قیام دا وە قەد نوور ئیلاهی
دا نە جقەی تاج فەڕ هومایی
بیروون بی جە ئەرک شەفیع مەحشەر
کەردش حەمد حەق شەهەنشای ئەکبەر
لوا پەی بوراق شای عالی جەناب
دەست دا نە قەربۆز قەدەم بە ڕیکاب
بوراق جەو دەمدا کەردش تەوسەنی
وێش کەرد بە سەر گەرد شاﮪ مەدەنی
مەڕەقسا جە دەور شای هومایوون فەڕ
حەسرەت دا بە ڕەقس ئاهوان بەڕ
سالار کەونەین سادر کەرد فەرمان
خیتاب کەرد بە ئیسم «أشرف الحيوان»
مەر چێشەن قەسدت نەی هەنگامەی کار
چون بەرق لامیع نەداری قەرار
حەق پەی ڕکووبم بە داوان دەو
تۆش ڕەوان کەردەن پەرێ من ئیمشەو
ها ئیستە وەی تەور مەکەری هەراس
وێت کەرد بە وەحشی من وە عام ناس
ئاما بە جواب بوراق ناتیق
عەرز کەرد نە حوزوور سەیید سادیق
جەوساوە ئیسمت بە خەت قودرەت
دییەنم بە چەم نە قاپیی جەننەت
موقابیل چەنی ئیسم زات «الله»
جە خەللاق وێم داروون تەمەننا
جەو سارای مەحشەر قسوور جەننات
ڕاکیب من بۆ خواجەی کائینات
چونکە کێشانم سزای هەر مەراق
عەتا کەردەنم یەک عەهد و میساق
نیازم ئێدەن جە «کشف الکروب»
غەیر جە من هەنی نەکۆ بە مەرکووب
عەهدش عەتا کەرد سەیید لەولاک
پا دا نە ڕیکاب بوراق نیشت نە خاک
شەمس ڕیسالەت نیشت نە خوان زین
ئاهیستە بوراق خێزا جە زەمین
«فەقێ» هەرچی هەن جە فەیز عەشقەن
عەشقەن جە ئوموور کاران سەرمەشقەن
یاڕەببی بە وەزن جوملەی نار و نوور
بە جەمع ئەحیا و ئەموات قوبوور
بە وەزن جەماد جیبال و توراب
بەر موحەممەد بۆ دروود بێحیساب
جوبرەئیل یەمین میکائیل یەسار
ئیسرافیل جە پێش بی بە جڵەودار
عیزرائیل بە ئەمر حەیی داوەری
مەشغووڵ بی بە کار غاشیەداری
مەوکیب زەفەر کەوکەب بی ڕاهی
ئاما بە جونبوش تا گاﮪ و ماهی
نە چەهار تەرەف کیران تا کیران
جنوود زەمین و زەمان بی ڕەوان
جە پێش سالار حیشمەت پەناهی
کێشان درەخشان حەمد ئیلاهی
شەمداران جە پێش شای ساحێب مەقام
بەرز کەردن گوڵ بانگ سەلات و سەلام
زەمین جە حەسرەت نیشت نە زەلزەلە
سەما جە سەماع کێشا هەلهەلە
یاوا بە هەر جا حامید و مەحموود
جیبال نە قیام نەبات نە سجوود
جە کەوکەبەی بەزم شەمس ڕیسالەت
شەق بی کیسرای بەزم شاهان جە خەجڵەت
فیرعەونان نیلی نەمروودان وە بەق
خوسرەوان بە تێغ موعجیزەش بین شەق
هیرەقل بێ ڕەقەم کەیانی تەباﮪ
سەد چون سکەندەر چاکیرەن نەی جاﮪ
خزر حەیاتش ڕەوشەن کەرد زولمات
کەیخوسرەو جە کۆﮪ ویقارش بی مات
ڕۆمی موسەخخەر ساسانی فیرار
حەبەش بی وە عەبد هیندی خاکسار
فەلەک نە سجوود مەلەک نە سەلام
سەمەک نە حەسرەت خەسەک نە قیام
ئەو شەو میعراج خواجای کائینات
ئەفزەلتەر جە قەدر «ليلة البرات»
نە شەعشەعەی شەوق قیندیلان نوور
سەد چون سولەیمان مەنمانا بە موور
نوقتەی قەدرشان بکەروون بەیان
تا کە ئیقناع بان زومرەی سامیعان:
سوپای سولەیمان ئەر جینن و وەحشەن
موحەممەد سالار فریشتەی عەرشەن
ئەر ئەو ڕای دوو ماﮪ بە یەک ڕۆ لوان
ئێد بە یەک لەحزە هەفت فەلەک پێمان
شەو دێر و ڕا دوور کۆتا کەر کەلام
بەر موحەممەد بۆ سەلات و سەلام
تەوق تەمتەراق ڕیسالەت پەنا
بە «طرفة العين» یاوا بە ئەقسا
ئەنبیا و ڕەسوول یەکسەر نە پێشواز
سەف دان نە سەلام شاﮪ سەرفراز
پیا بی جە زین قورەیشی نەسەب
جلووس یی نە تەخت شاﮪ موئەددەب
بەعزێ بە «يا أخ» بەعزێ بە «ابنی»
کەردشان خیتاب بەو شای مەدەنی
جە دمای مەرحەبا و ئیجرای مەحەببەت
ڕاست کەردن قیام سەلات سوننەت
«مأذونا» شافیع بی بە پێشەوا
ئیقتیداش کەردن زومرەی ئەنبیا
زیادیی شەرەف نەی جا مەعلوومەن
خەلەف بی ئیمام سەلەف مەئموومەن
نەواچان یە زیدد عەدلەن جە ئیلا
پدەر مەئموومەن پسەر پێشەوا
حەدیس قودسەن قەول سەمەدەن
«أول الخلق» نوور ئەحمەدەن
یەقینەن جە لام ئەحمەد تا ئەحەد
فەرقەن جە مابەین یەک میم جەسەد
هەم هەن ئەدیللە جە سەهوو ئیغوا
جە یەقین سەبر تەڵەب و ڕەزا
تەرک ئەدەبەن پەرێ من «بالکل»
تەحقیق عەمەل ئەنبیا و ڕەسوول
وەرنە چون ئەحمەد کێ بە موشتەری
هەردەم مەفەرماش «الفقر فخری»؟
حەق کۆﮪ قوبەیس پەرێش کەرد بە زەڕ
قەبووڵش نەکەرد شای ساحێب مەغفەر
#فەقێ قادری هەمەوەند# [1]