کورد دلۍ چەرخەکا تاریخینە
بەشۍ: سەڎ و ۋیس و یەرەمە
نویستەی: #هاوڕێ باخەوان#

ساڵەو (1798ز): ئی تۊمارۍ ئینێ وەردەسەنە:
* حەمدی شاعېر ئەچی ساڵېنە ئامان دنیاوە.
* جەنگێ میانون حوسێن قولیخانی و جەعفەر قولیخانی میرانو دونبولینە قۊمیان، کە هەردوېشان برێ بیېنۍ، چا جەنگەنە جەعفەر مەڕیان و بەرشېیەن و وېش یاونان کەشو هەکاری.
* حوسێن قولیخان، میرو دونبولی ئەچی ساڵېنە کۊچی دمایینش کەردەن، ئی میرە دەسێ باڵاش بېیەن جە زانستو دەوایی و ئەڼازەیی و هەسارەئەشناسینە.
* تورکەکۍ بە فڕ و فېڵ تاوانشان سەردارو هۊزو (بانۆک)ی بوکشان، دماتەر کوڕەکەیش بوزان یاگېش، پی تەرزە تاوانشان دەسبگېران ملو هۊزو بانۆکی و ناوچەکێشارە.
ساڵەو (1799ز): ئی تۊمارۍ کە پېوەڼییشان هەن پی تاریخەیۆ، پەی ئېمە مەنېنێ:
* ئامای دنیای میر و شاعېر خەسرەوخانو ناکامی، کە کوڕو ئەمانوڵڵاخانو ئەردەڵانېیەن.
* ئەچی ساڵېنە جەنگێ میانو مورادخان میرو ئامێدی و قوبادبەگی برایشەنە کە فەرمانڕەواو زاخۆی بییەن، قۊمیان، والی موسڵی میانجی کەردېنۍ.
* خەسرەوخانی گۆرە، میرو ئەردەڵانی کۊچی دمایینش کەردەن.
* کتېبەکەو (بێرگ)ی ئەچی ساڵېنە وەڵا بېیەنۆ، کە باسش جە کورد و کوردەسانی کەردەن جە ئەڵمانیا.
* ئۆڕەحمان پاڎشاو بابانی، بە فەرمانو والی بەغڎای، پېسە حاکمو هەریر و کۆیەی مەرزیانەرە، مامۊزێوەچش دەسەڵاتو بابانیش پەنە بەخشېیان.
[1]