دیدار: دلۆڤان هالۆ
(خەیری یوسڤ) برایێ مەزن یێ هونەرمەند (ئەیاز یوسڤ)ی بۆ مالپەڕێ (خەدەنگ) گوت: ” هونەرمەند (ئەیاز یوسڤ ئەحمەد) ژ بنەماڵا ڕەزڤانانە، ل ڕێکەڤتى (1960/2/20)ێ ل کولانا جۆهییان ل باژێڕێ (زاخۆ) ژ دایک بوویە، قوناغا سەرەتایى ل قوتابخانا (ئەحمەدێ خانى) خواندى یە و قوناغا ناڤنجى ل قوتابخانا (بەدرخان) خواندییە، قوناغا ئامادەیى یا (کشتوکاڵ)ێ ب دوماهى دئینیت و ب زۆری ل پەیمانگەها (دەباباتان) ل (تکریت) دهێتە وەرگرتن، ژ بەر زیرەکى یا وى دبیتە سەرکەڤتیێ ئێکێ ل سەر پەیمانگەهێ و پلا (میلازمێ ئێکێ) ب دەستخۆڤە دئینیت”. زێدەتر گوت: ” هەر ل قوناغا سەرەتایى حەزا ستران گوتنێ ل دەڤ ئەیازى پەیدابوو، ل قوتابخانە و جڤات و شەهیانان ستران دگوتن، ل ساڵا (1981)ێ ئێکەم بەرهەمێ خۆ ل ستودیوا (بابێ مێهڤانى) تۆمار کر، پتری (150) سترانان هەنە، گەلەک حەز ژ سترانێن فلکلورى دکر و نێزیکى (500) سترانێن فلکلورى ژ بەر بوون، کۆ جارەکێ ل شەهیانەکێ ژ سپێدێ تا کۆ درەنگی شەڤ بێ دووبارە سترانێن فلکلورى دگوتن”. ناڤهاتی، ئاماژە ب وێ چەندێ ژى کر: ” ئەیاز گەنجەکێ زیرەک و تێگەهشتى بوو، بیردانکەکا بهێز هەبوو، ژبلی ستران گوتنێ شیانێن زارڤەکرنێ ژی هەبوون، هەر کەسەکێ (5) خۆلەکان ل دەڤ ڕۆینشتبا د شیا ب دورستاهى زارڤەکرنا دەنگ و لڤینێن وى بکەت، هەروەسا کەسەکێ بێ زیانبوو، چ جاران دلێ کەسێ نە د هێلا، ب ئانەهیا خودێ دێ ژیانناما وى کەمە پەرتوک”.
ل دوماهیێ ژی گوت: ” ل ڕێکەڤتى (1986/1/20)ێ ژ ئەگەرێ گوتنا سترانێن نەتەوەیى ب تایبەت سروودا (نەورۆز)ێ و سترانا (چ بکم ئەز ؟) ل نەخۆشخانا (مۆصل) ڕژێما بەعس خوینا هونەرمەند (ئەیاز یوسڤ)ی ژەهرکر، چونکى ئەگەر وى بتلەکێ خوینێ بەخشى با دا (15) ڕۆژان دەستویریا فەرمى وەرگریت، ژ بەر هندێ گەلەک جاران ژ بەر شەهیانا هەڤالێن خۆ بتلەکێ خوینێ د بەخشى، داکو دەستویریێ وەرگریت و بچیتە شەهیانا وان، لەوما ڕژێمێ ئەڤ ڕێکە ب دەلیڤە دیت کو خوینا ئەیازى پێ ژەهر بکەن”.[1]