$مەنجەنیقى ڕق$
#ئادەم بێدار#
ناوى هاوەڵ لابدە، بنووسە چەتە، بەو چەند وشەیە، باسم کەربەلایی، فووى لەو ئاگرە کرد کە ماوەیەکە خامۆش بووە، ئاگرى ناکۆکى نێوان سوننە و شیعەکان.
باسم کەربەلایی کە یەکێکە لە بەنێوبانگترین سروودخوێنەکانی شیعە کە لە حسێنییە و شوێنەکانى کۆبوونەوەى شیعە مەزهەبەکان سروودى ئایینى دەڵێن، سەبارەت بە سەربردەى پێشەوایانى شیعە بەگشتى و حسێنى کوڕى عەلى بەتایبەت، ئەوانە بە (رادود) بانگ دەکرێن.
ئەو کەسە لەنێو ئاپۆڕاى شینگێڕان بە حەماسەتێکى زۆرەوە دەقێک دەخوێنێتەوە، لە بەردەمیدا کۆمەڵێکى زۆرى شیعە مەزهەب بە جلى ڕەشەوە لەخۆیان دەدەن، لەنێو گەرمەى سروودەکەیدا ئەو ڕستەیە دەڵێت: ناوى هاوەڵ لابدە، بنووسە چەتە، ئامادەبووانیش بە حەماسەتێکى زۆر و دەنگى بەرزەوە بە کۆرس ئەو ڕستەیەى لەگەڵ دەڵێنەوە و دووبارەى دەکەنەوە.
کاتێک ڕۆژى سێشەممە 13-09-2022 لە پرۆگرامەکەم بەناوى (لەگەڵ ئادەم) لە ڕادیۆى ڕووداو، پرسیارم لە میوانەکەم کرد، وەڵامەکەى تووشی حەپەسانی کردم، ئەو میوانەم ناوى شێخ ئەحمەد کیندى بوو، مامۆستا بوو لە حەوزەى زانستیى نەجەف، ئەو لەجیاتى شەرمەزارکردن و بەریبوون لەو کارەى (باسم کەربەلایى) بەرگریی لێدەکرد، بۆ سەلماندنیشى ئاماژەى بە ڕیوایەتێک لە پێشەواى سوننە مەزهەبەکان ئەحمەدى کوڕى حەنبەل دەکرد، ئەو واى گێڕایەوە کە ئەحمەدی کوڕى حەنبەلیش هەندێک لەو هاوەڵانەى بە (عصاە) دەرچوو و سەرەڕۆ وەسفکردوون، لەبەرئەوە کەربەلایی شتێکى ناڕەواى نەکردووە.
بۆ من کە ساڵانێکە لەو بوارەدا کار دەکەم و تێزى دکتۆراکەشم بەشێکى دیارى پەیوەندیى بەو باس و خواسانەوە هەیە، ئەو بابەتە کە هێرشکردنە سەر هاوەڵان و نەفرەتکردنە لێیان، نامۆ نییە، چونکە بە گەڕانەوە بۆ پەڕتووک و سەرچاوە متمانەپێکراوەکانى شیعە، دەکەوینە بەردەم کەلەپوورێکى پڕ لە ڕق و کینە دژى بەشێکى زۆر لە هاوەڵانى پێغەمبەر بەگشتى و هەر سێ پێشەوا گەورەکەى ئیسلام (ئەبوبەکر، عومەر و عوسمان) بەتایبەتى.
بەشێک لەسەرچاوەکانى شیعە بوونەتە قوتابخانەى پەروەردەکردن بۆ پەیڕەوانیان، بەڵام چ پەروەردەکردنێک؟
ئەو سەرچاوانە کە زۆربەیان ڕیوایەت و قسەى پێشەوا گەورەکانى شیعەن، ئاماژە بەو سێ جێنشینەى پێغەمبەر (د. خ) دەکەن کە بەلاى زۆربەی شیعەکانەوە ئەو سێ خەلیفەیەی ڕاشیدی ستەمیان لە ماڵباتی پێغەمبەر کردووە، خیلافەتیان لە (عەلیى کوڕى ئەبو تالیب) زەوتکردووە، مامەڵەیەکى ناشایستەیان کردووە لەگەڵ تەواوى بنەماڵەی پێغەمبەرى ئیسلام کە بە (ئال و بەیت) ناسراون.
$ئەگەر بگەڕێینەوە بۆ سەرچاوە متمانەپێکراوەکانى شیعە، دەبینین بەشێکی دیاریان بە ڕوونى و بێ پێچوپەنا هێرشى تووند دەکەنە سەر هاوەڵانى پێغەمبەر (د. خ) و بە جۆرەها ناو و ناتۆرە و بگرە حوکمى زۆر قورسیشیان بەسەردا دەدەن، لەوانە:$
- عن أبي جعفر (عليه السلام) قال: کان الناس أهل ڕدة بعد النبي (صلى الله عليه وآله) إلا ثلاثة فقلت: ومن الثلاثة؟ فقال: المقداد بن الأسود وأبو ذر الغفاري و سلمان الفارسي ڕحمة الله وبرکاته عليهم ثم عرف أناس بعد يسير) . (الکافي: 8/245) واتە: خەڵک لەدواى پێغەمبەر (د. خ) هەڵگەڕانەوە لە ئایین، تەنیا سێ کەسیان نەبێت: ميقدادى کوڕى ئەسوەد، ئەبو زەڕى غیفارى و سەلمانى فارسى.
- وعن أبي علي الخراساني، عن مولى لعلي بن الحسين عليهما السلام، قال: کنت معه عليه السلام في بعض خلواته، فقلت: إن لي عليک حقا، ألا تخبرني عن هذين الرجلين، عن أبي بکر وعمر؟ فقال: کافران، کافر من أحبهما. (بحار اڵنوار، المجلسی: 30/381) . واتە: مەولا و خزمەتکارێکى عەلیى کوڕى حسێن لە یەکێک لە گەشتەکانیدا هاوڕێیەتیى کردووە، خزمەتکارەکە بە عەلى دەڵێت: من مافێکم لەسەر تۆ هەیە، هەواڵى ئەو دوو کەسەم پێبدە، لەبارەى ئەبوبەکر و عومەر؟ عەلیى کوڕى حسێن لە وەڵامدا گوتى: هەردووکیان بێباوەڕ و کافرن، هەر کەسێکیش ئەوانى خۆشبوێت بێباوەڕ و کافرە.
- وعن أبي حمزة الثمالي، قال: قلت لعلي بن الحسين عليهما السلام - وقد خلا -:أخبرني عن هذين الرجلين؟ قال: هما أول من ظلمنا حقنا وأخذا ميراثنا، وجلسا مجلسا کنا أحق به منهما، لا غفر الله لهما ولا ڕحمهما، کافران، کافر من تولاهما. (بحار النوار، المجلسی: 30/381) . واتە: ئەبو حەمزەى میسالى، دەڵێت: بە عەلیى کوڕى حسێنم گوت - سڵاوى خوایان لەسەر - سەبارەت بەو دوو پیاوە هەواڵم پێبدە؟ گوتى: ئەوان یەکەم کەسن کە ستەمیان لە ئێمە کرد و مافى ئێمەیان زەوت کرد و میراتى ئێمەیان برد، لە کۆڕێک دانیشتن ئێمە لەوان شایستەتر بووین لەوێ دابنیشین – مەبەستى کۆڕى خیلافەتە - خوا لێیان خۆش نەبێت و ڕەحمیان پێنەکات، هەردووکیان کافر و بێباوەڕن، هەر کەسێکیش ئەوان بە وەلیى خۆى بزانێت، کافرە.
- مەجلیسی لە پەڕتووکە بەنێوبانگەکەیدا بەناوى (بحار الأنوار: 30/399) دا دواى ئەوەى زۆر ڕیوایەت لە پێشەواکانى شیعە دەگیڕێتەوە، دەڵێت: ئەو هەواڵ و ڕیوایەتانەى بەڵگەن لەسەر کوفرى ئەبوبەکر و عومەر و هاوشێوەکانیان، پاداشتى نەفرەتکردن لێیان و بەریبوون لێیان، بیدعەکانیان زۆر لەوە زیاترن لەو بەشە (مجلد) یان لە دەیان بەشى دیکە باس بکرێن، ئەوەندەى ئێمە لێرەدا هێناومانن بەسە بۆ کەسێک خودا بیەوێت ڕێنموونى و هیدایەتى بدات بۆ ڕێگەى ڕاست.
لەڕاستیدا ئەگەر ئەو زانا نێودارەى شیعە نەتوانێت لە دەیان بەرگدا باسى وێنەى ئەو هاوەڵانەى پێغەمبەر (د. خ) بەگشتى و هەر سێ جێنشینەکەى ئەو پێغەمبەرە بەتایبەتى بکات، بە دڵنیاییەوە من لەو دەرفەتە کورتەدا ناتوانم زۆر لەو ڕیوایەت و قسە و نووسینانە بهێنم کە پڕن لە هێرش، جنێو، نەفرەت، بە کافر و بێباوەڕ دانانیان، ...هتد، بەڵکوو تەنیا بەو ئەندازەیەى سەرەوە وازدێنم، چونکە هەموو ئەو ڕیوایەت و قسە و باسانە لەسەرچاوە متمانەپێکراوەکانى شیعە بەردەستن، هاوکات بە یەک گەڕانى ئۆنڵاین بەنێو ئەو سەرچاوانەدا تووشى شۆک دەبیت لە سانایى دەستکەوتنى ئەو زانیارییانە.
هەڵبەت پەڕتووکەکانى سوننە مەزهەبیش پڕن لە ڕق و کینە دژى شیعە، بە ڕافیزە، جوو، زەندیق و بگرە کافریشیان دادەنێن، ئەمەیش خۆى لەخۆیدا پێویستى بە نووسینێکى دیکەیە.
$بەڵام ئەوەى زۆر جێگەى داخ و هەڵوەستە لەسەرکردنە:$
$یەک:$ ئەگەر لە ڕابردوودا بەهۆى ئەو ڕەوشە نالەبارەى شیعە تێیکەوتوون و ئەو ستەمەى لێیان کراوە، جۆرێک لە ڕەوایەتییان هەبووبێت، ئەو شتانە لە پەڕتووکەکانیان یاداشت بکەن، ئەوا ئێستا کە خۆیان باڵادەستن لە ئێراق، ئێران، سووریا، یەمەن، لوبنان و ..هتد هیچ ڕەوا نییە درێژە بەو ڕق و کینە بدەن، بەرکاربن لەوەى نەوەکانیان لەسەر ڕق و ڕقەبەرى لە سوننە و پێشەواکانیان پەروەردە بکەن، چونکە درێژەدان بەو ڕێبازە یەکسانە بە درێژەدان بە ماڵکاولى و جەنگ و دەربەدەرى و دواکەوتن، ئەمەش کارەساتە گەورەکەیە.
$دوو:$ کارەساتە هەرە گەورەکە ئەوەیە، ئێستا دواى زیاتر لە 1000 ساڵ ناکۆکى و دووبەرەکى و شەڕ و خوێنڕشتنى یەکدی، هێشتا سوننە و شیعە هەر خەریکى لێدانەوەى قەوانى کۆنن و ناتوانن لە مێژوودا نەژین، ئەوان تائێستاش بەدواى تۆڵەى خوێنى (حسێنی کوڕى عەلى) یەوەن؛ لە خەڵکانێک کە دوور و نزیک هیچ جۆرە پەیوەندییەکیان بەو تاوانە قێزەونە گەورەیە نەبووە کە لە ئەنجامیدا ئال و بەیتى پێغەمبەر بەدەستى بەناو خەلیفەیەکى ئیسلام لەنێوبران و کۆمەڵکوژ کران!
$سێ:$ باشە سوننە مەزهەبێک دواى 1000 ساڵ لەو ڕووداوە بۆچى بکوژرێت لە تۆڵەى نەوەکەى پێغەمبەرى ئیسلام؟! من نازانم ئەگەر لە هەمان خێزانی یەزیدیش بێت، دەکاتە چەندین پشت لەوەو پێش تاوانبارەکە کارەکەى کردووە و ئێستا نەوەى دەیەمى یان زیاترى بۆ سزا بدرێت؟
$چوار:$ ڕەنگە بڵێن جۆرێک لە بێویژدانى لەو نووسینەدا هەیە و ئێستا ئەو قۆناخەمان تێپەڕاندووە؟ منیش دەڵێم: ئەى ئەوەى باسم کەربەلایی چییە کە بەو شێوە هێرش بکاتە سەر هاوەڵانى پێغەمبەر (د. خ) ؟ مەگەر ئەوە زیندوێتى ئەو عەقڵییەتە نییە؟ باشە ئەى ئەوەى قەیس خەزعەلى، ئەمیندارى عەسایبى ئەهلى حەق لەسەرەتاى جەنگى کۆنترۆڵکردنەوەی موسڵ لەدەستى داعش لە مانگی تشرینى یەکەمى 2016 لەنێو ئاپۆڕایەکى ماتەمگێڕانى شیعە ل ەشارى حیللە، گوتى: ئازادکردنى موسڵ تۆڵەى خوێنى حسێنە، ئەرێ ئەوە بەڵگەى ڕوون نییە لەسەر ئەوەى نەیانتوانیوە واز لەو عەقڵیەتە بێنن؟!
$پێنج:$ ئەگەر کەمترین هێرش یان بێڕێزى بەرانبەر مەرجەعێکى شیعەکان بکرێت ئەوا چاوەڕێى یاسا ناکرێت و ب ەدەیان چەکدارى دەمامکدار هەن نەک هێرشکەرەکە، بەڵکوو شوێنەکەش بەسەریدا بسووتێنن، باشە ئەى کوا بۆ لێپێچینەوە لەو سروودخوێنە شیعەیە ناکەن؟ ئەى یاساى سزادانى ئێراقى قەدەخەى نەکردووە هیچ جۆرە بێڕێزییەک بەرانبەر ئایین و ئایینزاکان نەکرێت؟ بێدەنگبوون لەو هێرشەى کەربەلایى و بگرە پاساو هێنانەوە بۆى، ئاماژەى ڕوونن کە ئەوان نەیانتوانیوە لەو قۆناخە دەربچن.
$شەش:$ ئێستا هەر یەک لە شیعە و سوننە بانگەشەى برایەتى و یەکڕیزى و تەبایى دەکەن، ساڵانێکیش خەریکى کۆنفراسى نزیککرنەوەى هەردوو مەزهەبەکە لە یەکدى بوون و هیچ بەرهەمێکى وایان نەچنیەوە، باشە تاکەى هەر خەریکى ململانێى یەکتر دەبن؟ بۆچى هەمیشە کە لاواز دەبن داواى برایەتى و یەکڕیزى دەکەن؟ ئەى کە بەهێزن بۆ تەنیا بیر لە تۆڵە دەکەنەوە؟ ئەرێ بەڕاستى ئەوە فەلسەفە و دیدگاى پێشەوا حسێنى کوڕى عەلى و باوکى و خەلیفەکانى دیکەى ڕاشیدى و بگرە خودى ئیسلامە؟ پێم وایە ئەو ڕق و کینەیە پێچەوانەى ڕێبازى ئەوانە و یەکناگرێتەوە لەگەڵ ئیسلامى پیرۆز کە پڕە لە ئاشتى، تەبایى، لێبووردەیى و پێکەوەژیان.
$حەوت:$ پێویستە گەورە مەرجەعەکانى سوننە و شیعە زۆر بە جیددى هەوڵى چارەسەرى ناکۆکیى مێژوویى نێوانیان بدەن و چارەسەرێک بۆ ئەو کەلەپوورە دەوڵەمەندە بە ڕق و ڕقەبەریی نێوانیان بدۆزنەوە، ئەگینا تۆوى ڕقەبەرى هەر کوشتن و بڕینى لێ بەرهەم دێت.
بڕیارە باشەکە ئەوە بوو کە کەربەلایی نابێت بچێتەوە سەر میمبەری حسێن، ئەگەر جێبەجێ بکرێت، باشە.[1]