ئێرانەنە کەی سجیل یام شناسنامە دریا
یەرەموو مانگەو ئارگای، ساڵەو (1297ک.)، یانی (106) ساڵې چەیوەڵ پەی یەکەم جاری ئەدارەو سەبت ئەحواڵی ئێرانەنە مەرزیارە و ئەوەڵین سجیل (شناسنامە) دریا بە ژەنێوە بەنامې: (فاتمە)ی ئێرانیە و ئەوەڵین گوزرنامەیچ دریا بەپیەیوە بەنامې: (عەبدولحسین خانی) سپەنتای جەشارو بەمبەیینە. چی دەوراڼە بازە کەسێ بە نامې کاربەدەسێ سەبت ئەحواڵی پەی سجیل دای لوێنێ محاڵە جۊر بەجۊرەکارە هەتا نامې و فامیلی خانەوادەگی بنویسا پەی خەڵکی و سەبتش کەرا.
ئی سجیل و فامیل دایچە وېش حەکایەتێوەش بې.
مەعمورو سەبت ئەحواڵوو ئازەمانەیە یام بەپاو کسم و کارو باباو قەڎیمیا کەسەکەیرە فامیل نویسێ، وە یام ڕوەو شۆرەتوو و لەقەبیشەو.
بازە کەڕەتێچ پاو شغڵوو کسموو کابرایرە فامیل و شۆرەت نویسیێ، بنەیمېرە ئەرکابرا جل وراز و خیات بییەی شۆرەتش بې بە خیاتی و یام چۊتاشوو نەجار بییەی بە نەجاری، ئەر تڵا ورەش بییەی شۆرتش بې بە جواهېری، یام حەکیم دۆکتۆر بییەی بې بە حەکیمی.
بڕێ کاتایچ پاو قەڎو قوارە و ڕېختو کابرایرە نامې فامیلیش نویسیێ: پېسەو خوەش چێهرەی، یام قارەمانی.
یام کابرای مەعموور نامې دەگاکێ پەرسی و نامې ئادەگێ کەرې بە شۆرەتوو خەڵکەکەی، ئەریچ چادەگەینە کسێ وېش شۆرتێوەش پەی وېش هۊرچنیەی ئاخروو شۆرەتەکەیشەو نامې دەگاکی نویسیێ، پېسەو خەڵکو دەگاو کەرجۆی لاوشارو سنەینە کە ئەغڵەبشا شۆرەتشا: فاتحی کەرجۆن، وەلێم ئەر خوڎا ئا ڕۆشە ناردەی ملەرە مەعموور تووڕە بیایە وەنەو کەسێوە، شۆرەتی زڕەتاڵوو ناشیرینش پەی نویسێ: بنەیمېرە ئەرکابرا سیاوڵە بییەی شۆرەتش کەرې بە کەلاغی یانی قاڵاوی، یام ئەر کابرا خوڕایە وەنەو مەعمووری شۆرەتش کەرې بە غەوغایی یانی تووشو قاڵکەر، یام ئەرکابرا دەسش کیسەنە بییەی شۆرەتوو دەست دەرجیبیش نویسێ پەی.
وەلێم جەهەرحاڵەنە شناسنامە و سجیل وېش نیشانەو شارسانیەتو زانایین.[1]