بەختەنەسری
بەشو ئەوەڵی
هەڵای چەمېم وازێ نەکەرڎېبېنې بە زۊر هېزشا خەڵاتوو شانام کەرد و گۆرەتەرین ئەرکوو یانێوە کە خاتوونیە میانساڵە بەرۊش ڕاوە بڕیشا پەنەم و ڕاییوە دوور و درېژە و نادیارەشا کەرڎە خەڵاتم.
جە یانە تازەنە حیسێو غەریوانەم بې. نەیاوایبېنې وەروە ئەرکوو یەرێ ژەناشا بڕی ملو شانامەرە. بە نامې بییێبېنې تازە وەێوەو یانەی و شاژەنی، بەڵام بە عەمر هەزار فریشتێ نادیارێ هەرسی مجێنېرە ملو پەنجە هۆرپێکیاکامەرە تاکو نەلوو وەرم و چڵاکنامەرە. ڕۊنە شاباڵێم پەی کېشێنێ و شەوېنە هەسارا مۊچیاری کەرېنێ پرشنگی شانا و سەر شۆنا بایەقۆشی ڕاو یانەیما گمە کەرۊ. کاڵ و خامی من و ویرێ ناحەزێ کەس و کاری و چراوەو عێشقیشا کوشنایبېنېوە، تەنیا چېویە نامېم نەزانایا و بې‌نەرخ بې لاموە وەشەسیای بې. واچېنی دلې بازاڕوو شاجوانا هۊرشا چنیێنا و بە دوې فلسێ ناقابلێ دایناشا داروو هەڕاجی، نە ڕاو وڵێم بې و نە تاوێنا گېڵوە دمایچوە. زڕە زڕە ئاوەزم بەرز بی و فامم گېرت. دلې ویرە قووڵانە پېسەو مەلەوانێوی ناشی کەوتێبېنې گۆمێوە قووڵە و زوو زوو هەوەسیێنێ. دنیام سیاوە بیبێ. ئڼە پەلێم شەنێ تاکو نۆقمە نەبوو هېزم چەنە بڕیا. زەردی و زایېفیم دووروە دیاریش دا بې. بیێبېنې تان و تەشەر پەی خەڵکی. هەر ئا کەسا ڕوێو گوڵ‌گوڵم واچېنێ و زڵفە شاریاکاو چیروو سەرپۊشەکەیم ناز دێنێ ئیسە واچېنی پېچ پېچ تاڵ بە تاڵوو ئا زڵفامە خۆلشا داینێ تاکو تان و پۊشا یۊ گېرۆ هیچ جۊرە شانێوە خاوشارە نەکەرې. واچېنی وسێنېشا ملم تاکو هەناسەم چنا. دنیا بییێبێ جەحەڼەمێو پەیم، کە تەنیا نامېم ئەژنەویەبێ، بەڵام گڕش دەروونوو منەنە بڵېسەش هۆرزنابێ.
ئا بایەقۆشە شەوانە دەنگش بییەبێ شمشاڵەو قافێزی و سەمفۆنی مەرگیم، بە وانایش زاڵەترکە بېنا. ئا شاباڵانە فریشتێ کېشتایبێنشا پەیم و پەلێشا زنیێبېنې چەمۍ لاش‌وەراشا وسێبېنې لېوە و ژیوامشا کەرڎېبېنې شەوەزەنگە. هەرچی مێخک و سمڵوو دلې خۆرجەکەیم بې بە گڕ و تینوو هەناسام سۆچیێنێ و چەمېم کزنێنێوە. هەڵای نەزانېنا خاس خێتۆلەو زڵفەکام وزوو ڕاسە کۊرپەشا چەنە گەرەکە بېنې. نەزانیا چڕوو کێ بەی لایلاییم پەی کەرۊ تاکو بلوو وەرم و بزانوو ڕاس و درۆ ئی ژیوایمە چېشەن؟ ژیوای یانی چېش؟ وەشەویسی چېشەن؟
ئاخ دنیام چن تاریکە بییێبێ، ڕۊجیار بەزەیش ئێوە حاڵیمەرە و گجار شەوانە دزێوە کەرې و شەپڵاخێ کېشێ ڕۊخساروو مانگېرە خەڵکی سەرشوویا کەرې. تووتێ ناکاتانە گنێنێ لوورنای و چەنی وەرگا دەنگشا جیا نەکەرېنێوە. ئا شەوانە کە ئاواتەش وازێنا چمێ بنیو یۆرە و بسیۊوە. تاکو سوحێ سیسەرگی زێڕەشا لۆسێ خەمام کېشانە کەرېنێ مزڼەشا دەسشانە بەرشێ و دیسان چن دانێ تەر چڕێنێ و بە کۊمەڵ و پێوەرە کېشانە و کېشانە و کېشانە.!
بەڵام چکۆ و چەنی قورستەرین کۊڵەبارێ خەمام هۆرگېرتێنێ و حەتا شۆنە پایەکایچم خۆڵە پۆتە کۊرنېشارە کەس نەزانې بە شۊنەماو پایەکام و تەنیا بلۊقی پەنجەکام ئازارم دێنێ و بە شەله شەل ڕا پیمێنێ
نویستەی: گوڵزار شەریفی بېساران.[1]