#میرزای لوڕستانی#

کۍ دېیەن جەی وەر قەدیم ڕۊزگار
بەندی ببەندۊ بە وېنەی پەروار
حاڵا جە تەقسیر گونات وېیەردم
جە مەودای ئەڵماس خەڵاست کەردم
بەڵۍ ئاگات بۊ جەی دماش وەنە
بە غەیرەز دۇ نان مەدەرەش پەنە
نەعەم وات ئەمیر زیندان بېقەرار
ڕەوان بی لوا بەکر بېمەدار
مونقەتېع کەردن خۆراکی خاتۇن
مەم مودەتێ مەند زەبۇن بی زەبۇن
ئین بار بە ئەمرێ بەنای بېھتەرین
بواچۇن فەردێ جە قەرەتاجدین
ڕۊیێ نېشتەبۍ میر زینەدین کار
ئاوەردش نە دڵ ئارەزۇی شکار
فەرما تا ئەسپش ئاوەردن دەردەم
ڕەوان بی ئەمیر چەنی خاس و جەم
سە ڕۊ جە شکار ناما میر زەیندین
نگاە کەر وە ئەمر بەنای بېھتەرین
خاتۇن نە ڕۇی کۊشک نېشتەبۍ غەمین
ناگاﮪ پەیدابی گەردێ جە زەمین
دېیاردا عەفۆ و چەکۆ با بەنگین
ئەسپان مەتازان نە ڕۇی سەرزەمین
زین کە واقېف بی جە ئامای یاران
ئاوازکەرد یاران چاپۇک سواران
پەی چېش مەتازید ئەسپان نە ڕۇی دۇن
ئەمیر نە زیندان زەبۇنەن زەبۇن
نامۇستان کەمە مەردانی سەروەر
ھەنی پەی مەردی نەوینان کەمەر
یە چەندێ وەقتەن چەم نە ڕاتەنان
ڕۊحش نە قەیران یەوم ئەلماتەنان
دەریغا دەریغ پەی زەلیلی مەم
حەسرەت وا حەسرەت جەی زوڵم و ستەم
بېداد ھەی بېداد جە ئی بېرایی
ھانا سەد ھانا جەی بېخودایی
ئاخم پەرۍ تۊ بۍ قەوم و بۍ فەرد
داخم پەرۍ تۊ دڵ مینای بېگەرد
شەداد ئەی کارە وە کەس نەکەردەن
بۍ گوناە شایێ یاوۊ وە مەردەن
یاران چۇن ئەژنین تەمام خیرە بین
فرۇد جە ئەسپان نامان وە زەمین
دەستکېشان وە تېغ ھەر یەک جە لایێ
ھەر یەک بە مەساف چۇن ئەژدەھایێ
ئامان وە قاپی ئەمیر بۍ مەدار
واتشان ئەمیر شېیەن وە شکار
پېچان عەنانان سوارانی داو
شین وە ڕۇی بیرۇن بە تەعجیل و تاو
مەگېلان نە ڕۇی سەحرا وە شتاو
ناگاﮪ میر زینەدین دېیاردا جە ڕاو
ئەمیر چۇن چەمش گنا وە یاران
لەرزا وېنەی بید چۇن بېقەراران
ڕۇکەرد وە بەکر چېشت هەن تەدبیر
ئەم جار بە دەستی یاران مەدین گیر
ئاما وە ڕازان بەکر جەو دوما
چارەش ھەر ئېدەن ئېدەنان سەڵڵا
بە پای پیادە سەر لوخت و عوریان
ببەندە شەمشېر چۇن گەردەنکەشان
[1]