کەلام حەققەن جە ئایەی قەدیم
خەلقم کەردەن ناس «أحسن التقويم»
حەدیس قودسەن جە «خيَّرالناس»
«الناس ستري، انا ستر الناس»
هەم ئەمرش کەردەن خەللاق عالەم
جە سوورەت وێم خەلقم کەرد ئادەم
ئەر میهر و ئەر ماﮪ دەورەی گەردوونەن
ئەر ئەبر و باد و هەوا و هاموونەن
هەریەک نە ئوموور وێش نە دەوانەن
یەکایەک مەئموور سینف ئینسانەن
جەمع فەواکیﮪ درەخت و نەبات
نەوع لەزائیز ئەکل و مەشرووبات
چەنی وەحش و تەیر سەید بەحر و بەر
حیلل کەردەن تەعمش پەی سینف بەشەر
پەی سیدقش ئێدەن دەلیل مەحەک
سوجدەی ئادەم کەرد جەمیع مەلەک
یەک جە فریشتان یەعنی «عەزازیل»
نە سوجدەی ئادەم کەردش تەکاهیل
شی نە گەردەنەش تەوقێ جە لەعنەت
دەردەم بەری بی جە دەریای ڕەحمەت
ئەووەڵ کەس ئیبلیس قیاس کەرد نە کار
غەڵەت بی قیاس شووم شەرمسار
واتش: من ئەسڵم جە نار و نوورەن
ئادەم ڕستەی خاک، سیای دەیجوورەن
نەزاناش مەزهەر قەهرەن کوورەی نار
جە قەهر مەر غەزەب مەبۆ ئاشکار
ئەر ئەسڵش ڕەوشەن سیا سیفەتەن
جە تەحت و فەوقش دوود زوڵمەتەن
بەتن مەجمەرەی ئاتەش زوخاڵەن
سیفەتش شەڕڕاڕ، تەبعش قەتتالەن
حەدیسەن جە لەب نەبییی خاتەم
شامیل عامەن «ارحم» و «ترحم»
هەردوو موجریم بین ئادەم و ئیبلیس
ئادەم نادیم بی، ئیبلیس بی حەریس
هەردوو پەرێ ئەسڵ وێش کەرد تەقازا
ئادەم مەعفوو بی، ئیبلیس بی ئیغوا
چون تەقازای خاک سەبر و ئەدەبەن
باد توند و سەرکەش، نار جە غەزەبەن
حەق قەبل ئادەم تەعمیر کەرد جیهان
مەخلووق کەرد جە نار جان ئیبنی جان
چونکی ئەسڵشان جە نار بی حوسوول
مەئیووس بین جە فەزڵ ئەنبیا و ڕوسوول
چون بێ ڕەسووڵ بین ئەبنای جینسی جان
چون نار جە بێشەی عیسیان بین گڕان
عاسی بین جە ئەمر جیهان ئافەرین
چەنی فریشتان کەردن حەرب و کین
ئاخر بین مەقهوور جە قەهر قەههار
بەعزی مەستوور بین جە بێشە و مەغار
تا موددەتێ چەند خاڵی بی زەمین
هەم سیفەتی قەهر یاوا بە تەسکین
جە خاک و جە نار، جە ئاب و جە باد
تەسویر ئادەم ئاوەرد بە ئیجاد
هەر چوار نە هەر جیسم مەوجوودەن ئەلئان
هەر یەک جە تەئسیر وێش دارۆ نیشان
ئاب جە ڕەحمەت و خاک جە ئەدەبەن
باد جە سیرعەت و نار جە غەزەبەن
چون مورەککەب بین هەر چوار نە یەک جا
زەرفش قەبووڵ کەرد نوور ئەنبیا
هەم جەو ئیختیلاف ئاما بە وجوود
مووسا، ئیبراهیم، فیرعەون و نەمروود
شەرارەی نار بی زوبان کەرد گوشاد
سەر دا نە جەستەی بووجەهل و شەدداد
واسیل بی نە جیسم خاک ئاب ڕەحمەت
منمانۆ فرۆغ نوور نبووەت
مەعدەن ئینسان دارۆ هەر گەوهەر
جە نەبات و زەرع، جە زەڕ و سەمەر
پەی ئێدەن جە بەین خەلائیق یەکسەر
بەنی ئادەمەن عالەمی ئەکبەر
«فەقێ» ها قیاس ئیبلیس بی مەردوود
باوەر بە تەحریر ئیقلیم وجوود
#فەقێ قادری هەمەوەند# [1]