کومەڵگەها #تل بەنات#
ئەڤ کومەڵگەهە دکەڤیتە باکوورێ ڕۆژئاڤایێ باژێڕۆکێ #شنگال# و ئاکنجیێن ڤێ کومەڵگەهێ پێک دهێن ژ ئێزدی و موسلمانێن شیعە، هەرهۆسا چەندین جهێن پیرۆزێ ئاینێ ئێزدیان دکەڤنە کومەڵگەها تل بەنات و ساڵانە هژمارەکا مەزنا کەسان سەرەدانا وان جهێت پیرۆز دکەن و ب تایبەت ل مەها نیسان و گولانێ ژبەر کو ل وان مەهان توافێن ئێزدیانە خەلک ژ هەموو گوندێن ئێزدیان قەستا توافا دکەت و هەر کەسەک خزم و هەڤال و نێزیکێن خۆ داخواز دکەن، خەلکێ کومەڵگەها تل بەنات لدیف ئامارێن بەری هاتنا داعش بۆ شنگال ل ساڵا 2010 نێزیکی ( 14،000) چاردە هەزار کەسان بوون کو لدەمێ هاتنا داعش بۆ شنگال ب هزارەهان کەس ژ کومەڵگەها تل بەنات هاتن کوشتن و بێسەر و شوین کرن و ئەنفالکرن لسەر دەستێ دەولەتا ئیسلامی یا ب ناڤێ داعش، هەروەسا گەلەک خێزان ئاوەری باژێڕێن #دهۆک# و #زاخۆ# و #سلێمانی# بوینە و ئانکو کۆچکرینە بۆ وەڵاتێن ئەوروپی. (581) پێنچ سەد و هەشتی و ئێک کەس ژ کەمەڵگەها تل بەنات بووینە قوربانی دەستێ دەولەتا ئیسلامی یا ب ناڤێ داعش، کۆمەڵا وان کەسێن بوینە قوربانیێ #داعش#ێ 301 زەلام بوون 280 ژن بوون، 44 زەلام و 34 ژن هاتن ئەنفالکرن، 167 زەلام و 85 ژن هاتن بێسەر و شوێن کرن، 90 زەلام و 161 ژن هاتن ڕزگار کرن ژ دەستێ دەولەتا ئیسلامی ، گەلەک ژ وان کەسێن ڕزگار بووی نهۆ ل وەڵاتێن ئەوروپی و کوردستانێ ئاکنجینە، لێ د نهۆ کومەڵگەها تل بەنات گەلەک خزمەتگۆزاریێن سەرەکی د کێمن یانژی نینن وەکی ئاڤ و کارەب و رێکێن هاتن و چۆنێ، دەستپێکا ساڵاێن 2019 و 2020 دا گەلەک خێزان ڤەگەریانە مال و جهێن خۆ و هێدی هێدی خزمەتگۆزاری باشتر دبن . [1]