کڵاشۍ ئەبوبەکریۍ
جۊرێ دیارو جە پاپۊشو هۆرامیەکا کڵاشەن، چنیەی کڵاشی وەڵینێوە تاریخیش هەن دلۍ هۆرامیەکانە، بەڵام جە زەمەن و سەردەمێنە ئۊسێوە دەسڕەنگین جە شارەکڵەو تەۋېڵۍ کڵاشش جە قۊناغێوە بەرد پەی قۊناغێ تەری. وەڵتەر کڵاش شېوێ تاڕادێ ناڕېکش بېیەن، بەڵام ئۊسا ئەبوبەکر دیزاینێ تازەش دان بە کڵاشا، تاکو ئیسەیچ هۆرامیەکۍ سەرو ئا شېوەیە ملان کە نیانشەرە.
ئۊسا ئەبوبەکر ساڵەو (1901ز) ئامان دنیا، ساڵەو (1984ز) کۊچی دمایینش کەردەن. ئۊسا ئەبوبەکر تیرۍ کڵاشیش جە چوار تیراوە کەردۍ بە پەنج تیرۍ، جیاتی پۊسی، ئەڼامو نېرینەو گاوېش (کېر کەڵەگا) پەی چېرەکەی بەکارئارد، پەی زیاتەر مەحکەمی و جوانی کڵاشەکەی.
یەکەمین ئېتە کڵاشۍ دەسچنۍ ئۊسا ئەبوبەکری بە سەوقاتی کیاستېش پەی شېخی حیسامەدینی، ئاڎییچ فرە بە دڵش بېنۍ، حەزرەتو شېخیچ چوونکوم پېوەڼیێ فراوانش چەنی مورید و سوفی و کەسایەتیەکا بۍ، نامبانگو کڵاشەکاش یاونا فرەو یاگا.
ئەسعەد ڕەشید.[1]