کورد دلۍ چەرخەکا تاریخینە
بەشۍ: دوەسەڎ و شەسس و یەرەمە
نویستەی: #هاوڕێ باخەوان#
ساڵەو (1917ز.):
چن تۊمارێ پېوەس پی ساڵېوە ئینێ وەردەسەنە:
* پایېزو ئی ساڵۍ، ژڵېوەو کوردایەتی ناوچەو بەدلیسیش گېرتۆ.
* ئەچی ساڵېنە، گردەلیڤسکی کتېبو دنیاو موسوڵمانیش جە پتروگراد وەڵاکەردۆ، دلېشەنە نویستەنش: عەبدولڕەزاق بەدرخان سەروەختو دە ساڵەی دمایینو ژیوایشەنە پېوەڼیێ سەرەمڕەش چەنی کوردەکانو بەشو سەرنیشتی و وەرکۆتی بۍ، زیاتەریچ چەنی سمکۆی جە وەرکۆت و چەنی کوڕ حوسەین پاشا و شېخ عەبدولقادی شەمزینی و سەید تەهای شەمزینی جە سەرنیشت، جە گردو جم و جووڵەکا وېش هاگاڎارېش کەردېنۍ و وېش و هامکارەکېش هۆڵۍ دېنۍ نەتەوەو کوردی چېرو دەسا هەر دوە حکومەتە زۊردارەکانە ڕزگار بکەران، عەبدولڕەزاق بە تەمامی سمکۆش چانەیە دڵنیا کەردەبۍ کە بڕواش بە ڕووسی بۊنەو پېسە لاگیرێ کوردی ئاماڎەن پاڵپەشتیش بکەرۊنە.
* ئەچی ساڵېنە، مار شەمعون پەنج هەزار چەکدارېش بېنۍ.
* هونەرکاری وېنەکېش، عەزیز سەلیم ئەحمەد ئەچی ساڵېنە دلۍ شارو سلێمانی ئامان دنیا.
* ئەچی ساڵېنە، شېخ لەتیف بەرزنجی بە دنیا ئامان.
* عەلی ئیحسان پاشا، ئەچی ساڵېنە ئامان پەی سلێمانی، یانەو حاجی مەلا سەیدی کەرکوکلی زادەی وەستەنەرە.
* تاهیر بەگو جافی، ئەچی ساڵېنە جە شارو سلێمانی کۊچی دمایینش کەردەن، دماتەر تەرمەکەش بریانۆ پەی هەڵەبجەی.
* ئەچی ساڵېنە، ئەحمەد عوسمان بېیەن بە سەرۆکو شارەوانی هۆلېری.
* ئەدیبی شاعېر، ئەچی ساڵېنە کۊچی دمایینش کەردەن.
* هامنو ئی ساڵۍ، ژڵېوەو ڕزگاریوازی کوردی جە پانیشتو وەرکۆتو ئەنادۆڵیۆ دەسش پەنەکەرد.[1]