی دوڵبەر
ئەو ڕۊ تەداروک کەردشان لەشکەر
سەحەر بە دەوان بەرئامان وە بەر
نیلی بەیداقان نیلی کەرد وە پا
ڕەوان بی دەردەم تەمامی سوپا
وادی بە وادی قەتعی مەنازېل
یاوان وە جزیر سوپای موقابېل
دەورەی شەھر بۊت کەردن حەسارێ
ناما وە بیرۇن ئەسڵەن دېیارێ
بەرزېیا جە شار سەدای ئەلئەمان
جە سامی ھەیبەت سوپای با سامان
تەمام ئەھلی شار حەساری کەردن
نە خەمخانەی خەم ھەر یەک سەر بەردن
تا سوبحی سادېق کەس نەشی نە خاو
جە تەرس جە ھەممی سوارانی داو
وەقتێ ڕۊشن بی نۇری ئافتاب
ھۊرېزان وە پا بە ئەمری وەھھاب
سوار بین وە زین چابۇک سواران
شین وە ئەندەرۇن ڕاھی بین ڕەوان
دریا دەورەشان گېرتن ئەو مېیان
ڕۇکەردن وە شار گشت سوپاھییان
زەلزەلەی پەڕ شۊر ڕۊی ئاخرزەمان
زاھېر بی نە بەین گرد شار و ئەعیان
غارەت بی ئەبواب ئەمیر و عەیان
گېرتن وە دەستگیر جوملە دەر زەمان
تایېفەی ئەمیر نەژادی بەکر
نە کۇچەی بازار گېرتشان دەستگر
تېغی قەتڵ و عام نا جە دلېشان
دېیارێ نەمەند جە نوتفەی ئیشان
ھەر چە ئەعدا بۍ کوشیا سەرانسەر
واحېدێ نەمەند دېیار ئەلبەشەر
تەڵەب کەرد تاجدین شاهی پەڕ ھۊنەر
عەفۆ با چەکۆ شېرانی سەروەر
تەمام خەلعەت کەرد شای فەرەیدۇن فەڕ
مونعېم بین تەمام جە ئەسباب و زەڕ
تەڵەب کەرد ئەعیان ڕەعایا و دەروېش
ڕۇ کەرد نە ئېحزار پادشا بە وېش
بدان و ئاگا موخبېر بان جە کار
بە خاتر جەمعی بگېران قەرار
فەرمانبەردار بان جە لەیل و نەھار
تاجدین و ئەمیر ھا دادن قەرار
ھەر کەس موخالف ئەمرش بکەرۊ
بایەد کە سەزای جەھەننەم وەرۊ
فەرمانبەردار بان جە بۆڕنا و پیر
تاج ئەلددین قەبۇڵ کەردن وە ئەمیر
سەری ئېتاعەت وە ڕە ئاوەردن
سەر و جان نە حوکم تاجدین سپوردن
بە ڕەسم و ئاداب وە ڕەویەی شاھان
دابی زەبت و ڕەبت وەنەش کەرد عەیان
موسکیننەواز بەر تەمامی عادېل
فېکری عادېڵی نەکەری باتېڵ
مەوعیدی یەک ماﮪ پاشا گېرت قەرار
ھۊرېزا ئاما بە ماوا و دېیار
یا ڕەب بەعېزەت ببەخشی میرزا
جە یەومولمەحشەر جە وەقتی جەزا
گوناﮪ بارەنان ببەخشی گونام
بە تاھا و یاسین بە سۇرەی کەلام
ھەزاران درۇد ھەزاران سڵام
زما بەر موحەمەد عەلەیهی سەلام

*از جھت فرزندی ارجمندی نور چشم فقە معروف پسر عزیزالجود (عزیزالوجود) کاکە امین پسر خالوی لرم خضرآغا بە اتمام ڕسید کە بە خیریت آن ڕا ابتدا و باتمام برساند. ختم در سنە ھزار و دو صد شصت و شش(1266) ھجری است در شھر صفر.
[1]