بۆ #حەسەن زیرەک#
هاوڕێیان..
گەلێک سبەینان پێش ئەوەی لەناو جێگە بێمە دەرێ ، شیعر وەک ژنێکی ناسکو نازدار خۆی دەخزێنێتە نێو نوێنەکەم. ئەم شیعری بەیانیانەش، وەک (کولێرە بەرۆنی کۆیە) وایە گەرم و نەرم و بە کونجیدارە. حەز ناکەم سارد بێتەوە ئەوسا بیخەمە بەردەمتان ، بۆیە بەو گەرمی و نەرمییە ، بۆخۆم و بۆ ئێوەی دەکەم بە بەرچایی.
حەسەن زیرەک
تۆ،
بڕۆ بۆ ناو دەریا و ببە بە بازرگان.
پێشانگایەک بکەوە،
دوڕو مەرجانی تێدا،
نمایش بکە.
من،
دەچم بۆ ناو مانگ و دەبم بە دەسگێڕ،
لە نێو عەرەبانەیەکی بچکۆلەدا،
ئەستێرە دەفرۆشم.
بەیەکەوە دەچێنە بەهەشت
تۆ،
فریشتەکان،
فێری موزیک بکە و
من،
غیلمانەکان،
فێری گۆرانی.
تۆ،
موجتەبا لەگەڵ خۆتا بەرەو
من،
حەسەن زیرەک.
ناوی نووسەر: #قوبادی جەلیزادە# [1]