ژ دایک بوویێ (1942) یە.
خەلکێ گوندێ (شێخکا) یە سەرب ناحیا (ئەتروش)ڤە.
شەهیدێ نەمر کورێ پێنجێ یە ژ حەفت کور و کچەکا (عەبدال نێچیرڤانى) کو ئێک ژ رویسپیێن گوندێ شێخکا و عەشیرەتا مزوریان دهاتە نیاسین، و هەر زووى مەیلداریا ڤێ بنەمالێ بۆ هەستا نەتەوایەتى و بزاڤا رزگارى خوازیا مللەتێ کورد خویا و پێش چاڤ ببوو، لدەمێ بارزانى نەمر ل تەباخا سالا (1945) سەرەدانا خۆ دا بۆ دەڤەرا بەهدینان، داخوازا دیدارا (عەبدال نێچیرڤانى) کرى و دگەل رویسپى و ماقولێن عەشیرەتێن بادینان ل گوندێ (مرێبا)، و ل وى دەمى (عەبدال نێچیرڤانى) پابەندبونا خۆ و کەس و کارێن خۆ نیشاندا بۆ رێبازا پارتى و بارزانى. و ئەڤێ بەلێنێ کو ژ هەستەکا روون و زەلال ب راستى و رەوایا دوزا مللەتێ کورد و ئەو زولم و ستەما دیروکى بڤى مللەتى کەفتى دهات، کارتێکرنەکا ئەرێنى هەبو ل سەر هەلویستێ ئەندامێن ڤێ خێزانێ، لەورا ژى پێشى ئاگرێ شورەشا ئەیلولێ هەلبیت، و پێشى یەک گولە تڤەنگ بتەقیت، (شەهید تەیمور عەبدال) دگەل هەڤالێ خۆ (یونس مامیزدینى) ل بەروارى #09-09-1961# گەهشتنە هێزێن بارزانى نەمر ل گوندێ (سەر زێرى) ل دەڤەرا بەروارى بالا لسەر سنورێ عیراق و تورکیا. و شەهید ى و برا و کەس و کارێن خۆ ب ئێک جارى کراسێ عەشیرەتگەریا بەرتەسک دراند و ئێدى کراسێ بەرفرەهێ نەتەوایەتیێ کرنە ل بەرخۆ، و کورد هەموو بونە عەشیرەتا وان و کوردستان ژى دایک و وەلات، و دەر ئەنجامێ ڤێ باوەریێ ئەوا روژ بۆ روژێ موکم دبو ددل و مێشک و دەرونێ شەهیدى دا، و رولێ وى ل شەرێن ئێک لدویڤ ئێکێن دەستپێکا شورەشێ و رزگارکرن و رامالینا دەڤەرێ ژ دوژمن و نوکەران روژ بۆ روژێ بەرچاڤ تر دبو، ژ بەر لێهاتن و زیرەکى و خۆ فیداکاریا شەهیدى، چەوا ببو جهێ باوەریا (بارزانیێ نەمر) و سەرکردایەتا شورەشێ، وەسا ژى ببو جهێ متمانە و دلنیایا پێشمەرگان ژ هەڤسەنگەرێن خۆ، ژ بەر سەخەلەتێن وى یێت کەسایەتى کو روحسڤکى و نەرمى و خو تەبایى ژ دیارترین روخسارێن وى بون، و ئەڤە شەنگەستێ موکم بوو بۆ وێ پەیوەندیا تایبەت دناڤ بەرا ڤى سەرکردەى و پێشمەرگێن وى دا، و ژ مەزنترین و گرنگترین خالێن سەرکەفتنا وى بن، وەکى سەرکردەکێ مەیدانى، تا شەهید گەهشتیە پلەیەکێ ببو هێما بۆ قارەمانیێ و مێرخاسیێ، و دەمێ ل دەڤەرێن دور ژى ئێکى ڤیابا خۆ دەربێخیت دا بێژنێ مادێ بیە (تەیمور) لێ ئەڤ دەنگ و باسێن قارەمانیا شەهیدى دەنگ ڤەدانا وان ب تنێ لناڤ شورەشێ و شورەشڤانا نەبو، بەلکو دوژمنى و نوکەرێن وى پتر هەست پێ دکر، و ناڤێ شەهیدى و هێزێن وى ببونە عەورەکێ رەش ل ئەسمانێ وان و ترس و دلراوەکیەکا بەردەوام بۆ وان دروست دکر.
و ئەڤ فیداکاریا شەهیدى و برا و کەس و کارێن وى نیشان ددا، یا بێ هەلسەنگاندن و رێزلێنان نەبوو ژ لایێ سەرکردایەتیا شورەشێ ڤە، و ب تایبەت بارزانیێ نەمر، ئەوێ ل دەمێ دەست نیشانکرن و دانانا پلە و پایا، بۆ یەکەیێن هێزێن پێشمەرگەى ل سالا (1962) پلا (سەرقول) ب برایێ مەزانێ شەهیدى (شەکر عەبدال) بەخشى، و پاراستنا دەڤەرا (شەمکانێ) پێرا سپاردى، و شەهید راسپارد ب پێکئینانا هێزەکا گورزە وەشێنا گەروک ل سەرانسەرى دەڤەرا #ئاکرێ# و شێخان، کو ئەرکێ وێ ئامادەباشى بیت بۆ لێدانا هێزێت دوژمنى و بەرهەنگاربون دژى هێرشێن وى ل دەم و جهێن پێتڤى.
ل چریا ئێکێ یا سالا (1963) و دەمێ حزبا بەعس ب کودەتایا لەشکەرى رابى ل 08-02-1963 و دگەل رژێما سوریێ رێکەفتى بۆ لێدانا شورەشێ، و بهاریکاریا لەشکەرێ سورى هێرش کرینە سەر دەڤەرا شەمکانێ، شەهیدى و برایێن وى و کەس و کارێن وان و ژمارەکا سنوردار ژ پێشمەرگان، مەزنترین بەرخودان نیشاندا و ب ژمارەکا کێم یا چەک و تەقەمەنیێ، شیان سینگێ دوو سوپا کو یێ سورى ب سەرکردایەتیا (فهد الشاعر) بو دگەل هێزێن جاشان و ژمارەکا زور ژ تانک و فروکان بگرن، و (13) سەربازێن سورى ژ بلى یێن عیراقى و جاشان بکوژن و شکەستنێ بڤێ هێزا مەزن بینن.
ل سالا (1965) شەهید ب گرانى دهێتە بریندارکرن ب بومبارانەکا فروکێن دوژمنى ل گوندێ بیرێ، و ژ لایێ دکتورێ شورەشێ (ئیشو)یڤە دهێتە دەرمان کرن، و دەمێ دوژمنى خەبەرێ برینداربونا شەهیدى زانى، ب چەند روژەکێن دى ڤیا شەهیدى، شەهید بکەن لەورا چەند فروکە یێن دى گوندێ بیرێ بوردومان کرەڤە، و د ئەنجام دا خویشکا شەهیدى (مسریخان) و کچا وێ و دوو نەڤیێن وێ یێن زاروک دگەل زاڤایێ وێ (عادل حسێن شێخکى) کو پسمامێ شەهیدیە دهێنە شەهید کرن.
ل سالا (1967) و لدەمێ دروستکرنا تەشکیلاتێن هێزێن لەشکەرێ کوردستانێ ب شێوەیەکێ سەردەم، شەهید دبیتە فەرماندێ بەتالیونا (4) ل هێزا شێخان، و برایێ وى یێ مەزن دبیتە فەرماندێ بەتالیونا (1)، ل وى دەمى سەرکردێ ناڤدار (حسو میرخان) ببو فەرماندێ هێزا شێخان،پێشى برایێ شەهیدى (شەکر عەبدال) ببیتە جێگرێ (حسو میرخان دولەمەرى) وەکو جێگرێ فەرماندێ هێزا شێخان.
ل سالا (1969) و پشتى قەتلوعاما گوندێ دەکان ژ لایێ هێزێن دوژمنى ڤە کو (76) ژن و زاروک و پیر دبنە قوربانى، بارزانیێ نەمر فەرماندا تولا وان شەهیدا بهێتەڤەکرن، شەهید ل شەرێ (گرێ گاى) ل دەڤەرا ئاکرێ ب سڤکى دهێتە بریندارکرن.
ل سالا (1971) و لدەمێ رێکەفتنا (11) ئادارێ شەهید دبیتە بەرپرسێ هێزەکا پاراستنا سنورى وەکو (ئامر سریە).
ل سالێن (1972، 1973) دا و دەمێ نوکەرێن دوژمنى بوینە داردەستێ دوژمنى بۆ تێکدانا رێکەفتناما (11) ئادارێ شەهیدى و بەتالیونا وى رولێ هەرە سەرەکى هەبو بۆ لێدانا ڤان نوکەرا ل دەڤەرێن ئاکرێ و تێکدانا هێزێن وان و ژ چەک کرنا وان.
ل سالا (1972) پسمامێ شەهیدى (عمر رەمەزان حسن شێخکى) شەهید دبیت ل دەڤەرا ئەتروش.
هەر ل گەل دەست پێکرنا شەرى بۆ جارەکا دى ل بهارا سالا (1974) هێزا شێخان و ب تایبەت بەتالیونا (4) رولەکێ سەرەکى هەبو د بەرهەنگاربونا هێزێن دوژمنى و لێدانا وان، لێ جهێ داخێ یە شەهید و لدەمێ د پشویەکا رەسمى دا ل مال و خەبەرێ هێرشکرنا هێزێن دوژمنى بۆ سەر گوندێ (باعەدرێ)، شەهید پشویا خۆ ڤەدقەتینیت و بەرەڤ باعەدرێ دچیت ل پێشیا هێزەکا پێشمەرگەى، و ل شەڤا 13لسەر14-06-1974 دگەل دوو هەڤالێن خۆ (عیسا بانى) و (عەزیز عەلى شەهى) دهێنە شەهیدکرن، و گیانێ خۆ دکەنە گورى کوردو کوردستانێ. و خەبەرێ دل تەزینێ شەهید بونا (تەیمور شێخکى) هەموو کوردستانێ ڤەدگریت، و شادیەکا بێ سنور دوژمن نیشانددەت، و بۆ ماوێ (8) روژان ئیزگێ (الحکم الژاتى) یێ رژێمێ خەبەرێ شەهید بونا شەهیدى بەلاڤ دکەت، و هەر پشتى چاردە روژان شەهید (نورى عبدال شێخکى) کو برایێ شەهید (تەیمور) یە دگەل کەس و کارێن شەهیدى و هەڤالێن وى یێن پێشمەرگە تولا شەهیدى ڤەدکەن، و گوندێ باعەدرێ رزگاردکەنەڤە و (12) ژ نوکەرێن دوژمنى دکوژن، و شەهید ب درێژاهیا (14) سالێن پێشمەرگاتیێ بەشدارى د (95) شەران دا دکەت و دوو جاران بریندار دبیت وچەندین جاران ب نوسراو ب بروسکە رێزوسوپاسیێن بارزانیێ نەمر دگەهنێ، ناڤدارترین شەرێن وى ئەڤەنە :
1- ل ئەیلولا سالا (1961) شەرێ بامەرزێ.
2- ل سالا (1962) شەرێن (مرێبا و سەرێ بریفکا و مێرسیدا و لومانا) و دیسان شەرێ رزگارکرنا ناحیا ئەتروش د هەمان سال دا، دیسان هەر لڤێ سالێ ئانکو سالا (1962) شەرێ (گڤارا) کو ب سەرپەرشتیا راستەوخۆ یا بارزانى نەمر بوو.
3- ل چریا ئێکێ سالا (1963) شەرێ لەشکەرێ سوریێ ل شەمکانێ و دیسان ل هەمان سال شەرێن هیتوت ۆ تلسقوف.
4- ل سالا (1964) شەرێ گەلى قێرکى.
5- ل سالا (1967) شەرێ بیرو باسفرێ.
6- ل سالا (1969) شەرێ سەرێ کوخیێ و د هەمان سال دا شەرێ خورت و دەکان.
7- ل سالا (1972) شەرێ خەرجافا (گوندەکە ل دەڤەرا ئاکرێ).
8- ل سالا (1973) شەرێ ئێسفنێ.
9- ل سالا (1974) شەرێ خوشاڤا.
10- ل 13-06-1974 شەرێ باعەدرێ کو دڤى شەرى دا شەهید دبیت.
لرێکەفتى ( 13-06-1974 ) دەمێ هێرشا پێشمەرگەى بو سەر دەڤەرا باعەدرێ تێتە شەهید کرن و جەنازێ وى ل گوندێ بلان هاتیە ڤەشارتن و دگەهیتە کاروانێ نەمرا.
پلە : پ.م/ئامر بەتالیون
لێ ب شەهید بونا ڤى قارەمانى خەباتا ڤێ خێزانێ راناوەستیت و کاروانێ شەهیدێن وێ بەردەوام دمینیت ل پێناڤ کوردو کوردستانێ. ل سالا 1988 برایێ شەهیدى (نورى عەبدال) ئەوێ پشتى وى بویە ئامر بەتالیونێ (4) ل جێژنیکان دهێتە گرتن و دهێتە سێدارەدان و برازایێ شەهیدى (سەگڤان جهور عەبدال) ل سالا (1995) ل شەرێ دژى (پەکەکێ) شەهید دبیت و دوو پسمامێن وى ل سالێن (1996، 1997) (عەلى خالد شێخکى و عارف خالد شێخکى) شەهید دبن و ل سالا (1997) دیسان (ئەحمەد رەشید شێخکى) شەهید دبیت و شەهید تەیمور ل پشت خۆ (4) کور و (2) کچان ژ بلێ هەڤسەرا خۆ بجە هێلاینە،کو جێ شانازیێ کورێن وى ل سەر رێبازا پارتى و بارزانى د بەردەوامن و سوپاس بۆ خودێ کادرێن لێهاتى لێ چێبوینە و دپلە و پایەێن بەرزدانە.