$هیچ شتێک لە سەربەخۆیی بەنرختر نییە$
#کاوە ئەمین#
#19-07-2017#
بەیانییەکی ساڵی 1985، لە مەوقیفێکی پاسەکانی ئازادی لە شاری #سلێمانی# چاوەڕێی پاسم دەکرد، بە عەموودێکەوە پارچە کاخەزێک کە بە سیکۆتین پێوەی لکێنرابوو سەرنجی ڕاکێشام، کاتێک چوومە پێشەوە نەخشەیەکم بینی لە ناوەڕاستیدا نووسرابوو کوردستان، لە دامێنی کاخەزەکەدا نووسرابوو پارتی سۆسیالیستی کورد - پاسۆک. ئەوە یەکەمجارم بوو نەخشەیەک ببینم کە کوردستانی بەو گەورەییە لەسەر نەخشێنرابێت. ئیدی ئەو نەخشەیە لەمێشکمدا چەسپی. ساڵێک دواتر بە ئەدەبیاتی پاسۆک ئاشنابووم و زانیم ئاڵای سووری کوردایەتی چییە!
دواتر لە سوید، زیاتر لە نرخ و بەهای سەربەخۆیی و دەوڵەت تێگەیشتم، دەمبینی خەڵکی وڵاتانی جۆربەجۆر چۆن وڵاتی خۆیان خۆشدەوێت، چۆن ڕێز لە ئاڵای خۆیان دەگرن و پاش چەندین ساڵ ژیان لە سویدیش هێشتا حەزیان لە دەنگی دەهۆڵی وڵاتەکانی خۆیانە. باشووری کوردستان فیدراڵیەتی ڕاگەیاند و بەهەموو کەموکوورتییەکانییەوە دەرگایەک بوو بەرەو سەربەخۆیی یەکجاری. شەڕی براکان هەموومانی تاساند و هەموومانی شەرمەندە کرد، ڕەخنەبارانی دەسەڵاتی کوردیمان کرد، بەڵام وڵاتمان زیاتر لا شیرینتر بوو.
لەوێ لە نزیکەوە بە ئەدەبیاتی #پەکەکە# ئاشنابووم و هەندێک لە کادرە دڵسۆزەکانیم ناسین، باسی یەکگرتنەوەی هەر چوار پارچەی کوردستان بەتەواوەتی مەستی کردین، ئەگەرچی هیچ کاتێک ئەندامی ئەو حیزبە نەبووم، بەڵام دروشمەکانی بۆ من هێندە گەورەبوون، وامدەزانی فریای ئەوە ناکەوم بەردێک بخەمە سەر بەردی سەربەخۆیی و ئەوان دیوارەکە تەواو دەکەن. تەنانەت گەیشتبوومە ئەو بڕوایەی کە دەبێت لەکاتی ڕاگەیاندنی دەوڵەتی کوردستاندا تا چەند ساڵێک یەک پارت و یەک سەرکردە هەموو سنوورەکان بگرن تا کوردستان دەکەوێتە سەر پێکانی خۆی.
ڕۆژنامەی سەرخۆبوونی پەکەکە کە هەمووی بە تورکی بوو تەنیا یەک دێڕی نەبێت بە کوردی کرابووە دروشمی ڕۆژنامەکە، ئەویش بە خەتێکی سوور نووسرابوو: هیچ شتێک لە سەربەخۆیی و ئازادی بەنرختر نییە!
تورکیم نەدەزانی، بەڵام لەبەر ئەو دێڕە کوردییە پڕ ناوەرۆکە، ڕۆژنامەکەم دەکڕی. ئیدی زیاتر ڕقم لە وشەی ئۆتۆنۆمی، ئۆتۆنۆمیی ڕاستەقینەش دەبووەوە کە سەردەمانێک دورشمی سیاسی پارتەکانی باشووری کوردستان بوو.
کەچی لەپڕ وەکوو کاسەیەک خۆڵ و دۆ بەسەرماندا بکەن، پەکەکەش دەستبەرداری سەربەخۆیی بوو، ئیدی سەربەخۆیی کوردستان لایان بووە پڕۆژەیەکی کۆنەپەرستی، پڕ بە گەروویان هاواریان کرد باوی باسکردنی دەوڵەتی نەتەوەیی نەماوە و ئەوە بیرکردنەوەی ناسیۆنالیزمی سەرەتاییە.
باسکردنی سەربەخۆیی لە ماوەی ئەم چەند ساڵەی دوایدا بوو بە دروشمێکی چەپسپاو لای سەرۆک #مەسعود بارزانی# و لە زۆر بۆنە و وتاری جیاوازدا دووپاتی دەکردەوە. بەڵام ئەوانەی کە لەسەر تیۆری ڕووخانی دیواری ماڵی بارزانی سیاسەتیان کرد، کەوتنە دژایەتی و لاقرتێکردن، ئەو قسانەیان بە سەربەخۆیی بەهاران و لەو شتانە دەدایە قەڵەم، بەتایبەتی لایەنگرانی پەکەکە و هەندێک حیزب و بزووتنەوە، پەکەکە هەتا داوای سەربەخۆیی دەکرد، کوڕێکی دیکە بوو، هەرچەندە ڕیفراندۆم لە کوردستان هیچ پەیوەندییەکی بە پەکەکەوە نییە، بۆیە دژایەتی پەکەکە بۆ ڕیفراندۆم بە وەکالەتە.
ئێستا کە شتەکە بووە بە جددی و بڕیاری لەسەر دراوە و دەبێت گشتپرسی بکرێت، دەڵێن ئەمە پڕۆژەی پارتییە، پارتی دەیەوێت بیکات بە دەستکەوتی خۆی. ئەوەی جێگای تێڕامانە ئەوەیە کە یەکێتی ناتوانێت خۆی یەکلایی بکاتەوە، لە کاتێکدا ئەوان دروشمی مافی بڕیاردانی چارەنووس بە مۆنۆپۆڵی خۆیان دەزانن و دەڵێن کۆپی ڕایتەکەی هی خۆمانە، دەی برادەرینە کەواتە چاوەڕێی چین، بۆ نایکەن بە پڕۆژەی خۆتان؟
ڕیفراندۆم و سەربەخۆیی موڵکی هیچ پارتێک و تاکێکی کورد نییە بەتەنیا، بەڵکوو پڕۆسەیەکی نەتەوەییە کە تەنیاوتەنیا کەرامەتی کورد بە سەربەخۆیی دەپارێزرێت بە ئێراقچییەکانیشەوە، ئاخر ئەگەر باشووری کوردستان لەسەر ئێراق نەبێت، کێ حساب بۆ ئەو مقاشانە دەکات.
ئەگەر هەموو پارتەکان پێکەوە لەگەڵ ڕیفراندۆم و سەربەخۆیی بن و خەنجەرەکانیان لە کێلان دەربهێنن بۆ پاراستنی دەوڵەتی کوردستان و پشتی یەک بگرن باشە، باشترە پێش ئەوەی هەرشتێک بین کوردبین، بەڵام کە بەشێک نەبن و نەیانەوێت، دەبێت سەرۆک مەسعود بارزانی ئەو هەنگاوە بهاوێت و چاوەڕێ نەکات، سەد ساڵە چاوەڕوانین، ناکرێت نەوەکانی داهاتووشمان سەد ساڵی دیکە چاوەڕێ بن.
دەوڵەتی کوردستان لە گوندێکیش بێت ڕابگەیەنرێت باشترە لەوەی کە ڕانەگەیەنرێت. ئازەرییەکان پەندێکیان هەیە دەڵێت: 'ساڵی جارێک دەمانەوێت نوێژێک بکەین، بەڵام شەیتان لێ ناگەڕێت.، ئێستا کورد کە دەیەوێت بۆ یەکەمینجار بەردە گەورەکە بهاوێت، پیاوە گچکەکان ڕێگریی دەکەن، بۆیە ناکرێت چیدی چاوەڕێ بکرێت.
خۆ ڕەنگە بەخێرایی هەموو گرفتەکانی کورد بە دامەزراندنی دەوڵەتی کوردستان چارەسەر نەبن، بەڵام لەو دەوڵەتەدا دەتوانین هەموومان کار بۆ یەکسانی و دادوەریی کۆمەڵایەتی و خۆشگوزەرانی بکەین، ئاخر کوردستانێکی ئازاد، یەکسانیی دەوێت، یەکسانیش بەبێ سەربەخۆیی و ئازادی بەدی نایەت. [1]