کورد دلۍ چەرخەکا تاریخینە
بەشۍ: دوەسەڎ و سی و نۊهەمە
نویستەی: #هاوڕێ باخەوان#
ساڵەو (1910. ز):
* ئەچی ساڵېنە، چن کوردێ ئەشناسیێ، چانېشان: کوێر حوسێن پاڎشا میرو ئەواجیکی، یاوێ سەرو مەرزی و ڕەمێ، لوێ پەی (ماکۆ)ی، هەم تەیموور پاشا و ئەمین پاشایچ ڕەمێ.
* ئەچی ساڵېنە، عوسمانییەکۍ ناوچەو بارزانیشان چۊڵ کەرد، تاکو بتاوان خېزیاکەو بەدلیسی سەرکۊت بکەران.
* ئەچی ساڵېنە، ناوچەو بەدلیسی ڕاپەڕین سەرش هۊردا، بە سەرداری خەلیفە سەلیم عەلی و موسا بەگ.
* نویسەرێ ئەڵمانی بە نامۍ (شترێک)، وتارێش دلۍ گوڤارو ئاشوورەوانینە وەڵاکەردۆ، کە هۆڵۍ ئانەیشە دێنۍ وەڵاتو کوردەسان و ئەرمەنستان و وەرنیشتو ئێرانی سەردەمو بابل و ئاشووری چېرو ڕۊشنایی ئا سەرچەمە بابلی و ئاشووریانە کە بە هېڵەی مېخی نویسیێنۍ، وەرچەم بوزۊن.
* ئەچی ساڵېنە، عەبدولڕەزاق بەدرخان گېڵانۆ پەی ئەستەمبوڵی.
* ئەچی ساڵېنە (تی. فاوڵ) گەشتێش پەی کوردەسانی کەردېنە.
* ئەچی ساڵېنە (نالە پێ پان) وەربەرەو سەراو سلێمانینە، داگیرکەری تورکی دان قەنارە، ئازایانە لوان وەردەمو قەنارەکەی و کورسیەکەو چېریش فڕەدان تاکو خنیکیۊ.
* شاکیر فەتاحی نویسەر، ئەچی ساڵېنە ئامان دنیا.
* میرزا مەحمووڎی موزیکژەن، ئەچی ساڵېنە ئامان دنیا.
* ئەچی ساڵېنە، ۋەرۋێ فرۍ دلۍ کوردەسانینە ۋارێنە، کەش و هەوا فرە سەخت بییەن.
* ڕامیار و نویسەر (قاسم حەسەن)، ئەچی ساڵېنە جە شارو بەغڎای ئامان دنیا.[1]