#ڕووداو#- #بنگرد#
بەدوای پەیوەندی تەلەفۆنیی براکەیدا ڕۆیشت بۆ ئەوەی فریای بکەوێ و لە مردن ڕزگاری بکات، براکەی ڕزگاری بوو، بەڵام ئەو کەوتە تەڵەی مەرگەوە. ڕێبوار بە 13 چەقۆ لەسەر کێشەی یەک مەتر زەوی کوژرا.
رۆژی هەینی 19-05-2017 لە گوندی چنارەی سەر بە ناحیەی بنگردی قەزای #دووکان#، لەسەر چەند مەترێک ڕەز و باخ کێشە دەکەوێتە نێوان دوو بنەماڵە و بەشەڕدێن، لە ئەنجامی شەڕەکەدا چوار کەس بریندار دەبن، هەر هەمان ڕۆژ یەکێک لە بریندارەکان بەناوی #ڕێبوار عەزیز عەلی#، تەمەن 26 ساڵ کە مامۆستا بوو، بەهۆی سەختیی برینەکەی مرد.
یاسین عەزیز عەلی، برای مامۆستا ڕێبوار کە تاکە پیاوی خێزانەکەیەتی لەو شەڕەدا چەقۆی بەرنەکەوتبێ، دەڵێت سەرەتا کێشەکە لەنێوان ئەبوبەکری برای و خێزانێکی گوندەکە بووە، کێشەکەش لەسەر سنووری زەویی نێوانیان بووە، لایەنی بەرامبەر دەستکاریی سنووری موڵکەکەیان کردووە و مەترێک لە زەویی براکەی ئەویان خستووەتە سەر زەویی خۆیان، بۆیە لەگەڵ ئەبوبەکر بووەتە کێشەیان.
یاسین گوتی ئەوان بە شەش کەس لە ئەبوبەکریان دابوو، ئەویش تەلەفۆنی بۆ ئێمە کرد بۆ ئەوەی بە هانایەوە بچین، باوکم و براکانم بە هانایەوە چووبوون، مامۆستا ڕێبوار یەکەم کەس بوو گەیشتبووە لایان، یەکسەر بەر چەقۆیان دابوو، نیوەی ملیان بڕیبوو، نەوێرام سەیری تەرمەکەی بکەم.
بە گوتەی یاسین، ئەو بنەماڵەیە ئەوە یەکەمجار نییە کێشەیان بۆ دروست دەکەن، بەڵام ئەوان هەموو جارێک بێدەنگییان هەڵبژاردووە. یاسین گوتی ئەوان لە گوند تەنیا شەڕیان بە ئێمە نەفرۆشتووە، شەڕیان بە خەڵکی دیکەش دەفرۆشت، جارێکیان وەکو ئیهانەکردنێک زۆربەی دارەکانی ڕەزی براکەمیان بڕی.
یاسین پێیوایە ئەوان کارەکەیان بە پلان کردووە و دەڵێت ئەوان جگە لە کوڕێکیان، هەموویان لە ڕانیە دادەنیشن، ئەو ڕۆژە هەر هەموویان هاتبوونەوە گوند، بەوەدا دەردەکەوێ پلانیان هەبووبێ بۆ دەستکاریکردنی سنووری موڵکەکانی گوند.
ئەنجوومەنی گوندەکە پێیوایە بنەماڵەکەی دیکە دەستپێشخەر بوون، بۆیە دەڵێت ڕێگە نادەن بگەڕێنەوە گوندەکە.
حەسەن ئیسماعیل کە ئەنجوومەنی گوندی چنارنەیە، بە (رووداو)ی گوت ئەو ڕۆژە کە شەڕەکە ڕوویدا، مەلای مزگەوت کەوتە نێوانیان و کۆتایی بە کێشەکە هێنا، بەڵام زۆری نەبرد دیسان بەشەڕهاتنەوە و ئەمجارەیان بەداخەوە خوێن ڕژا.
حەسەن ئەو بنەماڵەیەی تاوانەکەیان کردووە بە بنەماڵەیەکی سەر بە کێشە وەسفکرد و گوتی ئەگەر ئەو کێشەیەش کۆتایی بێت، ڕێگە نادەین بگەڕێنەوە ئاواییەکەمان، چونکە دڵنیاین ئەگەر بگەڕێنەوە کێشەی دیکە دروست دەکەن.
محەممەد عەلی، مامی ڕێبوار دەڵێت لەگەڵ بنەماڵەی بەرامبەر خزمایەتییان هەیە و ژن و ژنخوازی لە نێوانیاندا هەیە، کچێکی بەوان داوە، بۆیە تاوەکوو بۆیان بکرێ بیر لە تۆڵەکردن ناکەنەوە. محەممەد عەلی گوتی کێشەکەمان دەدەینە دەست یاسا، چاوەڕێین بکوژانی برازاکەم دەستگیر بکرێن و سزا بدرێن. پێموابێ یاسا ئەوەندە زەلیل نییە کە نەتوانێ ئەو تاوانبارانە سزا بدات.
بە گوتەی پۆلیس، مامۆستا ڕێبوار بە 13 چەقۆ کوژراوە و کەسوکارەکەشی سکاڵایان لەسەر شەش کەس تۆمار کردووە، بەڵام تۆمەتبارەکان هەڵاتوون و تاوەکو ئێستا دەستگیرنەکراون.
رائید سەردار کوێخا پیرۆت، لێپرسراوی بنکەی پۆلیسی ناحیەی بنگرد بە (رووداو)ی گوت: کێشەی نێوان ئەو دوو خێزانە لەسەر زەویوزار بووە. ئەوان بە شەش کەس لە ئەبوبەکر دەدەن، ئەویش تەلەفۆن بۆ کەسوکارەکەی دەکات بۆ ئەوەی فریای بکەون، سەرەتا برایەکی بەناوی مامۆستا ڕێبوار دەگاتە لای، بە چەقۆ دەکەونە گیانی ئەویش، 13 چەقۆی لێدەدەن و ملیشی لەلای ڕاست دەبڕن، زۆری نەمابوو سەری لە جەستەی جیابکەنەوە، دواتر باوک و برایەکی دیکەشی بەهانایانەوە دەچن، ئەوانیش بە چەقۆ بریندار دەکەن.
تەرمی ڕێبوار لە پزیشکی دادوەری نەخۆشخانەی گشتی ڕانیە توێکاری بۆ کرا، دوو براکەشی بەهۆی سەختیی برینەکەیان بەڕێکراون بۆ نەخۆشخانەی فریاکەوتنی سلێمانی، بەڵام باوکیان کە برینەکەی لەوان سووکترە، لە نەخۆشخانەی ڕانیە لەژێر چاودێریی پزیشکدایە.
بەرپرسەکەی پۆلیس دەڵێت گومانمان هەبوو ئەوان هەر بەوەندە وازنەهێنن و بچنە گیانی بریندارەکان، بۆیە لە نەخۆشخانە پاسەوانمان بۆ بریندارەکان داناوە.
سەبارەت بە چارەنووسی تۆمەتبارەکانیش، ڕائید سەردار گوتی بنەماڵەی قوربانییەکە سکاڵایان لەسەر شەش کەس تۆمار کردووە، هەموویان بەپێی ماددەی 406 لە یاسای سزادانی عێراقی بڕیاری گرتنیان بۆ دەرچووە، بەڵام بەهۆی ئەوەی خۆیان حەشارداوە و شوێنیان دیار نییە، تاوەکو ئێستا دەستگیر نەکراون.
(رووداو) هەوڵی دا قسە لەگەڵ تۆمەتبارەکان بکات، بەڵام شوێنیان دیار نەبوو، مۆبایلەکانیشیان داخستبوو.