Ma #Efrîn# Keça Jinbavê ye?
Hoşeng Hesen

Kesekî ji me êrîşa dewleta tirk a dagirker li ser herêma Efrînê ya Rojavayê Kurdistanê ji bîr nekiriye, êrîşa ku di encamê de ew herêma kesk û tijî dar û zevî hat dagirkirin û bi sedan sivîlên bêguneh jiyana xwe ji dest da, di heman demê de gelek şervanên YPGê û YPJê yên ku bi qehremanî li beramberî dûyemîn artêşa NATOyê li ber xwe dan, şehîd bûn.
Li ser dagirkirina Efrînê ji aliyê artêşa Tirkiyê ve zêdeyî 6 mehan derbas bû, ne hejmareke ku hema wisa mirov bibêje û derbas bibe, ji ber her rojek ji wan rojan binpekirinên derexlaqî der heqê mirov, çand û dîroka kurdan de li wir pêk tên.
Saziyên navdewletî yên têkildar, wekî çawa di dema êrîşê de ker û lal bûn, niha jî di heman rewşê de ne, lê dema mesele bû cîrana Efrîn, ango Idlib, her kes rabû û xwe li erdê xist û got nabe li Idlibê tu operasyon pêk were, ji ber ku sivîl li wir hene! Tevî ku di rastiyê de ew dixwazin li wir berjewendiyên xwe biparêzin; ne xelk û ne jî mulkê xelkê.
Gotineke me kurdan heye dibêje: “Qey filankesê keça jinbavê ye!” Bi wateya ku cudahî di navbera wê û yeke din de heye, ev gotin jî li ser meseleya Idilb û Efrînê derbasdar e. Ji ber ku diyar e ew qas zarok, kal, pîr û ciwanên Efrînê ku xwîna wan bi destê arêşa tirk hat rijandin, li ber çavên wan ne xuya ye û nabînin.
Ew qas deverên dîrokî yên hatin xerabkirin, li ser wan aciz nabûn.
Ew qas darên ku tên rakirin û şewitandin, ew jî li cem wan ne girîng e.
Ji aliyê navxweyî ve jî hindek bûyer dihêlin ku em heman pirsê bipirsin: “Ma Efrîn keça jinbavê ye?” Ji ber ku dema hejmarek ji malbatên efrînî û bi zorê xwe gihand herêmên din ên Rojavayê Kurdistanê, rastî keysbaziya hindek kesan hatin û bi taybet jî ev bûyer gelek caran li herêma Cizîrê dubare bû; wekî nimûne, xaniyê ku kirêya wî ji 10 heta 15 hezar L.S bû, ji bo wan malbatan bi derdora 50 hezarî dihat dayîn. Tevî ku em dizanin Rojavayê Kurdistanê bi xelkê xwe ve her dem ji bo şoreşên kurdan hêlîn bû û palpişta perçeyên din ên Kurdistanê bû.
Lê tişta pêwîst e ku em wê jî zanibin, ew kesên keysbaz temsîla çand û hemû xelkê vê deverê nakin, lê dîsa jî pêwîstî bi gotin û rexnekirina wan heye.
Li kêleka wê, di van demên dawî de gelek meş û çalakî bi slogana “Yan Efîn, Yan Efrîn” hatin pêkanîn û bi hezaran kes tevlî bûn. Gotina her yekî ji wan jî ew bû ku ji rizgarkirina Efrînê pê ve, tu bijarte tuneye, ev jî rihê gelê Rojava ye.
Di dawiyê de jî dixwazim keda wan şervanên ku niha li Efrînê çalakiyan li dar dixin bi bîr bixim; tevî ku bi hezaran çete û bi sedhezaran sîxur û ajanên wan hene, şervan li wir in û li dijî wan dagirkeran çalakiyên xwe pêk tînin.
Her ku civaka navdewletî û hindek kesên me dihêlin Efrîn wekî ya jinbavê xuya bike, şervan û qehemanên wê û dîsa jî bi hezaran kes dibêjin rizgarkirina Efrînê soza me ye û ji bo wê sozê têdikoşin.
[1]