سەفەرو مەولانا خالیڎی نەقشبەڼی جە هۆرامانۆ پەی شامی

دمای گېڵایۆ مەولانا خالیدی پەی شارو سلېمانی سەرو داواکاری و تەکلیفو مەحمووڎ پاشاو بابانی، دلۍ خانەقاو مەولاناینە دەسش کەرد بە ئیرشادو تەدریس، مەنەیۆش پەی ماوەو شش ساڵا، بەڵام ئیتر دیسان بارو زرووفەکە تېکشی و گرفتو میانو دەسەڵاتدارا بابانی زیاتەربی و هەم ناحەزەکۍ مەولانای کۆتۍ تۊمەت پەخشایۆ پەی مەولانای، بە تەمامی دڵش جە شارو سلېمانی هۊرکنیاو قەرارو جیائاستەی یەکجاریش دا. ئاوەختە مەولانا دلۍ هەوارەکا هۆرامانینە ژیوۍ، مەحمووڎ پاشاو بابانی دیسان لواوە خزمەتش، تەکلیفێ فرەش وەنەکەرد بگېڵۊوە پەی سلێمانی، بەڵام مەولانا سەرو بنەماو ئا فەرمایېشتۍ حەزرەتیە (د.خ) کە فەرماوۊ (ئیماندار دوۍ جار ۋڵێوەنە نمەگەزیۊ) داوا و ڕجاکۍ مەحمووڎ پاشایش ڕەڎە کەردۆ، بەخاترەو ئانەی ئاژاولۍ و جەنگ و جڵەبەی زیاتەر ڕوە نەکەرۊن وەڵاتی، عوزرېش پەی ئاردۆ، ئیتر هەر چاگۆ، جە هۆرامانۆ ڕاو (دەیروزوور) یۊ تەشریفش لوا پەی (شام)ی، ساڵەو (1238ک) یاوا شام.
مەولانا خالیدی نەقشبەڼی تەشریفش یاوا وەڵاتو شامی
بە یاوای مەولانای پەی ئاگەی، پېسە میر و پاشێوە دەسەڵاتداری پېشوازیێ گەرم و زەریف کریا، مەڵڵێ ئایینیۍ و زانێ نامڎارۍ و پیا ماقووڵۍ جە گرد لایێوە پەی پېشوازیش حازرۍ بېنۍ، چوونکوم زانېنۍ مەولانا چ گۆهەرێن، چ گەنجینێوە زانستی و ئیمانین. دمای ئانەی تەشریفش مەرزیارە، دەسشکەرد بە ئیرشاد، هەرچی زانێ و مەڵڵێ خاوەن عیلم و ماریفەتۍ بېنی سینەو وېشان وەردەمو حزورو مەولاناینە کەردۆ، پەی ئانەی جە ئیرشاد و زانست و نوورو دەروونیش سوودگېران. ئەچاگە نەک هەر ئیرشادو تەریقەتی و سوفیگەری، بەڵکوم دلۍ مەدرەسێ گۆرەینە زانستە دینیەکا واچېوەو فەقیۍ گردلایێوە ئېنۍ پەی خزمەتیش، هەم خەریکو ڕیوایەتو فەرمایېشتە شەریفەکا حەزرەتی بۍ. هەر کەسېو تەماشەو حەڵقەو دەرسو مەولانایش کەردێ ئەجېش بوخاری زیڼەبېیەنۆو ڕیوایەتو حەدیسەکا کەرۊن، ئەجېش شافیعی زیڼەبېیەنۆو خەریکو بەشکەردەی ئەحکامە شەرعیەکان، گەر کەسێچ دلۍ حەلقەو سلووکیشەنە نیشتێرە ئەجېش ئیمامی ڕەببانینو خەریکو ئیرشادو سالیکان.
ئەسعەد ڕەشید.[1]